შპს “მადისათვის” ადმინისტრაციული სახდელის დადების შესახებ

     საქართველოს კომუნიკაციების ეროვნული კომისია (შემდგომში “კომისია”) აღნიშნავს, რომ „მაუწყებლობის შესახებ” საქართველოს კანონის მე-5 მუხლის მე- 3 პუნქტის ე) ქვეპუნქტის შესაბამისად, კომისიის ფუნქციასა და ვალდებულებას წარმოადგენს „ლიცენზიის მფლობელის მიერ ამ კანონის მოთხოვნებისა და სალიცენზიო პირობების შესრულებაზე ზედამხედველობა და კონტროლი; ამ კანონის მოთხოვნებისა და სალიცენზიო პირობების დარღვევის შემთხვევაში ლიცენზიის მფლობელისათვის შესაბამისი სანქციების დაკისრება“. ამავე კანონის 70-ე მუხლის პირველი პუნქტის თანახმად, მაუწყებელი ვალდებულია „უზრუნველყოს მის მიერ გადაცემული პროგრამების შესაბამისობა საქართველოს კანონმდებლობასა და სალიცენზიო პირობების მოთხოვნებთან.“

      კომისიის თავმჯდომარის 2005 წლის 2 აგვისტოს № 6/9 ბრძანების საფუძველზე კომისიის აპარატის მუშაკების მიერ განხორციელდა საკაბელო მაუწყებლობის ლიცენზიის მფლობელთა საქმიანობის მონიტორინგი. ამავე გადაწყვეტილების საფუძველზე შექმნილმა მონიტორინგის ჯგუფმა ჩაატარა შემოწმება, შეადგინა შემოწმების აქტი. მონიტორინგის ჯგუფის მიერ შემოწმების აქტი შედგენილ იქნა 2005 წლის 11 აგვისტოს,  ქ. ფოთში, კომპანიის ოფისში აუდიოვიზუალური შემოწმების მეთოდით (ძებნის მეთოდი, გადამრთველი პულტით).

     შემოწმების აქტისა და კომისიის აპარატის მაუწყებლობის მონიტორინგის სამსახურის მოხსენებითი ბარათის საფუძველზე ირკვევა, რომ შპს “მადი”, რომელიც ფლობს №1314 ლიცენზიას (საკაბელო სატრანზიტო ტელერადიოსამაუწყებლო ქსელით მომსახურება), თავის საკაბელო ქსელში ახორციელებს არხების: “НТВ Спорт”, “НТВ Премиера”, “ТВ...”, “НСТ”, “НТВ Кино Хит”, “НТВ Киноклуб”,”BBC”,”MGM”-ის რეტრანსლირებას “საავტორო და მომიჯნავე უფლებების შესახებ” და “მაუწყებლობის შესახებ” საქართველოს კანონების მოთხოვნათა დარღვევით. შპს “მადს” კომისიაში არ აქვს წარმოდგენილი აღნიშნული არხების რეტრანსლირების უფლებამოსილების დამადასტურებელი დოკუმენტაცია. 

     საქართველოს ზოგადი ადმინისტრაციული კოდექსის 76-ე მუხლის შესაბამისად კომისიაში დაიწყო ადმინისტრაციული წარმოება შპს “მადისათვის” ადმინისტრაციული სახდელის დადების  შესახებ.

      კომისიის აპარატის სამართლებრივ საკითხთა სამსახურმა (კ. ყურაშვილი) შემოწმების აქტის საფუძველზე, აგრეთვე მის მიერ ჩატარებული დამატებითი გამოკვლევის შედეგად დაადასტურა შპს “მადის” მიერ “საავტორო და მომიჯნავე უფლებების შესახებ” საქარველოს კანონის 58-ე  მუხლის მოთხოვნათა დარღვევის ფაქტი, რაც ითვალისწინებს ადმინისტრაციული წარმოებით სანქციის სახით ადმინისტრაციული სახდელის დაკისრებას იმის გათვალისწინებით, რომ შპს “მადი” კომისიის 2005 წლის 1 ივლისის № 440/22 გადაწყვეტილებით გაფრთხილებული იყო, რათა უზრუნველეყო თავის საკაბელო ქსელში არამართლზომიერად არხების ტრანსლიერების შეწყვეტა. სამართლებრივ საკითხთა სამსახურის მიერ ჩატარებული შიდა სამსახურებრივი მოკვლევით დადასტურდა აგრეთვე მონიტორინგის ჯგუფის მიერ შემოწმების ჩატარების პროცედურის კანონიერება.

         ზემოაღნიშნულიდან გამომდინარე, “მაუწყებლობის შესახებ” საქართველოს  კანონის 72-ე  მუხლის  და საქართველოს კომუნიკაციების ეროვნული კომისიის საქმიანობის მარეგულირებელი წესების 41-ე მუხლის შესაბამისად, კომისიამ

გადაწყვიტა: 

1. შპს “მადს” “მაუწყებლობის შესახებ” საქართველოს კანონის 72-ე მუხლის შესაბამისად დაედოს ადმინისტრაციული სახდელი – ჯარიმა 2500 (ორი ათას ხუთასი) ლარის ოდენობით.

2. დაუყოვნებლივ შეწყვიტოს შპს “მადიმ” არხების: “НТВ Спорт”, “НТВ Премиера”, “ТВ...”, “НСТ”, “НТВ КиноХит”, “НТВ Киноклуб”,”BBC”,”MGM”-ის არამართლზომიერი ტრანსლირება, ამ სამაუწყებლო კომპანიებთან სათანადო ხელშეკრულებების გაფორმებამდე;

3. შპს “მადის” მიერ ერთი წლის განმავლობაში ახალი დარღვევის ჩადენის შემთხვევაში დაეკისრება ჯარიმა მისი წლიური შემოსავლის 3%-ის ოდენობით, მაგრამ არანაკლებ 5000 (ხუთი ათასი) ლარისა, ან დაიწყება საჯარო ადმინისტრაციული წარმოება ლიცენზიის მოქმედების შეჩერების მიზნით.

4. უზრუნველყოს შპს “მადიმ” ამ გადაწყვეტილების პირველ პუნქტში აღნიშნული ადმინისტრაციული სახდელის (ჯარიმის) 2500 (ორი ათას ხუთასი) ლარის ჩარიცხვა შემდეგ საბანკო რეკვიზიტზე: ერთიანი ანგარიში არასაგადასახადო (ქ. ოზურგეთი), ა/ა 200122900, საქართველოს ეროვნული ბანკი, ბანკის კოდი № 220101107, საბიუჯეტო სახაზინო კოდი (300663179) და ჩარიცხვის დამადასტურებელი დოკუმენტები წარმოადგინოს კომისიაში 15 დღის განმავლობაში;

5. გადაწყვეტილება შეიძლება გასაჩივრდეს ქ. თბილისის საქალაქო სასამართლოს ადმინისტრაციულ საქმეთა კოლეგიაში (ქ. თბილისი, სარაჯიშვილის ქ №1ა) ერთი თვის ვადაში;

6. კონტროლი აღნიშნული გადაწყვეტილების შესრულებაზე დაევალოს კომისიის აპარატის ფინანსურ სამსახურს (ი. აბულაძე)

კომისიის თავმჯდომარე                                                    დ. ქიტოშვილი

კომისიის წევრები:                                                               დ. პატარაია

                                                                                               გ. ფრუიძე

                                                                                               ზ. ნონიკაშვილი