შპს “საქართველოს ცენტრალური კავშირგაბმულობის კორპორაციის” გაფრთხილების თაობაზე ადმინისტრაციული წარმოების შეწყვეტის შესახებ

   საქართველოს კომუნიკაციების ეროვნული კომისია (შემდგომში “კომისია”) აღნიშნავს, რომ „ელექტრონული კომუნიკაციების შესახებ“ საქართველოს კანონის მე-11 მუხლის შესაბამისად, კომისიის ფუნქციასა და ვალდებულებას წარმოადგენს „ელექტრონული კომუნიკაციების  სფეროში ავტორიზებული პირების საქმიანობის რეგულირება, მათ შორის, ნორმატიული და ინდივიდუალური სამართლებრივი აქტების მიღება, მათ შესრულებაზე მონიტორინგი და კონტროლი, გამოვლენილი დარღვევებისათვის ამ კანონით განსაზღვრული უფლებამოსილებების ფარგლებში ამავე კანონით დადგენილი  სანქციების დაკისრება”. ამავე კანონის 19-ე მუხლის მე-2 პუნქტის “ბ” ქვეპუნქტის თანახმად, ავტორიზებული პირი ვალდებულია „შეასრულოს ელექტრონული კომუნიკაციების სფეროში საქართველოს კანონმდებლობა, მათ შორის კომისიის დადგენილებები და გადაწყვეტილებები“.

    კომისიის აპარატის ფინანსური სამსახურის უფროსის (ი. აბულაძე) 2005 წლის 10 ნოემბრის  სამსახურებრივი ბარათის შესაბამისად ირკვევა, რომ შპს “საქართველოს ცენტრალური კავშირგაბმულობის კორპორაცია”, რეგისტრირებული ქ. თბილისის ვაკის რაიონული სასამართლოს  № 5/4 – 140, 10. 11. 1998წ დადგენილებით, რომელიც ფლობს № 1283, №248, №532 ლიცენზიებს, გააჩნია რეგულირების საფასურის დავალიანება 3,167.02 (სამი ათას ასსამოცდაშვიდი ლარი და ორი თეთრი), ამასთან კომპანიას 2005 წლის აპრილიდან არ წარმოუდგენია ყოველწლიური რეგულირების საფასურის გაანგარიშებები.

      კომისიის აპარატის სამართლებრივ საკითხთა სამსახურის (კ.ყურაშვილი) განმარტებით, შპს “საქართველოს ცენტრალური კავშირგაბმულობის კორპორაცია” აღნიშნული ქმედებით არღვევს “ელექტრონული კომუნიკაციების შესახებ” საქართველოს კანონის მე-12 მუხლის მე-4 პუნქტისა და მე-19 მუხლის მე-2 პუნქტის “ლ” ქვეპუნქტის მოთხოვნებს, რომელთა შესაბამისად ავტორიზებული პირები ვალდებული არიან ყოველთვიურად, არა უგვიანეს საანგარიშო თვის მომდევნო თვის 20 რიცხვისა, კომისიის მიერ განსაზღვრული ფორმით წარუდგინონ კომისიას ინფორმაცია გაანგარიშებული რეგულირების საფასურის თაობაზე და ჩარიცხონ კომისიის ანგარიშზე რეგულირების საფასური”.

   2005 წლის 18 ნოემბერს აღნიშნულ საკითხთან დაკავშირებით გაიმართა კომისიის სხდომა, სადაც კომისიის აპარატის ფინანსურმა სამსახურმა (ი. აბულაძე) აღნიშნა, რომ შპს “საქართველოს ცენტრალური კავშირგაბმულობის კორპორაციამ” ზემოაღნიშნული თანხა 2005 წლის 18 ნოემბრის მდგომარეობით ჩარიცხა და შესაბამისად აღარ არსებობს კომპანიის მიერ კანონდარღვევის ფაქტი.

    კომისიის აპარატის სამართლებრივ საკითხთა სამსახური აღნიშნავს, რომ შპს “საქართველოს ცენტრალური კავშირგაბმულობის კორპორაციის” მიერ კანონდარღვევის ჩადენის ფაქტი არ არსებობს, საკითხის კომისიის სხდომაზე განხილვის მომენტისთვის. 

        ზემოაღნიშნულიდან გამომდინარე, “ელექტრონული კომუნიკაციების შესახებ” საქართველოს  კანონის   46-ე მუხლის მე-4 პუნქტის შესაბამისად, კომისიამ

გ ა დ ა წ ყ ვ ი ტ ა:

1. შეწყდეს ადმინისტრაციული წარმოება შპს “საქართველოს ცენტრალური კავშირგაბმულობის კორპორაციის” გაფრთხილების თაობაზე;

2. კომისიის აპარატის ადმინისტრაციამ უზრუნველყოს ამ გადაწყვეტილების შპს “საქართველოს ცენტრალური კავშირგაბმულობის კორპორაციისათვის” დროული მიწოდება;

3. გადაწყვეტილება შეიძლება გასაჩივრდეს ქ. თბილისის საქალაქო სასამართლოს ადმინისტრაციულ საქმეთა კოლეგიაში (ქ. თბილისი, სარაჯიშვილის ქ №1ა) ერთი თვის ვადაში;

4. კონტროლი აღნიშნული გადაწყვეტილების შესრულებაზე დაევალოს სამართლებრივ საკითხთა სამსახურს  (კ. ყურაშვილი);

კომისიის თავმჯდომარე                                                    დ. ქიტოშვილი

კომისიის წევრი:                                                               დ. პატარაია

                                                                                              გ. ფრუიძე