კონტაქტი

საქართველოს კომუნიკაციების ეროვნული კომისია (შემდგომში “კომისია”) აღნიშნავს, რომ კომისიას განცხადებით (13.09.2005 წ. N7/315-05) მომართა შპს “ლიბო-1“-მა საკაბელო საერთო ტელემაუწყებლობის ლიცენზიის მიღების თაობაზე.

კომისია აღნიშნავს, რომ შპს “ლიბო-1”-ის ლიცენზიის მისაღებად წარმოდგენილ განცხადებაში სრულყოფილად არ არის მითითებული “მაუწყებლობის შესახებ” საქართველოს კანონის 41-ე მუხლის მე-2 პუნქტით გათვალისწინებული: ა) საფირმო სახელწოდება, ორგანიზაციულ-სამართლებრივი ფორმა, იურიდიული მისამართი (ადგილსამყოფელი), სამეწარმეო რეესტრში რეგისტრაციის შესახებ მონაცემები, წარმომადგენლობაზე უფლებამოსილი პირის სახელი და გვარი, მონაცემები პარტნიორთა შესახებ ბ) მაუწყებლობის გავრცელების სავარაუდო გეოგრაფიული ზონა; გ) მაუწყებლობის სავარაუდო ხანგრძლივობა დღე-ღამის განმავლობაში. აგრეთვე ამავე კანონის 41-ე მუხლის მე-3 პუნქტის შესაბამისად განცხადებას არ ერთვის: ა) სახელმწიფო რეგისტრაციის დამადასტურებელი დოკუმენტების ასლები; ბ) სალიცენზიო მოსაკრებლის გადახდის დამადასტურებელი საბუთი.

აღნიშნული ხარვეზის შესავსებად კომისიამ წერილით მიმართა შპს “ლიბო-1“-ს (24.10.2005 წ. N05/1645-05), რომ 10 დღის ვადაში წარმოედგინა სრულყოფილი დოკუმენტაცია. შპს “ლიბო-1”-ის მიერ აღნიშნული ხარვეზი გამოსწორებული არ არის.

ზემოაღნიშნულიდან გამომდინარე, “საქართველოს ზოგადი ადმინისტრაციული კოდექსის” 83-ე მუხლის მე-5 პუნქტის შესაბამისად კომისიამ

გადაწყვიტა:

1. განუხილველად დარჩეს შპს “ლიბო-1“-ის განცხადება ლიცენზიის გაცემის შესახებ;

2. დაევალოს კომისიის აპარატის ადმინისტრაციას (ი. ხარებავა) აცნობოს შპს “ლიბო-1“-ს გადაწყვეტილების მიღების თაობაზე;

3. შპს “ლიბო-1“-ის განცხადების განხილვის ვადის დინება განახლდება კომპანიის მიერ კანონმდებლობით გათვალისწინებული დოკუმენტაციის სრულყოფილად წარმოდგენისთანავე;

4. გადაწყვეტილება შეიძლება გასაჩივრდეს ქ.თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ.თბილისი, სარაჯიშვილის N 1 ა ) ერთი თვის ვადაში;

5. კონტროლი აღნიშნული გადაწყვეტილების შესრულებაზე დაევალოს კომისიის აპარატის სატელეკომუნიკაციო და საფოსტო ბაზრის რეგულირების სამსახურს (ე. ასანიძე).

კომისიის თავმჯდომარე დ. ქიტოშვილი

კომისიის წევრები გ. ფრუიძე

ზ. ნონიკაშვილი

დ. პატარაია