ინდივიდუალური საწარმო “მამუკა კალანდარიშვილის” გაფრთხილების თაობაზე

     საქართველოს კომუნიკაციების ეროვნული კომისია (შემდგომში “კომისია”) აღნიშნავს, რომ “ელექტრონული კომუნიკაციების შესახებ” საქართველოს კანონის მე-11 მუხლის პირველი პუნქტის შესაბამისად, ელექტრონული კომუნიკაციების  სფეროში კომისია დამოუკიდებლად ახორციელებს ავტორიზებული პირების საქმიანობისა და ლიცენზიის მფლობელების მიერ რადიოსიხშირული სპექტრით ან/და ნუმერაციის რესურსით სარგებლობის რეგულირებას, მათ შორის, ნორმატიული და ინდივიდუალური სამართლებრივი აქტების მიღებას, მათი შესრულების მონიტორინგსა და კონტროლს, გამოვლენილი დარღვევებისათვის ამ კანონით განსაზღვრული უფლებამოსილებების ფარგლებში, ამავე კანონითა და საქართველოს ადმინისტრაციულ სამართალდარღვევათა კოდექსით  დადგენილი  სანქციების დაკისრებას.

       “ელექტრონული კომუნიკაციების შესახებ” საქართველოს კანონის მე-11 მუხლის მე - 3 პუნქტის “ზ” ქვეპუნქტის თანახმად იგი უფლებამოსილია  ელექტრონული კომუნიკაციების სფეროში საქმიანობის ავტორიზებისა და რადიოსიხშირული სპექტრით ან/და ნუმერაციის რესურსით სარგებლობის ლიცენზიის პირობების დაცვაზე განახორციელოს ზედამხედველობა და მათი დარღვევისას გაატაროს კანონით გათვალისწინებული ღონისძიებები, ხოლო 43-ე მუხლის პირველი პუნქტის შესაბამისად იგი აკონტროლებს ავტორიზებულ პირთა მიერ ელექტრონული კომუნიკაციების სფეროში განხორციელებულ საქმიანობას, ასევე მათ მიერ  ელექტრონული კომუნიკაციების სფეროში საქართველოს კანონმდებლობის, კომისიის დადგენილებებითა და გადაწყვეტილებებით განსაზღვრული მოთხოვნებისა და ვალდებულებების, ხოლო მაუწყებლობის ტრანზიტის განმახორციელებელ ავტორიზებულ პირთა მიერ – აგრეთვე „საავტორო და მომიჯნავე უფლებების შესახებ“ საქართველოს კანონის  შესრულებას.

კომისია აგრეთვე აღნიშნავს, რომ “ელექტრონული კომუნიკაციების შესახებ” საქართველოს კანონის მე-19 მუხლის მე-2 პუნქტის “ბ” ქვეპუნქტის შესაბამისად, ავტორიზებული პირი ვალდებულია შეასრულოს ელექტრონული კომუნიკაციების  სფეროში საქართველოს კანონმდებლობა, მათ შორის, კომისიის დადგენილებები და გადაწყვეტილებები. 

  “ელექტრონული კომუნიკაციების შესახებ” საქართველოს კანონის 44-ე მუხლის პირველი პუნქტის, კომისიის თავმჯდომარის 2006 წლის 21 თებერვლის № 4/10 ბრძანების საფუძველზე კომისიის აპარატის მუშაკების მიერ განხორციელდა საკაბელო მაუწყებლობის ლიცენზიის მფლობელთა საქმიანობის მონიტორინგი. ამავე ბრძანების საფუძველზე, მონიტორინგის ჯგუფმა ჩაატარა შემოწმება და შეადგინა შემოწმების აქტი.

    შემოწმების აქტში, რომელიც შედგენილია 2006 წლის 23 თებერვალს, ი/ს “მამუკა კალანდარიშვილის” სადგურში, განთავსებული ქ. ბათუმი ლერმონტოვის ქ. №107 მითითებულია, რომ შემოწმებისას მონიტორინგის ჯგუფის მიერ მოთხოვნილი დუკუმენტაცია, კერძოდ ხელშეკრულებები, რის საფუძველზეც ი/ს “მამუკა კალანდარიშვილი” (რეგისტრაციის ნომერი 131/1) ახორციელებს ადგილობრივი და უცხო ქვეყნის ტელეპროგრამების ტრანსლირებას მის საკაბელო ქსელში, ნაწილობრივ იქნა წარმოდგენილი, რასაც ადასტურებს ხელმოწერით მამუკა კალანდარიშვილი.

       შემოწმების შედეგად (აუდიოვიზუალური ძებნის მეთოდით, გადამრთველი პულტით) გამოვლინდა, რომ კომპანია ყოველგვარი ხელშეკრულების გარეშე ახორციელებს არხების: “EURONEWS”, “РТР Рассия”, “ТНТ”, “НТВ Премиера”, “СТС”, “РТР Спорт Планета”, “Hallmark”, “C1”, “Jetix”, “Ren TV”, “24 Док”,  “НТВ Кино хит”, “НТВ”, “НТВ Кино клуб”, “Animal planet”, “Discovery”, “НТВ спорт”, “МузTV”, ”Мир”, “Dream Turkey”, “Romantica”, “ტელეარხი 25”, “საზოგადოებრივი მაუწყებლობის 1 არხი”, “Муз Бох”ს რეტრანსლირებას საავტორო ან/და მომიჯნავე უფლების მფლობელ პირებთან შეთანხმების გარეშე. შემოწმების აქტი რეაგირებისთვის გადაეცა კომისიის აპარატის სამართლებრივ სკითხთა სამსახურს.

     კომისიის აპარატის სამართლებრივ საკითხთა სამსახურმა იხელმძღვანელა “საავტორო უფლებების შესახებ” 1996 წლის 20 დეკემბერის ისმო-ს ხელშეკრულების პირველი, მე-2 და მე-4 პუნქტების, მე-4 მუხლის, მე-8 მუხლისა და მე-14 მუხლის, “ლიტერატურისა და მხატვრული ნაწარმოებების დაცვის შესახებ” ბერნის კონვენციის მე-2 მუხლის პირველი პუნქტისა და მე-5 მუხლის, “საავტორო და მომიჯნავე უფლებების შესახებ” საქართველოს კანონის მე-2 მუხლის, მე-4 მუხლის “ბ” ქვეპუნქტის, მე-5 მუხლის პირველი პუნქტის, მე-18 მუხლის პირველი პუნქტის, ამავე მუხლის მე-2 პუნქტის “ვ” ქვეპუნქტის, 21-ე მუხლის პირველი პუნქტის, 50-ე მუხლის პირველი პუნქტის, ამავე მუხლის მე-2 პუნქტის “გ” ქვეპუნქტის, 51-ე მუხლის, 58-ე მუხლის პირველი და მეორე პუნქტების მოთხოვნათა შესაბამისად და მიიჩნია, რომ ი/ს “მამუკა კალანდარიშვილი” ახორციელებს “საავტორო და მომიჯნავე უფლებების შესახებ” საქართველოს კანონის 58-ე მუხლის მე-3 პუნქტის “ა” ქვეპუნქტით გათვალისწინებული საავტორო უფლებების დარღვევას, კერძოდ ახორციელებს მაუწყებლობის ორგანიზაციის გადაცემის უკანონო გამოყენებას.

  აღნიშნულის გათვალისწინებით, კომისიაში 2006 წლის 7 ივლისს დაიწყო ადმინისტრაციული წარმოება ი/ს “მამუკა კალანდარიშვილის” გაფრხილების თაობაზე. ადმინისტრაციული წარმოების განმავლობაში ი/ს “მამუკა კალანდარიშვილის” მიერ კომისიაში არ იქნა წარმოდგენელი დოკუმენტაცია, რომელიც გახდებოდა საფუძველი დაწყებული ადმინისტრაციული წარმოების შეწყვეტისა.

    კომისიის აპარატის სამართლებრივ საკითხთა სამსახურს დადასტურებულად მიაჩნია ი/ს “მამუკა კალანდარიშვილის” მიერ კანონდარღვევის ჩადენის ფაქტი.

        “ელექტრონული კომუნიკაციების შესახებ” საქართველოს კანონის 45-ე მუხლის შესაბამისად, კომისიამ

გადაწყვიტა:

1. გაფრთხილდეს ი/ს “მამუკა კალანდარიშვილი” რათა დაუყოვნებლივ უზრუნველყოს მან მაუწყებლობის პროცესში “საავტორო და მომიჯნავე უფლებების შესახებ”, “ელექტრონული კომუნიკაციების შესახებ” საქართველოს კანონებისა და საერთაშორისო ხელშეკრულებებისა და კონვენციების მოთხოვნათა შესრულება. “ელექტრონული კომინიკაციების შესახებ” საქართველოს კანონის 45-ე მუხლის შესაბამისად,  ი/ს “მამუკა კალანდარიშვილს”-ერთი წლის განმავლობაში ახალი დარღვევის ჩადენის შემთხვევაში დაეკისრება ჯარიმა მისი ბოლო თორმეტი კალენდარული თვის შემოსავლის (საქართველოს საგადასახადო კოდექსით განსაზღვრული ერთობლივი შემოსავალი დღგ-ის გარეშე)  0,5 პროცენტი, მაგრამ არანაკლებ 10000 (ათი ათასი) ლარისა.

2. დაუყოვნებლივ შეწყვიტოს ი/ს “მამუკა კალანდარიშვილმა” არხების: “EURONEWS”, “РТР Рассия”, “ТНТ”, “НТВ Премиера”, “СТС”, “РТР Спорт Планета”, “Hallmark”, “C1”, “Jetix”, “Ren TV”, “24 Док”,  “НТВ Кино хит”, “НТВ”, “НТВ Кино клуб”, “Animal planet”, “Discovery”, “НТВ спорт”, “МузTV”, ”Мир”, “Dream Turkey”, “Romantica”, “ტელეარხი 25”, “საზოგადოებრივი მაუწყებლობის 1 არხი”, “Муз Бох”-ს არამართლზომიერი ტრანსლირება; 

3. გადაწყვეტილება შეიძლება გასაჩივრდეს ქ.თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ.თბილისი, სარაჯიშვილის № 1 ა)  ერთი  თვის ვადაში;

4.კონტროლი აღნიშნული გადაწყვეტილების შესრულებაზე დაევალოს კომისიის აპარატის მაუწყებლობის მონიტორინგის სამსახურს (გ. რატიშვილი).

კომისიის თავმჯდომარე                              დ. ქიტოშვილი 

კომისიის წევრი:                                          გ. ფრუიძე                                                                         

                                                                   ზ. ნონიკაშვილი