აზერბაიჯანის რესპუბლიკის ტერიტორიაზე არსებული საჰაერო რადიოსანავიგაციო სამსახურის სადგურებისთვის მინიჭებული სიხშირეების გამოყენებაზე თანხმობის გაცემის შესახებ

  საქართველოს კომუნიკაციების ეროვნულმა კომისიამ (შემდგომში “კომისია”) განიხილა აზერბაიჯანის კომუნიკაციებისა და საინფორმაციო ტექნოლოგიების რადიოსიხშირეთა სახელმწიფო მართვის მიერ ელექტრონული ფოსტით მიღებული წერილი, თანდართული ტექნიკური მახასიათებლებით, საჰაერო რადიოსანავიგაციო სამსახურის სადგურებისთვის მინიჭებული სიხშირეების გამოყენების შესახებ. რადიოკავშირის რეგიონალური კონფერენციის GE06 გეგმის შესაბამისად (პირველ და მე-3 რეგიონებში ციფრული მაუწყებლობის გეგმა 174-230 მგჰც და 470-862 მგჰც სიხშირულ დიაპაზონებში), წარმოდგენილი მიმღებ-გადამცემი სადგურების მიერ გამოყენებული სიხშირეები, თანდართული ტექნიკური მახასიათებლების შესაბამისად, მდებარეობს დაგეგმარების სიხშირულ დიაპაზონებში და მიეკუთვნება აღნიშნულ დიაპაზონებში “სხვა ძირითადი რადიოკავშირის სამსახურების” სადგურებს. აღნიშნული შეთანხმების მე-4 თავით განსაზღვრული პროცედურების შესაბამისად, 174-230 მგჰც და 470-862 მგჰც სიხშირულ დიაპაზონებში ფუნქციონირებადი მიმღებ-გადამცემი სადგურები შეთანხმებული უნდა იქნეს მათ საკოორდინაციო ზონაში მოხვედრილ მეზობელ ადმინისტრაციებთან და კოორდინაციის დამთვრების შემდეგ შეტანილი როგორც დამატება ან/და ცვლილება ე. წ. “სხვა ძირითადი რადიოკავშირის სამსახურების” საერთო გეგმაში. რადიოსიხშირეთა სახელმწიფო მართვის მიერ წარმოდგენილი აღნიშნული საჰაერო რადიოსანავიგაციო სადგურები წარმოადგენენ საჰაერო რადიოსანავიგაციო სამსახურის სადგურებს, გამოიყენება სახმელეთო სადგურებსა და საჰაერო ხომალდებს შორის მონაცემების ურთიერთგაცვლის მიზნით და ფუნქციონირებენ 740 მგჰც და 835 მგჰც სიხშირეებზე.

            წარმოდგენილი ტექნიკური მახასიათებლების შესაბამისად, აზერბაიჯანის რესპუბლიკის საჰაერო რადიოსანავიგაციო სამსახურის სადგურები, რადიოკავშირის რეგიონალური კონფერენციის GE06 გეგმის დამატება 2, მე-4 თავის შესაბამისად, არ ქმნიან მავნე ხელშეშლების მიუღებელ დონეებს საქართველოს ტერიტორიაზე დაგეგმილი ციფრული სატელევიზიო და მოქმედი საჰაერო – სანაოსნო სამსახურების (გამოყენებული სიხშირეები ასევე შესულია GE06 გეგმაში) მიერ გამოყენებულ სიხშირებზე.

            “ელექტრონული კომუნიკაციების შესახებ” საქართველოს კანონის 47-ე მუხლის მე-4 პუნქტისა და მე-11 მუხლის, მე-3 პუნქტის, ი) ქვეპუნქტის შესაბამისად, კომისიამ

გადაწყვიტა:

1. მიეცეს თანხმობა აზერბაიჯანის კომუნიკაციებისა და საინფორმაციო ტექნოლოგიების რადიოსიხშირეთა სახელმწიფო მართვის სამსახურს აზერბაიჯანის რესპუბლიკის ტერიტორიაზე არსებული საჰაერო რადიოსანავიგაციო სამსახურის სადგურების გამოყენებაზე წარმოდგენილი    ტექნიკური მახასიათებლებით;

2. გადაწყვეტილება შეიძლება გასაჩივრდეს თბილისის საქალაქო სასამართლოს ადმინისტრაციულ კოლეგიაში (ქ.თბილისი,  სარაჯიშვილის ქ. № 1ა) ერთი თვის ვადაში;  

3. კონტროლი აღნიშნული გადაწყვეტილების შესრულებაზე დაევალოს რადიოსიხშირეთა მართვის, მონიტორინგისა და კოორდინაციის დეპარტამენტს (ს. შავგულიძე).

კომისიის თავმჯდომარე                                                      დ. ქიტოშვილი

კომისიის წევრი                                                                     დ. პატარაია

კომისიის წევრი                                                                     გ. ფრუიძე

კომისიის წევრი                                                                     ზ. ნონიკაშვილი