შპს ”შავი ზღვის ტელეკომი”-ს და შპს ”ფიუჩერკომ ინვესტი”-სთვის დოკუმენტაციის წარმოდგენის ვადის განსაზღვრის შესახებ

საქართველოს კომუნიკაციების ეროვნული კომისია (შემდგომში „კომისია“) აღნიშნავს, რომ კომისიის 2007 წლის 27 ნოემბრის N710/8 გადაწყვეტილებით გამოცხადდა აუქციონი მობილური საკომუნიკაციო მომსახურების განსახორციელებლად რადიოსიხშირული სპექტრით სარგებლობის ლიცენზიის მისაღებად.

ლიცენზიის მაძიებლების მიერ  განცხადებების მიღების  ვადად განისაზღვრა 2007 წლის 17 დეკემბრის 17:00 საათი.

აუქციონში მონაწილეობის მისაღებად განაცხადი წარმოადგინეს შპს ”შავი ზღვის ტელეკომმა” და შპს ”ფიუჩერკომ ინვესტმა”, რომელთა მიერ წარმოდგენილი დოკუმენტაციაც არ შეესაბამება გამოცხადებული აუქციონის პირობებს. კერძოდ, ლიცენზიის მაძიებლების განცხადებას თანდართული არ აქვს:

1) რესურსით სარგებლობის საწყისი საფასურის 10%-ის (ბე) გადახდის დამადასტურებელი საბუთი;

2) სალიცენზიო მოსაკრებლის (1000 ლარი) გადახდის დამადასტურებელი საბუთი;

საქართველოს ზოგადი ადმინისტრაციული კოდექსის 83-ე მუხლის მე-2 და მე-3 პუნქტების თანახმად, თუ განმცხადებლის მიერ არასრულყოფილადაა წარმოდგენილი დოკუმენტაცია, ადმინისტრაციული ორგანო განმცხადებელს განუსაზღვრავს ვადას, რომლის განმავლობაშიც მან უნდა წარმოადგინოს დამატებითი დოკუმენტაცია. დამატებითი დოკუმენტის წარმოდგენის ვადა არ შეიძლება იყოს 5 სამუშაო დღეზე ნაკლები. თუ დადგენილ ვადაში განმცხადებელი არ წარადგენს შესაბამის დოკუმენტაციას, ადმინისტრაციული ორგანო ღებულობს გადაწყვეტილებას განცხადების განუხილველად დატოვების შესახებ.

ზემოაღნიშნულიდან გამომდინარე, კომისიის 2007 წლის 27 ნოემბრის N710/8 გადაწყვეტილების, საქართველოს ზოგადი ადმინისტრაციული კოდექსის  83-ე მუხლის მე-2 და მე-3 პუნქტების  შესაბამისად, კომისიამ

გადაწყვიტა:

1. მიეცეს ვადა შპს ”შავი ზღვის ტელეკომს” და შპს ”ფიუჩერკომ ინვესტს” 2007  წლის 26 დეკემბრამდე წარმოადგინონ შემდეგი დოკუმენტები:

ა) შპს ”შავი ზღვის ტელეკომი”-ს და შპს ”ფიუჩერკომ ინვესტი”-ს მიერ რესურსით სარგებლობის საწყისი საფასურის 10%-ის (ბე) გადახდის დამადასტურებელი საბუთი;

ბ) შპს ”შავი ზღვის ტელეკომი”-ს და შპს ”ფიუჩერკომ ინვესტი”-ს მიერ სალიცენზიო მოსაკრებლის (1000 ლარი) გადახდის დამადასტურებელი საბუთი;

2. დაევალოს კომისიის ადმინისტრაციულ და სამართლებრივ დეპარტამენტებს (ნ.ნიჟარაძე; ნ.ჯანელიძე):

ა) წინამდებარე გადაწყვეტილების შპს ”შავი ზღვის ტელეკომისა” და შპს ”ფიუჩერკომ ინვესტი”-სთვის გაგზავნა;

ბ) წინამდებარე გადაწყვეტილების გამოქვეყნება  კომისიის გვერდზე ინტერნეტში;

3.  გადაწყვეტილება შეიძლება გასაჩივრდეს ქ.თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ.თბილისი, სარაჯიშვილის № 1 ა) ერთი  თვის ვადაში;

4. კონტროლი გადაწყვეტილების შესრულებაზე დაევალოს კომისიის სამართლებრივ დეპარტამენტს (კ.ყურაშვილი);

კომისიის თავმჯდომარე                                          გ.არველაძე

კომისიის წევრები                                                     დ.პატარაია

                                                                                    გ.ფრუიძე

                                                                                   ზ.ნონიკაშვილი

                                                                                  კ.კვიტაიშვილი