მობილური საკომუნიკაციო მომსახურების განსახორციელებლად რადიოსიხშირული სპექტრით სარგებლობის ლიცენზიის მისაღებად გამოცხადებულ აუქციონში მონაწილეობის თაობაზე შპს “ფიუჩერკომ ინვესტი“-ს და შპს ”შავი ზღვის ტელეკომი”-ს განცხადებების განუხილველად დატოვების შესახებ

საქართველოს კომუნიკაციების ეროვნული კომისია (შემდგომში „კომისია“) აღნიშნავს, რომ კომისიის 2007 წლის 27 ნოემბრის N710/8 გადაწყვეტილებით გამოცხადდა აუქციონი მობილური საკომუნიკაციო მომსახურების განსახორციელებლად რადიოსიხშირული სპექტრით სარგებლობის ლიცენზიის მისაღებად.

ლიცენზიის მაძიებლების მიერ  განცხადებების მიღების  ვადად განისაზღვრა 2007 წლის 17 დეკემბრის 17:00 საათი.

აუქციონში მონაწილეობის მისაღებად განაცხადი კომისიაში წარმოადგინეს შპს ”შავი ზღვის ტელეკომმა” და შპს ”ფიუჩერკომ ინვესტმა”, რომელთა მიერ წარმოდგენილი დოკუმენტაციაც არ შეესაბამებოდა გამოცხადებული აუქციონის პირობებს. კერძოდ, ლიცენზიის მაძიებლების განცხადებას თანდართული არ ჰქონდა:

1) რესურსით სარგებლობის საწყისი საფასურის 10%-ის (ბე) გადახდის დამადასტურებელი საბუთი;

2) სალიცენზიო მოსაკრებლის (1000 ლარი) გადახდის დამადასტურებელი საბუთი;

კომისიის 2007 წლის 18 დეკემბრის 777/8 გადაწყვეტილებით შპს ”ფიუჩერკომ ინვესტს” და შპს ”შავი ზღვის ტელეკომს” კომისიის 2007 წლის 27 ნოემბრის N710/8 გადაწყვეტილების და საქართველოს ზოგადი ადმინისტრაციული კოდექსის  83-ე მუხლის მე-2 და მე-3 პუნქტების შესაბამისად მიეცათ ვადა 2007  წლის 26 დეკემბრამდე წარმოედგინათ რესურსით სარგებლობის საწყისი საფასურის 10%-ის (ბე) და სალიცენზიო მოსაკრებლის (1000 ლარი)  გადახდის დამადასტურებელი საბუთები.

კომისია აღნიშნავს, რომ შპს ”ფიუჩერკომ ინვესტი”-ს და შპს ”შავი ზღვის ტელეკომი”-ს მიერ ზემოაღნიშნული დოკუმენტაცია დადგენილ ვადაში წარმოდგენილი არ იქნა.

აღნიშნულიდან გამომდინარე კომისიის 2007 წლის 18 დეკემბრის 777/8 გადაწყვეტილებისა და საქართველოს ზოგადი ადმინისტრაციული კოდექსის  83-ე მუხლის მე-5 პუნქტის შესაბამისად კომისიამ

გადაწყვიტა:

1. განუხილველად დარჩეს შპს ”ფიუჩერკომ ინვესტი”-ს და შპს ”შავი ზღვის ტელეკომი”-ს განცხადებები მობილური საკომუნიკაციო მომსახურების განსახორციელებლად რადიოსიხშირული სპექტრით სარგებლობის ლიცენზიის მისაღებად გამოცხადებულ აუქციონში მონაწილეობის შესახებ;

2. დაევალოს კომისიის აპარატის სამართლებრივ დეპარტამენტს (ნ.ნიჟარაძე) აცნობოს შპს ”ფიუჩერკომ ინვესტს” და შპს ”შავი ზღვის ტელეკომს” წინამდებარე გადაწყვეტილების მიღების თაობაზე;

3. გადაწყვეტილება შეიძლება გასაჩივრდეს ქ.თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ.თბილისი, სარაჯიშვილის № 1 ა) ერთი  თვის ვადაში;

4. კონტროლი აღნიშნული გადაწყვეტილების შესრულებაზე დაევალოს კომისიის აპარატის სამართლებრივ დეპარტამენტს (კ.ყურაშვილი).

კომისიის თავმჯდომარე          გ.არველაძე

კომისიის წევრები:                   გ.ფრუიძე

                                                ზ.ნონიკაშვილი

                                               კ.კვიტაიშვილი