კონტაქტი

საქართველოს კომუნიკაციების ეროვნული კომისია (შემდგომში ”კომისია”) აღნიშნავს, რომ კომისიაში შემოსულია სს ”საქართველოს გაერთიანებული სატელეკომუნიკაციო კომპანიის” (შემდგომში ”გაერთიანებული ტელეკომი”) განცხადება (2008 წლის 18 ივნისის №8-14/725), რომელშიც აღნიშნულია, რომ შპს ”კავკასუს ონლაინი”, იყენებს ბოროტად მის საბაზრო ძალაუფლებას და ინტერნეტის ქსელით საბითუმო მომსახურებისთვის ადგენს ტარიფებს, რომელიც არ არის ხარჯებზე ორიენტირებული და უკანონოდ ზღუდავს კონკურენციას ბაზრის მოცემულ სეგმენტზე და მოითხოვა ინტერნეტის ქსელით საბითუმო მომსახურების ბაზრის კვლევა და ანალიზი.

ინტერნეტის ქსელით საბითუმო მომსახურების ბაზრის სეგმენტზე კვლევისა და ანალიზის თაობაზე წარმოდგენილი განცხადების საფუძვლად მითითებულია კომისიის 2008 წლის 30 მაისი №294/16 გადაწყვეტილება და ”კავკასუს ონლინის” მიერ მის ვებ გვერდზე გამოქვეყნებული ინფორმაცია ორ მეგაბიტ/წამიანი პორტის ღირებულების შესახებ.

კომისია აღნიშნავს, რომ გამომდინარე იქიდან, რომ წარმოდგენილი იყო განცხადება საბითუმო ბაზარზე მომსახურების მიმწოდებელი ავტორიზებული პირის - შპს ”კავკასუს ონლაინის” მიერ დადგენილი ტარიფებით კონკურენციის შეზღუდვის შესახებ, მიზანშეწონილად იქნა მიჩნეული ინტერნეტის საბითუმო მომსახურების ბაზრის სეგმენტის კვლევის და ანალიზის დაწყება, რის თაობაზეც მიღებულ იქნა კომისიის 2008 წლის 27 ივნისის №375/23 გადაწყვეტილება.

კომისია აღნიშნავს, რომ საკითხის ზეპირი მოსმენა დანიშნული იყო 2008 წლის 25 ივლისს 12:00 საათზე, ხოლო გადაწყვეტილება მიღებულ უნდა ყოფილიყო, ზეპირი მოსმენის ჩატარებიდან 10 სამუშაო დღის განმავლობაში.

კომისია აღნიშნავს, რომ ინტერნეტის ქსელით საბითუმო მომსახურების ბაზრის სეგმენტზე ავტორიზებულ პირებს, დაევალათ ”ელექტრონული კომუნიკაციების შესახებ” საქართველოს კანონის 35-ე მუხლის შესაბამისად, ინტერნეტის ქსელთან დაშვების მომსახურების 2006-2007 წლის განაწილებული დანახარჯების და ეკონომიკური მონაცემების კომისიისთვის წარმოდგენა ზეპირი მოსმენის სხდომის დღემდე. შპს ”კავკასუს ონლაინის” მიერ, კომისიის აპარატის სტრატეგიული განვითარების და კონკურენციის დეპარტამენტში (გ. ბუთბაია) გამართული შეხვედრების შედეგად, დაზუსტდა მოთხოვნილი ინფორმაციის შინაარსი. კომისიაში ინფორმაცია წარმოდგენილ იქნა 2008 წლის 25 ივლისს, კომისიის სხდომაზე, ხოლო სხვა ავტორიზებული პირების მიერ ინფორმაცია წარმოდგენილი არ ყოფილა.

კომისია აღნიშნავს, რომ კომისიის აპარატის სტრატეგიული განვითარების და კონკურენციის დეპარტამენტის უფროსმა (გ. ბუთბაია), სს ”ეგრისისგან” ინფორმაციის გამოთხოვის მიზნით, იშუამდგომლა კომისიის წინაშე ზეპირი მოსმენის სხდომის ორი კვირით გადადების თაობაზე.

კომისია აღნიშნავს, რომ კომისიის 2008 წლის 25 ივლისის №415/22 გადაწყვეტილებით ზეპირი მოსმენა გადაიდო 2008 წლის 08 აგვისტოს.

კომისია აღნიშანვს, რომ ზეპირი მოსმენის სხდომაზე არ გამოცხადებულან დაინტერესებული პირები, რის გამოც ზეპირი მოსმენა დაინიშნა 2008 წლის 5 სექტემბერს.

კომისიის აპარატის სტრატეგიული განვითარების და კონკურენციის დეპარტამენტის უფროსმა (გ. ბუთბაია) კომისიის 2008 წლის 5 სექტემბრის სხდომაზე აღნიშნა, რომ სს ”ეგრისის” მიერ წარმოსადგენია მოთხოვნილი ინფორმაცია, რის გამოც, მიზანშეწონილია ზეპირი მოსმენის სხდომის კვლავ გადადება 2008 წლის 19 სექტემბრამდე.

კომისია აღნიშნავს, რომ ავტორიზებული პირების მიერ წარმოდგენილი ინფორმაცია საჭიროებს შესაბამის დამუშავებას, აგრეთვე კვლევისა და ანალიზისათვის აუცილებელია სრული ინფორმაციის მიღება. კომისია მიზანშეწონილად მიიჩნვს სს ”ეგრისს” განესაზღვროს დამატებითი ვადა ინფორმაციის წარმოსადგენად, ხოლო კომისიის მოთხოვნის შეუსრულებლობის შემთხვევაში დაიწყოს წარმოება სს ”ეგრისის” სანქცირების მიზნით. შესაბამისად, მიზანშეწონილია შევიდეს ცვლილება კომისიის 2008 წლის 27 ივნისის №375/23 გადაწყვეტილებაში და ზეპირი მოსმენის ჩატარების თარიღად განისაზღვროს 2008 წლის 19 სექტემბერი.

საქართველოს ზოგადი ადმინისტრაციული კოდექსის 63-ე მუხლის შესაბამისად, კომისიამ, კენჭისყრის შედეგად, ერთხმად

გადაწყვიტა:

1. შევიდეს ცვლილება საქართველოს კომუნიკაციების ეროვნული კომისიის 2008 წლის 27 ივნისის №375/23 გადაწყვეტილებაში და მეოთხე პუნქტი ჩამოყალიბდეს შემდეგი რედაქციით:

”4. ზეპირი მოსმენა გაიმართოს 2008 წლის 19 სექტემბერს 12:00 საათზე, ხოლო გადაწყვეტილება მიღებულ იქნას, ზეპირი მოსმენის ჩატარებიდან 10 სამუშაო დღის განმავლობაში”;

2. გამოქვეყნდეს ცნობა ინტერნეტში კომისიის ოფიციალურ გვერდზე ინტერნეტის ქსელით საბითუმო მომსახურების ბაზრის სეგმენტზე კვლევისა და ანალიზის თაობაზე ზეპირი მოსმენის ახალი თარიღის განსაზღვრის შესახებ;

3. დაევალოთ ინტერნეტის ქსელით საბითუმო მომსახურების მიმწოდებელ ავტორიზებულ პირებს დაზუსტებული მონაცემების 2008 წლის 16 სექტემბრამდე წარმოდგენა.

4. დაევალოს სს ”ეგრისს” კომისიის მიერ მოთხოვნილი მონაცემების არაუგვიანეს 2008 წლის 16 სექტემბრამდე წარმოდგენა, ხოლო მოთხოვნილი ინფორმაციის წარმოუდგენლობის შემთხვევაში, დაიწყოს მარტივი ადმინისტრაციული წარმოება სს ”ეგრისის” სანქცირების მიზნით.

5. გადაწყვეტილების ცალკე გასაჩივრდებას არ ექვემდებარება საქართველოს ზოგადი ადმინისტრაციული კოდექსის 177-ე მუხლის მე-4 ნაწილის შესაბამისად;

6. კონტროლი აღნიშნული გადაწყვეტილების შესრულებაზე დაევალოს კომისიის აპარატის სტრატეგიული განვითარების და კონკურენციის დეპარტამენტს (გ. ბუთბაია).

7. გადაწყვეტილება ძალაშია მისი კომისიის ვებ გვერდზე გამოქვეყნების მომდევნო სამუშაო დღიდან.

კომისიის წევრი ს. ბრიტანჩუკი

კომისიის წევრი გ. ფრუიძე

კომისიის წევრი ზ. ნონიკაშვილი

კომისიის წევრი კ. კვიტაიშვილი