კონტაქტი

საქართველოს კომუნიკაციების ეროვნული კომისია (შემდგომში ,,კომისია”) აღნიშნავს, რომ ,,ელექტრონული კომუნიკაციების შესახებ” საქართველოს კანონის მე-11 მუხლის პირველი პუნქტის შესაბამისად, ელექტრონული კომუნიკაციების სფეროში კომისია დამოუკიდებლად ახორციელებს ავტორიზებული პირების საქმიანობისა და ლიცენზიის მფლობელების მიერ რადიოსიხშირული სპექტრით ან/და ნუმერაციის რესურსით სარგებლობის რეგულირებას, მათ შორის, ნორმატიული და ინდივიდუალური სამართლებრივი აქტების მიღებას, მათი შესრულების მონიტორინგსა და კონტროლს, გამოვლენილი დარღვევებისათვის ამ კანონით განსაზღვრული უფლებამოსილებების ფარგლებში, ამავე კანონითა და საქართველოს ადმინისტრაციულ სამართალდარღვევათა კოდექსით დადგენილი სანქციების დაკისრებას.

,,ელექტრონული კომუნიკაციების შესახებ” საქართველოს კანონის მე-11 მუხლის მე-3 პუნქტის “ზ” ქვეპუნქტის თანახმად, კომისია უფლებამოსილია ელექტრონული კომუნიკაციების სფეროში საქმიანობის ავტორიზებისა და რადიოსიხშირული სპექტრით ან/და ნუმერაციის რესურსით სარგებლობის ლიცენზიის პირობების დაცვაზე განახორციელოს ზედამხედველობა და მათი დარღვევისას გაატაროს კანონით გათვალისწინებული ღონისძიებები, ხოლო 43-ე მუხლის პირველი პუნქტის შესაბამისად, კომისია აკონტროლებს ავტორიზებულ პირთა მიერ ელექტრონული კომუნიკაციების სფეროში განხორციელებულ საქმიანობას, ასევე მათ მიერ ელექტრონული კომუნიკაციების სფეროში საქართველოს კანონმდებლობის, კომისიის დადგენილებებითა და გადაწყვეტილებებით განსაზღვრული მოთხოვნებისა და ვალდებულებების შესრულებას. ამავე კანონის 44-ე მუხლის პირველი პუნქტის შესაბამისად, ავტორიზებულ პირთა მიერ ელექტრონული კომუნიკაციების სფეროში საქართველოს კანონმდებლობის, მათ შორის, კომისიის დადგენილებებითა და გადაწყვეტილებებით განსაზღვრული მოთხოვნებისა და ვალდებულებების შესრულების მონიტორინგს კომისია ახორციელებს მუდმივად და სისტემატურად.

2011 წლის 9 მარტს, კომისიის აპარატის სამართლებრივ დეპარტამენტს წარმოებაში გადაეცა კომისიის აპარატის მაუწყებლობის რეგულირების დეპარტამენტის (გ. რატიშვილი, ვ. შუღლიაშვილი) 2011 წლის 7 მარტის №10/157-11 სამსახურებრივი ბარათი და 2011 წლის 22 თებერვლის №11 შემოწმების აქტი, რომელთა თანახმად, შპს ,,TV ერა” უფლების მოპოვების გარეშე ახორციელებდა მთელი რიგი სამაუწყებლო არხების საქართველოს ტერიტორიაზე არამართლზომიერ გადაცემას (ტრანზიტს).

კომისიის აპარატის მაუწყებლობის რეგულირების დეპარტამენტის 2011 წლის 7 მარტის №10/157-11 სამსახურებრივი ბარათის საფუძველზე, ,,საქართველოს კომუნიკაციების ეროვნული კომისიის საქმიანობის მარეგულირებელი წესების” 36-ე მუხლის მე-14 პუნქტის შესაბამისად, 2011 წლის 9 მარტს კომისიაში დაიწყო მარტივი ადმინისტრაციული წარმოება შპს ,,TV ერას” სანქცირების თაობაზე, ხოლო საკითხის განხილვა დაინიშნა 2011 წლის 18 მარტს, რის თაობაზეც შპს ,,TV ერას” ეცნობა დაზღვეული საფოსტო გზავნილით გაგზავნილი შეტყობინებით და მოწვეულ იქნა ადმინისტრაციულ წარმოებაში მონაწილეობის მისაღებად. მას, ასევე განემარტა საქართველოს ზოგადი ადმინისტრაციული კოდექსის 98-ე და 99-ე მუხლებით გათვალისწინებული მტკიცებულებებისა და შუამდგომლობების წარმოდგენის, აგრეთვე საქმის გარემოებათა გამოკვლევისა და ადმინისტრაციული წარმოების მასალების გამოთხოვის უფლება.

კომისია აღნიშნავს, რომ 2011 წლის 17 მარტს, კომისიას განცხადებით მიმართა შპს ,, TV ერას” დირექტორმა მ.მეტრეველმა, რომელმაც ითხოვა შპს ,,TV ერას” სანქცირების საკითხის განხილვის გადადება ,,ობიექტური და სუბიექტური მიზეზების გამო” 2011 წლის 25 მარტისთვის.

2011 წლის 18 მარტის კომისიის სხდომაზე, კომისიამ დააკმაყოფილა შპს ,,TV ერას” განცხადება და მისთვის ადმინისტრაციული პასუხისმგებლობის დაკისრების საკითხის განხილვა გადადო 2011 წლის 25 მარტისთვის, რათა შპს ,, TV ერასთვის” მიეცა საშუალება მონაწილეობა მიეღო ადმინისტრაციულ წარმოებაში და დაეცვა მისი ინტერესები.

კომისია აღნიშნავს, რომ საკითხის განხილვის გადადების შესახებ შეტყობინება დაზღვეული საფოსტო გზავნილით გაეგზავნა შპს ,,TV ერას” და მოწვეულ იქნა ადმინისტრაციულ წარმოებაში მონაწილეობის მისაღებად. მას, ასევე განემარტა საქართველოს ზოგადი ადმინისტრაციული კოდექსის 98-ე და 99-ე მუხლებით გათვალისწინებული მტკიცებულებებისა და შუამდგომლობების წარმოდგენის, აგრეთვე, საქმის გარემოებათა გამოკვლევისა და ადმინისტრაციული წარმოების მასალების გამოთხოვის უფლება.

კომისია აღნიშნავს, რომ კომისიის 2011 წლის 25 მარტის კომისიის სხდომაზე შპს ,,TV ერას” წარმომადგენელი არ გამოცხადდა და არც შუამდგომლობით მიუმართავს კომისიისათვის სხდომის გადადების თაობაზე. შპს ,,საქართველოს ფოსტის” მიერ კომისიაში წარმოდგენილი დოკუმენტით ირკვევა, რომ შპს ,,TV ერას” თანამშრომელმა გრიგოლიამ, შპს ,,TV ერას” იურიდიულ მისამართზე: ქ.ბათუმი, ერას ქ.№ 17, არ ჩაიბარა კომისიის მიერ დაზღვეული საფოსტო გზავნილით გაგზავნილი შეტყობინება კომისიის სხდომის ჩატარების თაობაზე, იმ საფუძვლით, რომ უფროსი არ იყო ადგილზე, ხოლო ის არ იყო უფლებამოსილი წერილის მიღებაზე.

კომისია აღნიშნავს, რომ ავტორიზებული პირი ვალდებულია მის მიერ მითითებულ და მეწარმეთა და არასამეწარმეო იურიდიული პირების რეესტრში და კომისიაში დაცული ავტორიზებულ პირთა უწყებრივი რეესტრის მონაცემებში დაფიქსირებულ იურიდიულ მისამართზე (ქ.ბათუმი, ერას ქ.№ 17), უზრუნველყოს (კანცელარიის ან ასეთივე დანიშნულების სტრუქტურულ ერთეულის შექმნის ანდა პირის განსაზღვრის გზით და ა.შ.) მისთვის გაგზავნილი კორესპონდენციის, მათ შორის შეტყობინების მიღება სამუშაო საათებში, მიუხედავად იმისა ადგილზე იმყოფება თუ არა ხელმძღვანელი. ამასთან, შპს ,,TV ერასთვის” ცნობილი იყო კომისიაში მიმდინარე ადმინისტრაციული წარმოების შესახებ მისი სანქცირების თაობაზე, რაც დასტურდება შპს ,,TV ერას” 2011 წლის 17 მარტის განცხადებით, რომლითაც მან მოითხოვა მისი საკითხის განხილვის გადადება 2011 წლის 25 მარტისთვის. ამავე დროს, კომისიის ოფიციალურ ვებ-გვერდზე წინასწარ გამოქვეყნებული იყო კომისიის 2011 წლის 25 მარტის დღის წესრიგი, სადაც ერთ-ერთ საკითხად მითითებული იყო შპს ,,TV ერას” სანქცირების საკითხი. შესაბამისად, კომისიას მიაჩნია, რომ შპს ,,TV ერას” დაინტერესების შემთხვევაში, მას საშუალება ჰქონდა მიეღო მონაწილეობა მისი საკითხის განხილვაში. ამდენად, კომისიას მიიჩნია, რომ მან სრულად შეასრულა საქართველოს ზოგადი ადმინისტრაციული კოდექსის 95-ე მუხლის მე-2 ნაწილით განსაზღვრული ვალდებულება და ის უფლებამოსილია განიხილოს შპს ,,TV ერასთვის” ადმინისტრაციული პასუხისმგებლობის დაკისრების საკითხი.

კომისიის სხდომაზე, კომისიის მიერ გამოკვლეულ, ურთიერთშეჯერებულ და შეფასებულ იქნა შემდეგი მტკიცებულებები:

1. კომისიის აპარატის მაუწყებლობის რეგულირების დეპარტამენტის 2011 წლის 7 მარტის №10/157-11 სამსახურებრივი ბარათი;

2. კომისიის აპარატის მაუწყებლობის რეგულირების დეპარტამენტის 2011 წლის 22 თებერვლის №11 შემოწმების აქტი თანდართული მასალებით (აუდიო-ვიზუალური ჩანაწერი - CD, ქვითრებისა და პირადობების მოწმობების ასლები);

3. მეწარმეთა და არასამეწარმეო იურიდიული პირების რეესტრისა და კომისიაში დაცული ავტორიზებულ პირთა უწყებრივი რეესტრის მონაცემები;

4. შპს ,,TV ერა”-სთვის გაგზავნილი კომისიის 2009 წლის 22 ივნისისა და 2010 წლის 16 ივნისის წერილები მის მიერ საქართველოს ტერიტორიაზე სამაუწყებლო არხების გავრცელების უფლებამოსილების დამადასტურებელი ხელშეკრულებების წარმოდგენის თაობაზე;

5. კომისიაში დაცული და შპს ,,TV ერას” მიერ კომისიაში წარმოდგენილი ხელშეკრულება (1.01.2011) სამაუწყებლო არხების საკაბელო ქსელით გავრცელების უფლების მოპოვების თაობაზე.

ზემოაღნიშნული მტკიცებულებების შეფასებისა და გამოკვლევის საფუძველზე კომისიის მიერ დადგენილ იქნა შემდეგი ფაქტობრივი გარემოებები:

1. შპს ,,TV ერა” არის ავტორიზებული პირი (ავტორიზაციის თარიღი 31.05.06., ავტორიზებული საქმიანობის სახე - ადგილობრივი დაშვების (სადენიანი) ქსელითა და/ან (სადენიანი) ქსელის ტერმინალური საშუალებებით უზრუნველყოფა), რომელიც ,,ელექტრონული კომუნიკაციების შესახებ” საქართველოს კანონის მე-2 მუხლის ჰ45 პუნქტის შესაბამისად, უნდა ახორციელებდეს მაუწყებლისაგან კანონიერ საფუძველზე მიღებული სამაუწყებლო არხების უცვლელი სახით გადაცემას და ბოლო მომხმარებლისათვის საერთო სარგებლობის ელექტრონული საკომუნიკაციო ქსელებისა და საშუალებების გამოყენებით მიწოდებას;

2. შპს ,,TV ერას” საქართველოს ტერიტორიაზე სამაუწყებლო არხების უცვლელი სახით გადაცემის უფლება მოპოვებული უნდა ჰქონდეს ,,საავტორო და მომიჯნავე უფლებების შესახებ” საქართველოს კანონის შესაბამისად, საავტორო ან მომიჯნავე (მათ შორის ექსკლუზიური) უფლების მფლობელთან დადებული ხელშეკრულების საფუძველზე;

3. 2011 წლის 22 თებერვალს, 20:01 საათზე, შპს ,,TV ერას” აბონენტ თეიმურაზ სიხარულიძის (პირ. მოწმ. № 61001015559) ბინაში, მისამართზე: ქ. ბათუმი, რუსთაველის ქ. №11, ბინა №16, კომისიის აპარატის მაუწყებლობის რეგულირების დეპარტამენტის უფროსის გ. რატიშვილის მიერ, ამავე დეპარტამენტის სპეციალისტ ვ. შუღლიაშვილის მონაწილეობითა და შპს ,,TV ერას” აბონენტ თეიმურაზ სიხარულიძისა და მოწმე ინგა ღლონტის (პირ. მოწმ. № 61001015562); თანდასწრებით განხორციელდა შპს ,,TV ერას” მიერ სამაუწყებლო არხების საქართველოს ტერიტორიაზე გადაცემის მართლზომიერების შემოწმება, რის თაობაზეც გაფორმდა შემოწმების აქტი №11. შემოწმების აქტს ხელს აწერენ: კომისიის აპარატის მაუწყებლობის რეგულირების დეპარტამენტის უფროსი გ. რატიშვილი, ამავე დეპარტამენტის სპეციალისტი ვ. შუღლიაშვილი, შპს ,,TV ერას” აბონენტი თეიმურაზ სიხარულიძე და შემოწმებისა და შემოწმების აქტის შედგენის დამსწრე მოწმე ინგა ღლონტი;

4. შემოწმების შედეგად დაფიქსირდა, რომ შპს ,,TV ერა” საკუთარი საკაბელო ქსელით ავრცელებს შემდეგ სამაუწყებლო არხებს: ,,SHOW”, ,,IНТЕР +”, ,,KАРУСЕЛЬ”, ,,NATIONAL GEOGRAPIC”, ,,DISCOVERY”, ,,TV 25”, ,,საქართველო”, ,,DISNEY CHANNEL”, ,,EURONEWS”, ,,РОССИЯ К”, ,,FASHION”, ,,НОВОЕ КИНО”, ,,ANIMAL PLANET”, ,,DW”, ,,აჭარის ტელევიზია”, ,,RTVI”, ,,რუსთავი 2”, ,,იმედი”, ,,საზოგადოებრივი მაუწყებლობის პირველი არხი”, ,,ОХОТА И PЫБАЛКА”, ,,TV1000”, ,,TV ერა”, ,,DIVA UNIVERSAL”, ,,ONLINE”, ,,THT”, ,,CTC”, ,,ДОМАШНЫЙ”, ,,ДТВ”, ,,КИНОХИТ”, ,,ПРЕМЬЕРА”, ,,МОЯ ПЛАНЕТА”, ,,HISTORY”, ,,РOССИЯ2”, ,,EUROSPORT”, ,,НТВ + ТЕННИС”, ,,ZONE ROMANTICA”, ,,КУХНЯ ТВ”, ,,ИНДИЯ”, ,,НТВ + ФУТБОЛ”, ,,BBC”, ,,TV 3”, ,,RU TV”, ,,ИЛЛЮЗИОН”, ,,TV1000 ACTION”, ,,TB ШАНСОН”, ,,ПИК”;

5. შემოწმების შედეგების სისწორე დასტურდება 2011 წლის 22 თებერვლის №11 შემოწმების აქტით, აუდიო-ვიზუალური ჩანაწერით (CD), შემოწმებაზე დამსწრე პირების ხელმოწერით, სააბონენტო გადასახადის გადახდის ქვითრებითა და პირადობის მოწმობების მონაცემებით;

6. კომისიის აპარატის მაუწყებლობის რეგულირების დეპარტამენტის 2011 წლის 22 თებერვლის №11 შემოწმების აქტი შედგენილია ,,საქართველოს კომუნიკაციების ეროვნული კომისიის საქმიანობის მარეგულირებელი წესების” 36-ე მუხლით გათვალისწინებული მოთხოვნების შესაბამისად;

7. შპს ,,TV ერას” კომისიაში არა აქვს წარმოდგენილი ხელშეკრულებები სამაუწყებლო არხების: ,,SHOW”, ,,IНТЕР +”, ,,KАРУСЕЛЬ”, ,,TV 25”, ,,РОССИЯ К”, ,,НОВОЕ КИНО”, ,,TV1000”, ,,DIVA UNIVERSAL”, ,,THT”, ,,CTC”, ,,ДОМАШНЫЙ”, ,,ДТВ”, ,,КИНОХИТ”, ,,ПРЕМЬЕРА”, ,,HISTORY”, ,,РOССИЯ2”, ,,EUROSPORT”, ,,ZONE ROMANTICA”, ,,НТВ + ФУТБОЛ”, ,,BBC”, ,,TV 3”, ,,RU TV”, ,,TV1000 ACTION”, ,,МОЯ ПЛАНЕТА” საქართველოს ტერიტორიაზე უცვლელი სახით გადაცემის მოპოვების თაობაზე;

8. შპს ,,TV ერას” მიმართ ბოლო ერთი წლის განმავლობაში ,,ელექტრონული კომუნიკაციების შესახებ” საქართველოს კანონის 45-ე მუხლით გათვალისწინებული პასუხისმგებლობის არც ერთი სახე გამოყენებული არ ყოფილა.

,,ელექტრონული კომუნიკაციების შესახებ” საქართველოს კანონის მე-3 მუხლის პირველი პუნქტის თანახმად, საქართველოს ელექტრონული კომუნიკაციების სფეროში საქმიანობის ორგანიზებისა და ურთიერთობების რეგულირების საფუძველია საქართველოს კონსტიტუცია, საქართველოს საერთაშორისო ხელშეკრულებები და შეთანხმებები, ეს კანონი და სხვა ნორმატიული აქტები.

,,ლიტერატურისა და მხატვრული ნაწარმოებების დაცვის შესახებ” ბერნის კონვენციასთან (რატიფიცირებულია საქართველოს პარლამენტის 1994 წლის 24 ნოემბრის №609 დადგენილებით), ,,საავტორო უფლებების შესახებ” 1996 წლის 20 დეკემბერის ინტელექტუალური საკუთრების მსოფლიო ორგანიზაციის ხელშეკრულებასთან (რატიფიცირებულია საქართველოს პარლამენტის 2001 წლის 23 მაისის № 879 დადგენილებით) და ,,შემსრულებლების, ფონოგრამების, დამამზადებლების და მაუწყებლობის ორგანიზაციების უფლებათა დაცვის შესახებ” რომის 1961 წლის კონვენციასთან მიერთებით (რატიფიცირებულია საქართველოს პარლამენტის 2004 წლის 17 თებერვლის № 3344 დადგენილებით), საქართველომ იკისრა ვალდებულება დაიცვას საავტორო და მომიჯნავე უფლებები და გაატაროს ამ ხელშეკრულებების გამოყენების უზრუნველსაყოფად აუცილებელი ღონისძიებანი.

,,ელექტრონული კომუნიკაციების შესახებ” საქართველოს კანონის მე-19 მუხლის მე-2 პუნქტის “ბ” ქვეპუნქტის შესაბამისად, ავტორიზებული პირი ვალდებულია შეასრულოს ელექტრონული კომუნიკაციების სფეროში საქართველოს კანონმდებლობა, მათ შორის, კომისიის დადგენილებები და გადაწყვეტილებები.

,,ელექტრონული კომუნიკაციების შესახებ” საქართველოს კანონის მე-2 მუხლის ჰ45 პუნქტის შესაბამისად, მაუწყებლობის ტრანზიტი არის ავტორიზებადი საქმიანობა, რომელიც მოიცავს პირის მიერ მაუწყებლისაგან კანონიერ საფუძველზე მიღებული ტელე-ან რადიოარხის უცვლელი სახით (ტელე-ან რადიოპროგრამებში სარედაქციო ცვლილებების შეტანის გარეშე) გადაცემასა და ბოლო მომხმარებლისათვის მიწოდებას საერთო სარგებლობის ელექტრონული საკომუნიკაციო ქსელებისა და საშუალებების გამოყენებით. უცვლელი სახით გადაცემაში იგულისხმება ის შემთხვევაც, როცა სამაუწყებლო ბადეში ცვლილების მიუხედავად კომისია მიიჩნევს, რომ არსებითად ხორციელდება მაუწყებლის ტელე- ან რადიოარხის ტრანზიტი.

,,საავტორო და მომიჯნავე უფლებების შესახებ” საქართველოს კანონის მე-4 მუხლის ი1) ქვეპუნქტის შესაბამისად, კაბელით ხელახალი გადაცემა არის სადენით ან საჰაერო გზით, სატელიტური კავშირის ჩათვლით, საზოგადოებისთვის განკუთვნილი ტელე და რადიოპროგრამების საწყისი გადაცემის ერთდროულად, შეუწყვეტლად და შეუკვეცავად ხელახალი გადაცემა კაბელით ან მიკროტალღური სისტემის მეშვეობით. ამავე მუხლის ჟ) ქვეპუნქტის თანახმად, საჯარო გადაცემა არის ნაწარმოების, შესრულების, ფონოგრამის, ვიდეოგრამის, მონაცემთა ბაზის, მაუწყებლობის ორგანიზაციის გადაცემის გამოსახულების ან/და ხმის გადაცემა ეთერში, კაბელით ან სხვა საშუალებით (გარდა ნაწარმოების ან ფონოგრამის ასლების გავრცელებისა) ისე, რომ გადაცემის გამოსახულება ან/და ხმა შესაძლებელია აღიქვან პირებმა, რომლებიც არ მიეკუთვნებიან ოჯახის ან ოჯახის ახლობელთა წრეს, იმ ადგილზე (ადგილებზე), რომელიც იმდენადაა დაშორებული გადაცემის ადგილიდან, რომ ასეთი გადაცემის გარეშე გამოსახულება ან/და ხმა არ შეიძლება აღქმულ იქნას მიღების ადგილზე (ადგილებზე), მათ შორის, გადაიცეს ისე, რომ საავტორო ან მომიჯნავე უფლების ობიექტები, მონაცემთა ბაზები ხელმისაწვდომი იყოს ნებისმიერი პირისათვის მის მიერ არჩეულ დროს და ადგილიდან.

,,ლიტერატურული და მხატვრული ნაწარმოებების დაცვის ბერნის კონვენციის მე-11bis მუხლისა და ისმო-ს საავტორო უფლებების შესახებ ხელშეკრულების მე-8 მუხლის თანახმად, ავტორები, სარგებლობენ განსაკუთრებული უფლებებით დართონ თავისი ნაწარმოებების საყოველთაოდ გაცნობისათვის საჯარო გადაცემის უფლება სადენებითა და კავშირგაბმულობის უმავთულო საშუალებებით. შესაბამისად, ხელშეკრულებები იცავენ რა ავტორის უფლებას ნაწარმოებთან დაკავშირებით, ამ ნორმის გამოყენებისათვის აუცილებელია ნაწარმოების საჯაროდ გადაცემა და არა ნაწარმოების საშუალებები და ხერხები. ბერნის კონვენციისა და ისმო-ს ხელშეკრულების აღნიშნულ დანაწესთან სრულ თანხმობაშია ,,საავტორო და მომიჯნავე უფლებების შესახებ“ საქართველოს კანონი, რომლის მე-18 მუხლის მე-2 პუნქტის ,,ვ” ქვეპუნქტით ავტორს ან საავტორო უფლების სხვა მფლობელს აქვს ნაწარმოების გამოყენების განსაკუთრებული უფლება, რაც ნიშნავს უფლებას, განახორციელოს, ნება დართოს ან აკრძალოს: ნაწარმოების საჯარო გადაცემა, პირველი ან/და ხელახალი გადაცემის ჩათვლით; აგრეთვე ნაწარმოების გადაცემა სადენით ანდა უმავთულო კავშირგაბმულობის მეშვეობით ისე, რომ ის ხელმისაწვდომი იყოს ნებისმიერი პირისათვის მის მიერ არჩეულ დროს და ადგილიდან (საჯარო გადაცემის უფლება). „საავტორო და მომიჯნავე უფლებების შესახებ“ საქართველოს კანონის 37-ე და 38-ე მუხლების შესაბამისად, ნაწარმოების ნებისმიერი ფორმით გამოყენება ან ამ უფლების სხვა პირისათვის გადაცემა ავტორის განსაკუთრებული, ექსკლუზიური უფლებაა და ინტელექტუალურ სამართალში იგი პრეზუმირებულ ფაქტს წარმოადგენს. ,,შემსრულებლების, ფონოგრამების, დამამზადებლების და მაუწყებლობის ორგანიზაციების უფლებათა დაცვის შესახებ” რომის 1961 წლის კონვენციის მე-13 მუხლის შესაბამისად, მაუწყებლობის ორგანიზაციას უფლება აქვს ნება დართოს ან აკრძალოს თავისი გადაცემების რეტრანსლაცია. ,,საავტორო და მომიჯნავე უფლებების შესახებ” საქართველოს კანონის 50-ე მუხლის პირველი პუნქტის შესაბამისად, მაუწყებლობის ორგანიზაციას ეკუთვნის განსაკუთრებული უფლება, რაც ამავე მუხლის მე-2 პუნქტის შესაბამისად, ნიშნავს, ნება დართოს ან აკრძალოს გადაცემის გადაცემა ეთერში ან კაბელში. ამავე კანონის 51-ე მუხლის შესაბამისად, დაუშვებელია მაუწყებლის ორგანიზაციის გადაცემის გამოყენება მისი თანხმობის გარეშე. ამავე კანონის 58-ე მუხლის მე-2 პუნქტის შესაბამისად, პირი რომელიც არ ასრულებს ამ კანონის მოთხოვნებს, ითვლება საავტორო და მომიჯნავე უფლებების დამრღვევად, რაც იწვევს სამოქალაქო, ადმინისტრაციულ და სისხლის-სამართლებრივ პასუხისმგებლობას. ამავე კანონის 58-ე მუხლი ითვალისწინებს პასუხისმგებლობას საავტორო და მომიჯნავე უფლებების დარღვევისათვის.

ყოველივე ზემოაღნიშნულიდან გამომდინარე, კომისიას მიაჩნია, რომ საქართველოს ტერიტორიაზე სამაუწყებლო არხების: ,,SHOW”, ,,IНТЕР +”, ,,KАРУСЕЛЬ”, ,,TV 25”, ,,РОССИЯ К”, ,,НОВОЕ КИНО”, ,,TV1000”, ,,DIVA UNIVERSAL”, ,,THT”, ,,CTC”, ,,ДОМАШНЫЙ”, ,,ДТВ”, ,,КИНОХИТ”, ,,ПРЕМЬЕРА”, ,,HISTORY”, ,,РOССИЯ2”, ,,EUROSPORT”, ,,ZONE ROMANTICA”, ,,НТВ + ФУТБОЛ”, ,,BBC”, ,,TV 3”, ,,RU TV”, ,,TV1000 ACTION”, ,,МОЯ ПЛАНЕТА” შესაბამისი ხელშეკრულებების გარეშე უცველელი სახით გადაცემით შპს ,,TV ერას” მიერ დაირღვა ,,ლიტერატურული და მხატვრული ნაწარმოებების დაცვის ბერნის კონვენციის მე-11bis მუხლი, ისმო-ს საავტორო უფლებების შესახებ ხელშეკრულების მე-8 მუხლი, ,,შემსრულებლების, ფონოგრამების, დამამზადებლების და მაუწყებლობის ორგანიზაციების უფლებათა დაცვის შესახებ” რომის 1961 წლის კონვენციის მე-13 მუხლი, ,,საავტორო და მომიჯნავე უფლებების შესახებ“ საქართველოს კანონის მე-18 მუხლის მე-2 პუნქტის ,,ვ” ქვეპუნქტი, 37-ე, 38-ე, 50-ე, 51-ე მუხლები და ”ელექტრონული კომუნიკაციების შესახებ” საქართველოს კანონის მე-19 მუხლის მე-2 პუნქტის ბ) ქვეპუნქტი.

„ელექტრონული კომუნიკაციების შესახებ“ საქართველოს კანონის 45-ე მუხლის პირველი პუნქტის შესაბამისად, ავტორიზებული პირის მიერ ელექტრონული კომუნიკაციების სფეროში საქართველოს კანონმდებლობის, მათ შორის, კომისიის დადგენილებებითა და გადაწყვეტილებებით განსაზღვრული მოთხოვნებისა და ვალდებულებების დარღვევის ან/და ლიცენზიის მფლობელის მიერ სალიცენზიო პირობების დარღვევის შემთხვევაში კომისია უფლებამოსილია დამრღვევი წერილობით გააფრთხილოს, ხოლო დენადი ხასიათის დარღვევის კომისიის გადაწყვეტილებით განსაზღვრულ ვადაში აღმოუფხვრელობის ან ერთი წლის განმავლობაში ახალი ერთჯერადი ხასიათის დარღვევის ჩადენის შემთხვევაში დააკისროს ჯარიმა. აქედან გამომდინარე, ვინაიდან შპს ,,TV ერას” მიმართ ბოლო ერთი წლის განმავლობაში „ელექტრონული კომუნიკაციების შესახებ“ საქართველოს კანონის 45-ე მუხლით გათვალისწინებული პასუხისმგებლობის არც ერთი სახე გამოყენებული არ ყოფილა, ის ამ მუხლის პირველი პუნქტის შესაბამისად უნდა გაფრთხილდეს.

კომისია აღნიშნავს, რომ სამართალდარღვევის აღმოფხვრის მიზნით, შპს ,,TV ერას” ამავდროულად უნდა აეკრძალოს საქართველოს ტერიტორიაზე სატელევიზიო არხების: ,,SHOW”, ,,IНТЕР +”, ,,KАРУСЕЛЬ”, ,,TV 25”, ,,РОССИЯ К”, ,,НОВОЕ КИНО”, ,,TV1000”, ,,DIVA UNIVERSAL”, ,,THT”, ,,CTC”, ,,ДОМАШНЫЙ”, ,,ДТВ”, ,,КИНОХИТ”, ,,ПРЕМЬЕРА”, ,,HISTORY”, ,,РOССИЯ2”, ,,EUROSPORT”, ,,ZONE ROMANTICA”, ,,НТВ + ФУТБОЛ”, ,,BBC”, ,,TV 3”, ,,RU TV”, ,,TV1000”, ,,ACTION”, ,,МОЯ ПЛАНЕТА” არამართლზომიერი გადაცემა.

კომისია დამატებით აღნიშნავს, რომ ადმინისტრაციული წარმოების პროცესში წარმოდგენილი მასალების საფუძველზე გამოკვლეულ იქნა შპს ,,TV ერას” მიერ საკუთარი საკაბელო ქსელის მეშვეობით გადაცემული სამაუწყებლო არხების საქართველოს ტერიტორიაზე რეტრანსლირებაზე გაფორმებული ხელშეკრულებების არსებობისა და კომისიაში წარმოდგენის ფაქტი. კომისიას არ უმსჯელია, შპს ,,TV ერას” მიერ კომისიაში წარმოდგენილ სხვა სამაუწყებლო არხების რეტრანსლირებასთან დაკავშირებით გაფორმებული ხელშეკრულებების ნამდვილობასა და კანონიერებაზე, კერძოდ, არ გამოუკვლევია, სამაუწყებლო არხების დისტრიბუტორი/დილერი კომპანიების მიერ, სამაუწყებლო არხების საქართველოს ტერიტორიაზე რეტრანსლირების უფლების გადაცემა შპს ,,TV ერასთვის” მართლზომიერად განხორციელდა თუ არა.

ყოველივე ზემოაღნიშნულის გათვალისწინებით, საქართველოს ზოგადი ადმინისტრაციული კოდექსის მე-2 მუხლის ლ) ქვეპუნქტის, მე-4, 98-ე, 99-ე, საქართველოს კომუნიკაციების ეროვნული კომისიის მარეგულირებელი წესების მე-4 მუხლის პირველი პუნქტის ბ) ქვეპუნქტის, მე-6 მუხლის ბ) ქვეპუნქტისა და 36-ე მუხლის მე-14 პუნქტის, “ელექტრონული კომუნიკაციების შესახებ” საქართველოს კანონის მე-11 მუხლის პირველი და მე-3 პუნქტების, მე-19 მუხლის მე-2 პუნქტის “ბ” ქვეპუნქტის, 43-ე და 44-ე მუხლების, ,,საავტორო და მომიჯნავე უფლებების შესახებ” საქართველოს კანონის მე-18 მუხლის მე-2 პუნქტის ,,ვ” ქვეპუნქტის, 37-ე, 38-ე, 50-ე, 51-ე მუხლების, ,,ლიტერატურული და მხატვრული ნაწარმოებების დაცვის ბერნის კონვენციის მე-11bis მუხლის, ისმო-ს საავტორო უფლებების შესახებ ხელშეკრულების მე-8 მუხლის, ,,შემსრულებლების, ფონოგრამების, დამამზადებლების და მაუწყებლობის ორგანიზაციების უფლებათა დაცვის შესახებ” რომის 1961 წლის კონვენციის მე-13 მუხლის, შესაბამისად, კომისიამ, კენჭისყრის შედეგად, ერთხმად

გადაწყვიტა:

1. შპს ,,TV ერას” მიეცეს გაფრთხილება ,,ლიტერატურული და მხატვრული ნაწარმოებების დაცვის ბერნის კონვენციის მე-11bis მუხლის, ისმო-ს საავტორო უფლებების შესახებ ხელშეკრულების მე-8 მუხლის, ,,შემსრულებლების, ფონოგრამების, დამამზადებლების და მაუწყებლობის ორგანიზაციების უფლებათა დაცვის შესახებ” რომის 1961 წლის კონვენციის მე-13 მუხლის, ,,საავტორო და მომიჯნავე უფლებების შესახებ“ საქართველოს კანონის მე-18 მუხლის მე-2 პუნქტის ,,ვ” ქვეპუნქტის, 37-ე, 38-ე, 50-ე, 51-ე მუხლებისა და ”ელექტრონული კომუნიკაციების შესახებ” საქართველოს კანონის მე-19 მუხლის მე-2 პუნქტის ბ) ქვეპუნქტის დარღვევის გამო;

2. შპს ,,TV ერამ” უზრუნველყოს საქართველოს ტერიტორიაზე სატელევიზიო არხების: ,,SHOW”, ,,IНТЕР +”, ,,KАРУСЕЛЬ”, ,,TV 25”, ,,РОССИЯ К”, ,,НОВОЕ КИНО”, ,,TV1000”, ,,DIVA UNIVERSAL”, ,,THT”, ,,CTC”, ,,ДОМАШНЫЙ”, ,,ДТВ”, ,,КИНОХИТ”, ,,ПРЕМЬЕРА”, ,,HISTORY”, ,,РOССИЯ2”, ,,EUROSPORT”, ,,ZONE ROMANTICA”, ,,НТВ + ФУТБОЛ”, ,,BBC”, ,,TV 3”, ,,RU TV”, ,,TV1000 ACTION”, ,,МОЯ ПЛАНЕТА” არამართლზომიერი გადაცემის დაუყოვნებლივ შეწყვეტა;

3. დაევალოს კომისიის აპარატის ადმინისტრაციულ დეპარტამენტს (ნ. ჯავახიძე) აღნიშნული გადაწყვეტილების შპს ,,TV ერასთვის” დაუყოვნებლივ გაგზავნა;

4. გადაწყვეტილება შეიძლება გასაჩივრდეს ქ.თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ. თბილისი, დ.აღმაშენებლის ხეივანი მე-12 კმ, №6) ერთი თვის ვადაში;

5. გადაწყვეტილება ძალაში შედის გადაწყვეტილების დამოწმებული ასლის შპს ,,TV ერასთვის” ჩაბარების დღიდან;

6. კონტროლი აღნიშნული გადაწყვეტილების მე-2 პუნქტის შესრულებაზე დაევალოს კომისიის აპარატის მაუწყებლობის რეგულირების დეპარტამენტს (გ. რატიშვილი);

7. კონტროლი აღნიშნული გადაწყვეტილების შესრულებაზე (მე-2 პუნქტის გარდა) დაევალოს კომისიის აპარატის სამართლებრივ დეპარტამენტს (კ. ყურაშვილი).

კომისიის თავმჯდომარე ირაკლი ჩიქოვანი

კომისიის წევრი სოფიო ბრიტანჩუკი

კომისიის წევრი კარლო კვიტაიშვილი

კომისიის წევრი აკაკი სიხარულიძე

კომისიის წევრი ირაკლი მოსეშვილი