კონტაქტი

შპს ”TV კვირიკეს”კერძო მაუწყებლობის №B133 ლიცენზიის მოდიფიცირებისა და კომისიის 2012 წლის 24 დეკემბრის №818/1 გადაწყვეტილებაში ცვლილების შეტანის თაობაზე

საქართველოს კომუნიკაციების ეროვნული კომისია (შემდგომში „კომისია“) აღნიშნავს, რომ კომისიას განცხადებით (კომისიაში რეგისტრაციის №7/525-12, 03.10.2012წ.) მიმართა შპს ”TV კვირიკემ” კუთვნილი კერძო მაუწყებლობის №B133 ლიცენზიის მოდიფიცირების მოთხოვნით. კერძოდ, კომპანიას სურს სპეციალიზებული მაუწყებლობის ლიცენზიის მოდიფიცირება საერთო მაუწყებლობის ლიცენზიად; განცხადებაში აღნიშნულია, რომ ვინაიდან დღევანდელი სიტუაციიდან გამომდინარე საზოგადოების მოთხოვნა უფრო მეტად არის საინფორმაციო და საზოგადოებრივ-პოლიტიკური გადაცემები, კომპანია მიიჩნევს, რომ მოდიფიცირების შემდგომ გაიზრდება ტელემაყურებელთა რაოდენობა და კომპანიის სარეკლამო შემოსავლები.

კომისია აღნიშნავს, რომ შპს ”TV კვირიკე” ფლობს კერძო მაუწყებლობის №B133 ლიცენზიას კომისიის 2012 წლის 24 დეკემბრის №818/1 გადაწყვეტილებით განსაზღვრული შემდეგი სალიცენზიო პირობებით:

ა) ლიცენზიის სახე: კერძო მაუწყებლობა;

ბ) ლიცენზიის სახეობა: სპეციალიზებული (შემეცნებითი) ტელემაუწყებლობა;

გ) ლიცენზიის მოქმედების ვადა: 2022 წლის 24 დეკემბრამდე;

დ) მაუწყებლობის ტექნიკური პარამეტრები და გავრცელების გეოგრაფიული ზონა: ტელემაუწყებლობა თანამგზავრული სისტემების მიწისზედა და ორბიტალური სადგურების გამოყენებით - საქართველოს ტერიტორიაზე;

კომისია აღნიშნავს, რომ „მაუწყებლობის შესახებ“ საქართველოს კანონის 45-ე მუხლის პირველი პუნქტის შესაბამისად, ლიცენზიის მოდიფიცირების საფუძველი შეიძლება იყოს:

ა) საქართველოს კანონმდებლობაში ან მაუწყებლობის სფეროს პრიორიტეტებში ცვლილებების ან/და დამატებების შეტანა;

ბ) კომისიის ან ლიცენზიის მფლობელის დასაბუთებული მოთხოვნა ლიცენზიაში ცვლილებების ან/და დამატებების შეტანის თაობაზე.

ზემოაღნიშნულიდან გამომდინარე კომისიას მიაჩნია, რომ სახეზეა ”მაუწყებლობის შესახებ” საქართველოს კანონის 45-ე მუხლის პირველი პუნქტის ბ) ქვეპუნქტით გათვალისწინებული შემთხვევა: ლიცენზიის მფლობელის დასაბუთებული მოთხოვნა ლიცენზიაში ცვლილებების ან/და დამატებების შეტანის თაობაზე.

კომისია აღნიშნავს, რომ კომისიის 2013 წლის 4 ოქტომბერს №609/23 გადაწყვეტილებით დაიწყო საჯარო ადმინისტრაციული წარმოება შპს ”TV კვირიკეს” კერძო მაუწყებლობის №B133 ლიცენზიის მოდიფიცირების თაობაზე.

საკითხის ზეპირი მოსმენა გაიმართა 2013 წლის 4 ნოემბერს 16:00 საათზე. სხდომაზე აღინიშნა, რომ კერძო მაუწყებლობის №B133 ლიცენზიის სალიცენზიო ვალდებულებები გაწერილია სპეციალიზებული ტელემაუწყებლობისთვის, შესაბამისად კომისიას მიაჩნია, რომ მიზანშეწონილია ცვლილებების განხორციელება კერძო მაუწყებლობის №B133 ლიცენზიით განსაზღვრულ სალიცენზიო ვალდებულებებში და აღნიშნული სალიცენზიო ვალდებულებების შესაბამისობაში მოყვანა ლიცენზიის სახეობასთან. გამომდინარე იქიდან, რომ ზეპირი მოსმენისას არ გამოვლენილა შპს ”TV კვირიკეს” კერძო მაუწყებლობის №B133 ლიცენზიის მოდიფიცირების დამაბრკოლებელი გარემოებები, კომისიას მიზანშეწონილად მიაჩნია ზეპირი მოსმენის სხდომაზევე მიიღოს გადაწყვეტილება ზემოაღნიშნული ლიცენზიის მოდიფიცირებისა და კომისიის 2012 წლის 24 დეკემბრის №818/1 გადაწყვეტილებაში ცვლილების შეტანის შესახებ.

ყოველივე ზემოაღნიშნულის გათვალისწინებით, კომისიამ ,,მაუწყებლობის შესახებ” საქართველოს კანონის 38-ე მუხლის მე-4 პუნქტის, 45-ე მუხლის პირველი პუნქტის ბ) ქვეპუნქტის, საქართველოს ზოგადი ადმინისტრაციული კოდექსის 63-ე მუხლისა და IX თავის შესაბამისად, კენჭისყრის შედეგად, ერთხმად

გადაწყვიტა:

1. მოდიფიცირდეს შპს ”TV კვირიკეს” კერძო მაუწყებლობის №B133 ლიცენზია შევიდეს ცვლილება კომისიის 2012 წლის 24 დეკემბრის №818/1 გადაწყვეტილებაში და

ა) ამ გადაწყვეტილების პირველი პუნქტის ბ) ქვეპუნქტი ჩამოყალიბდეს შემდეგი რედაქციით:

”ბ) ლიცენზიის სახეობა: საერთო ტელემაუწყებლობა;”

ბ) ამ გადაწყვეტილების მე-3 პუნქტს დაემატოს შემდეგი შინაარსის ტ) ქვეპუნქტი:

”ტ) უზრუნველყოს არანაკლებ 2 თემატიკის, მათ შორის, ახალი ამბებისა და საზოგადოებრივ-პოლიტიკური თემატიკის, პროგრამებით მაუწყებლობა;”

2. დაევალოს კომისიის აპარატის ადმინისტრაციულ დეპარტამენტს:

ა) სათანადო მონაცემების კომისიის სალიცენზიო რეესტრში შეტანა (ნ.ლორთქიფანიძე);

ბ) სალიცენზიო მოწმობის გაცემის უზრუნველყოფა (ნ. ლორთქიფანიძე);

გ) ლიცენზიის მოდიფიცირების თაობაზე ინფორმაციის სსიპ „საქართველოს საკანონმდებლო მაცნეში“ გაგზავნის უზრუნველყოფა (მ. ქადეიშვილი);

დ) აღნიშნული გადაწყვეტილების დამოწმებული ასლის შპს ”TV კვირიკესთვის” გაგზავნა (ნ. ჯავახიძე);

3. გადაწყვეტილება ძალაში შევიდეს კომისიის სხდომაზე გამოქვეყნებისთანავე;

4. გადაწყვეტილება შეიძლება გასაჩივრდეს ქ.თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ.თბილისი, დ.აღმაშენებლის ხეივანი, მე–12 კმ; №6) ერთი თვის ვადაში;

5. კონტროლი აღნიშნული გადაწყვეტილების შესრულებაზე დაევალოს კომისიის აპარატის ადმინისტრაციულ დეპარტამენტს (ი. ხარებავა).

კომისიის თავმჯდომარის

მოვალეობის შემსრულებელი სოფიო ბრიტანჩუკი

კომისიის წევრი აკაკი სიხარულიძე

კომისიის წევრი ირაკლი მოსეშვილი