შპს „მაგთიკომის“ წინააღმდეგ შპს „პალიტრა TV“-ის საჩივრის წარმოებაში მიღებისა და აღნიშნული საჩივრის განხილვის მიზნით ფორმალური ადმინისტრაციული წარმოების დაწყების შესახებ

შპს „მაგთიკომის“ წინააღმდეგ  შპს „პალიტრა TV“-ის საჩივრის წარმოებაში მიღებისა და აღნიშნული საჩივრის განხილვის მიზნით ფორმალური ადმინისტრაციული წარმოების დაწყების შესახებ

საქართველოს კომუნიკაციების ეროვნული კომისია (შემდგომში „კომისია“) აღნიშნავს, რომ კომისიას საჩივრით (29.05.2015 Nშ-6/3472-15) მიმართა შპს „პალიტრა TV“-იმ  შპს „მაგთიკომის“ მიერ „მაუწყებლობის შესახებ“ საქართველოს კანონით გათვალისწინებული სავალდებულო ტრანზიტის  განხორციელებაზე უარის თქმის გამო შპს „მაგთიკომის“  წინააღმდეგ საჩივრის განხილვის მოთხოვნით.

შპს „პალიტრა TV“-ის საჩივარში აღნიშნულია, რომ 2015 წლის 19 მაისს N75 განცხადებით შპს „პალიტრა TV“- იმ მიმართა შპს „მაგთიკომს“,  „მაუწყებლობის შესახებ“ საქართველოს კანონის 40¹ მუხლის და თბილისის საქალაქო სასამართლოს ადმინისტრაციული საქმეთა კოლეგიის (04.03.2015; N3/672-14) გადაწყვეტილების  მოთხოვნათა შესაბამისად, სავალდებულო ტრანზიტის განხორციელების თაობაზე. როგორც განცხადებაშია აღნიშნული, შპს „მაგთიკომმა“ 2015 წლის 25 მაისის N15/092 წერილით უარი განაცხადა შპს „პალიტრა TV“-ის კანონიერი მოთხოვნის შესრულებაზე.

მ ო თ ხ ო ვ ნ ა:

დაევალოს შპს „მაგთიკომს“ სავალდებულო ტრანზიტის განხორციელება და უზრუნველყოს შპს „მაგთკომმა“  შპს „პალიტრა TV“-ის სატელევიზიო სიგნალის  „მაგთისატის“ მომხმარებელთათვის შეთავაზებულ ყველა პაკეტში განთავსება. 

კომისია აღნიშნავს, რომ განსახილველ საკითხთან დაკავშირებით 2015 წლის 9 ივნისს კომისიაში შემოვიდა შპს „მაგთიკომის“ განცხადება (კომისიაში რეგისტრაციის 9.06.2015; N6/375-15), რომელშიც აღნიშნულია, რომ შპს „პალიტრა TV“-ის უარი უნდა ეთქვას საჩივრის განხილვაზე, ვინაიდან  შპს „მაგთიკომის“ აზრით, სახეზეა დავა ერთი და იგივე მხარეებს შორის, ერთი და იგივე საგანზე და იგივე საფუძვლებიდან გამომდინარე, რაზეც კომისიას მიღებული აქვს გადაწყვეტილება (20.12.2013; N753/16) და რომელიც სასამართლომ თავისი გადაწყვეტილებით (04.03.2015; N3/672-14) დატოვა ძალაში, რაც თავის მხრივ წარმოადგენს საქართველოს ზოგადი ადმინსიტრაციული კოდექსის 182-ე მუხლის თანახმად საჩივრის განხილვაზე უარის თქმის საფუძველს.

კომისია აღნიშნავს, რომ შპს „მაგთიკომის“ წინააღმდეგ შპს „პალიტრა TV“-ის საჩივრის წარმოებაში მიღების საკითხის განხილვა გაიმართა კომისიის 2015 წლის 9 ივნისის სხდომაზე, რომლის გამართვის  შესახებ, შეტყობინებებით  ეცნობათ შპს ,,მაგთიკომს“ და შპს „პალიტრა TV“-ის  და ეთხოვათ განსახილველ საკითხთან დაკავშირებული შესაბამისი არგუმენტაციის და მტკიცებულებები წარმოედგინათ კომისიაში. მათ ასევე განემარტათ საქართველოს ზოგადი ადმინისტრაციული კოდექსის 98-ე და 99-ე მუხლებით გათვალისწინებული მტკიცებულებებისა და შუამდგომლობების წარმოდგენის, აგრეთვე, საქმის გარემოებათა გამოკვლევისა და ადმინისტრაციული მასალების გამოთხოვის უფლება. საკითხის განხილვას ესწრებოდნენ შპს „მაგთიკომის“ იურისტები - დავით ძიძიგური და ირაკლი შარაბიძე,  შპს „პალიტრა TV“-ის უფლებამოსილი წარმომადგენლები ირაკლი ალხაზაშვილი და ანა სამსონია.

კომისიის 2015 წლის 9 ივნისის სხდომაზე, შპს „პალიტრა TV“-ის იურისტმა ირაკლი ალხაზაშვილმა დააზუსტა მოთხოვნა და აღნიშნა, რომ ყურადღება გამახვილებულ უნდა იქნას იმ ახლად გამოვლენილ გარემოებაზე, რომელიც არ არსებობდა 2013 წლის  დეკემბრისათვის, მაშინ როცა,  კომისიაში  მიმდინარეობდა შპს „მაგთიკომის“ წინააღმდეგ  შპს „პალიტრა TV“-ის საჩივრის განხილვა. შპს „პალიტრა TV“-ის იურისტმა განმარტა,  რომ 2013 წლის დეკემბრისათვის შპს „მაგთიკომის“ სათაო ოფისი მდებარეობდა ქ. სტოქჰოლმში, ამასთან, მიმდინარეობდა „მაგთისატის“ ტექნიკური სათავო სადგურის მშენებლობა თბილისში.  დღეის მდგომარეობით, „მაგთისატის“ ტექნიკური სათავო ოფისის მშენებლობა დასრულებულია, რამაც შესაძლებელი უნდა გახადოს ბევრი ტექნიკური პრობლემის აღმოფხვრა, კერძოდ, ისეთი ტექნიკური პრობლების, როგორიცა „მაგთისატის“ სამომხმარებლო პაკეტებში დამატებითი არხების განთავსება.  შპს „პალიტრა TV“-ის წარმომადგენელმა დამატებით აღნიშნა, რომ შპს „პალიტრა TV“-ის მიერ შესრულებულია კანონისმიერი ვალდებულება და ოპტიკურ-ბოჭკოვანი კაბელის მეშვეობით, ქ. თბილისში მდებარე „მაგთისატის“ სადგურამდე მიწოდებულია შპს „პალიტრა TV“-ის სამაუწყებლო სიგნალი.

კომისია, მხარეთა მიერ წარმოდგენილი განცხადებებისა და კომისიის სხდომაზე გაკეთებული ახსნა-განმარტებების საფუძველზე აღნიშნავს შემდეგს:

1. შპს „პალიტრა TV“ ფლობს კერძო საერთო მაუწყებლობის NB136 ლიცენზიას, რომელიც ითვალისწინებს ტელემაუწყებლობის განხორციელებას თანამგზავრული სისტემების მიწისზედა და ორბიტალური სადგურების გამოყენებით;
2. შპს „პალიტრა TV“ წარმოადგენს ავტორიზებულ მაუწყებელს, რომელიც მაუწყებლობას ახორციელებს ავტორიზაციის ფარგლებში (ავტორიზაციის ნომერი: BR – 1028; ავტორიზაციის თარიღი: 11/02/2013);
3.  შპს „მაგთიკომი“ წარმოადგენს ავტორიზებულ პირს, რომელსაც ავტორიზაცია გავლილი აქვს როგორც ტელემაუწყებლობის ტრანზიტზე, ასევე თანამგზავრული ტრანზიტული მაუწყებლობის მომსახურებაზე.
4. „მაუწყებლობის შესახებ“ საქართველოს კანონის მე-5 მუხლის მე-3 პუნქტის ვ) ქვეპუნქტის შესაბამისად, მაუწყებლობის სფეროში კომისიის ერთ–ერთი ფუნქციაა, მაუწყებლობის სფეროში მოქმედი კანონმდებლობის მოთხოვნების შესრულებაზე ზედამხედველობა და კონტროლი; ამ მოთხოვნათა დარღვევის შემთხვევაში შესაბამისი სანქციების დაკისრება;
5.  ,,ელექტრონული კომუნიკაციების შესახებ“ საქართველოს კანონის მე-11 მუხლის პირველი პუნქტის შესაბამისად, ელექტრონული კომუნიკაციების სფეროში კომისია დამოუკიდებლად ახორციელებს ავტორიზებული პირების საქმიანობისა და ლიცენზიის ან/და ნებართვის მფლობელების მიერ რადიოსიხშირული სპექტრით ან/და ნუმერაციის რესურსით სარგებლობის რეგულირებას, მათ შორის, ნორმატიული და ინდივიდუალური სამართლებრივი აქტების მიღებას, მათი შესრულების მონიტორინგსა და კონტროლს, გამოვლენილი დარღვევებისათვის ამ კანონით განსაზღვრული უფლებამოსილებების ფარგლებში ამავე კანონითა და საქართველოს ადმინისტრაციულ სამართალდარღვევათა კოდექსით დადგენილი სანქციების დაკისრებას;
6.  „ელექტრონული კომუნიკაციების შესახებ“ საქართველოს კანონის მე-11 მუხლის მე-3 პუნქტის ზ) ქვეპუნქტის შესაბამისად, კომისიის ერთ-ერთ ფუნქციას წარმოადგენს ელექტრონული კომუნიკაციების სფეროში საქმიანობის ავტორიზებისა და სალიცენზიო ან/და სანებართვო პირობების დაცვაზე ზედამხედველობის განხორციელება და მათი დარღვევისას კანონით გათვალისწინებული ღონისძიებების გატარება, ამავე კანონის 43-ე მუხლის პირველი პუნქტის შესაბამისად, კომისია აკონტროლებს ავტორიზებულ პირთა მიერ ელექტრონული კომუნიკაციების სფეროში განხორციელებულ საქმიანობას, ასევე მათ მიერ  ელექტრონული კომუნიკაციების სფეროში საქართველოს კანონმდებლობის, მათ შორის, კომისიის დადგენილებებითა და გადაწყვეტილებებით განსაზღვრული მოთხოვნებისა და ვალდებულებების შესრულებას, ხოლო 45–ე მუხლის შესაბამისად, ავტორიზებული პირის მიერ ელექტრონული კომუნიკაციების  სფეროში საქართველოს კანონმდებლობის, მათ შორის, კომისიის  დადგენილებებითა და გადაწყვეტილებებით განსაზღვრული მოთხოვნებისა და ვალდებულებების, დარღვევის ან/და ლიცენზიის მფლობელის მიერ სალიცენზიო პირობების დარღვევის შემთხვევაში კომისია უფლებამოსილია დამრღვევი წერილობით გააფრთხილოს, ხოლო დენადი ხასიათის დარღვევის კომისიის გადაწყვეტილებით განსაზღვრულ ვადაში აღმოუფხვრელობის ან   1 წლის განმავლობაში ახალი ერთჯერადი ხასიათის დარღვევის ჩადენის შემთხვევაში დააკისროს ჯარიმა.
7.  „მაუწყებლობის შესახებ“ საქართველოს კანონის 40¹ მუხლის პირველი პუნქტის შესაბამისად, საზოგადოებრივ მაუწყებელს, სათემო მაუწყებელს, ამ კანონის შესაბამისად ლიცენზირებულ საერთო მაუწყებელს, რომელიც მაუწყებლობს მაუწყებლობის ტრანზიტზე ავტორიზებული პირის მომსახურების მიწოდების ზონაში (თანამგზავრული მაუწყებლობის ლიცენზიისთვის მაუწყებლობის ზონა ამ მუხლის მიზნებისათვის არის ქვეყნის მთელი ტერიტორია), აგრეთვე საერთო საეთერო მაუწყებლობის ლიცენზიის მქონე პირს, რომლის მაუწყებლობა ხელმისაწვდომია საქართველოს მოსახლეობის არანაკლებ 20%-ისთვის, უფლება აქვთ, მოსთხოვონ  მაუწყებლობის ტრანზიტზე ავტორიზებულ პირს, ასეთი მაუწყებლის სატელევიზიო არხი მომხმარებლისათვის შეთავაზებულ ყველა პაკეტში განათავსოს („სავალდებულო ტრანზიტი“). ამ შემთხვევაში მაუწყებელს არ წარმოეშობა მაუწყებლობის ტრანზიტზე ავტორიზებული პირისგან მაუწყებლის სიგნალის ტრანზიტისათვის ანაზღაურების მოთხოვნის უფლება.
8. „მაუწყებლობის შესახებ“ საქართველოს კანონის 40¹ მუხლის მე-2 და მე-3 პუნქტების შესაბამისად, მაუწყებელს შეუძლია სავალდებულო ტრანზიტის მოთხოვნა მაუწყებლობის ტრანზიტზე ავტორიზებულ პირს წარუდგინოს მის იურიდიულ მისამართზე დაზღვეული წერილის გაგზავნით. მაუწყებელი ვალდებულია თავისი ხარჯით, ერთჯერადად მიაწოდოს მაუწყებლობის ტრანზიტზე ავტორიზებულ პირს მაუწყებლის სიგნალის ქსელში გავრცელებისათვის აუცილებელი ტექნიკური საშუალებები და უზრუნველყოს მაუწყებლის სიგნალის თანამგზავრამდე მიტანა. ტექნიკური საშუალებების ერთჯერადი მიწოდების ვალდებულება არ ვრცელდება მაუწყებელზე, რომლის მაუწყებლობის ტრანზიტიც ხორციელდება ამ მუხლის ამოქმედებისას. ტექნიკურ საკითხებთან დაკავშირებული სხვა ურთიერთვალდებულებები განისაზღვრება მხარეებს შორის დადებული ტრანზიტის ხელშეკრულებით. ტრანზიტის ხელშეკრულების თითოეული მხარე ვალდებულია ტრანზიტის ხელშეკრულება ან ტრანზიტის განხორციელების სხვა სამართლებრივი საფუძველი განათავსოს თავის ვებ გვერდზე და წერილობითი მოთხოვნის შემთხვევაში დაუყოვნებლივ გადასცეს ასეთი ხელშეკრულების ასლი ნებისმიერ პირს. 

ამავე მუხლის მე-4 პუნქტის შესაბამისად, ტექნიკური საშუალებების ტექნიკურ მონაცემებს ადგენს კომისია. მაუწყებლობის ტრანზიტზე ავტორიზებული პირი ვალდებულია შეასრულოს სავალდებულო ტრანზიტის მოთხოვნა კომისიის მიერ დადგენილი ტექნიკური მონაცემების შესაბამისად, ამ მუხლის პირველ პუნქტში მითითებული მაუწყებლების მიერ ტექნიკური საშუალებების მიწოდებიდან 14 დღის ვადაში.

ამავე მუხლის მე–11 პუნქტის შესაბამისად, რომელიმე მხარის მიერ ამ მუხლის პირველი, მე-3, მე-6, მე-7 ან/და მე-8 პუნქტის დარღვევის შემთხვევაში, მეორე მხარეს შეუძლია საჩივრით მიმართოს კომისიას.

9.კომისიის 2013 წლის 26 აგვისტოს N8 დადგენილებით დამტკიცებულ იქნა „მაუწყებლობის შესახებ“   საქართველოს კანონით გათვალისწინებული   სავალდებულო ტრანზიტის განხორციელებისას მაუწყებლობის ტრანზიტზე ავტორიზებული პირის მიერ მაუწყებლის სიგნალის  გავრცელებისთვის აუცილებელი  ტექნიკური   საშუალებების ტექნიკური მონაცემები“, რომლითაც განისაზღვრა სავალდებულო ტრანზიტის განხორციელებასთან დაკავშირებით, მაუწყებლობის ტრანზიტზე ავტორიზებული პირების მიერ მაუწყებლის სიგნალის გავრცელებისთვის  აუცილებელი  ტექნიკური   საშუალებების ტექნიკური მონაცემები კერძოდ:

 10.„მაუწყებლობის შესახებ“ საქართველოს კანონის მე-14 მუხლის მე-3 პუნქტის შესაბამისად, საჩივრის მიღებიდან 7 სამუშაო დღის განმავლობაში კომისია იღებს დასაბუთებულ გადაწყვეტილებას საჩივრის განსახილველად მიღების ან საჩივარზე უარის თქმის შესახებ და დაუყოვნებლივ ატყობინებს ამის თაობაზე მომჩივანს, ხოლო ამავე მუხლის მე–4 პუნქტის შესაბამისად, მომხმარებელთა განცხადებებსა და საჩივრებს კომისია განიხილავს ზეპირი მოსმენით, ფორმალური ადმინისტრაციული წარმოების წესით, გარდა საქართველოს ზოგადი ადმინისტრაციული კოდექსით დადგენილი გამონაკლისებისა და იმ შემთხვევებისა, როდესაც სადავო საკითხების გადაწყვეტა არ მოითხოვს ორგანიზებული პროცედურების განხორციელებას;

11.საქართველოს ზოგადი ადმინისტრაციული კოდექსის 102-ე მუხლის შესაბამისად, განცხადება იმ საკითხთან დაკავშირებით, რომლის თაობაზედაც არსებობს ადმინისტრაციული ორგანოს მიერ გამოცემული ინდივიდუალური ადმინისტრაციულ-სამართლებრივი აქტი განცხადების, აგრეთვე საჩივრის დაკმაყოფილებაზე უარის თქმის შესახებ, შეიძლება წარდგენილი იქნეს მხოლოდ იმ შემთხვევაში, თუფაქტობრივი ან სამართლებრივი მდგომარეობა, რომელიც საფუძვლად დაედო ინდივიდუალური ადმინისტრაციულ-სამართლებრივი აქტის გამოცემას, შეიცვალა დაინტერესებული პირის სასარგებლოდ, ან თუ არსებობს ახლად აღმოჩენილი ან ახლად გამოვლენილი გარემოებანი (მტკიცებულებები), რომლებიც განაპირობებს განმცხადებლისათვის უფრო ხელსაყრელი ინდივიდუალური ადმინისტრაციულ-სამართლებრივი აქტის გამოცემას.

კომისია აღნიშნავს, რომ 2015 წლის 9 ივნისის კომისიის სხდომაზე, კომისიამ იმსჯელა შპს „მაგთიკომის“  განცხადებაზე შპს „პალიტრა TV“-ის საჩივრის განხილვაზე უარის თქმის თაობაზე და განმარტა, რომ საქართველოს ზოგადი ადმინისტრაციული კოდექსის 102-ე მუხლის თანახმად,  ერთსა და იმავე საკითხზე ხელახლა განცხადების წარმოდგენა შესაძლებელია, თუ განცხადებაში დასაბუთებულია, რომ ფაქტობრივი ან სამართლებრივი მდგომარეობა, რომელიც საფუძვლად დაედო ინდივიდუალური ადმინისტრაციული სამართლებრივი აქტის გამოცემას, შეიცვალა დაინტერესებული პირის სასარგებლოდ, რაც  განაპირობებს განმცხადებლისათვის უფრო ხელსაყრელი ინდივიდუალური ადმინისტრაციული-სამართლებრივი აქტის გამოცემას. კომისია აღნიშნავს, რომ ქ. თბილისში „მაგთისატის“ სათაო სადგურის მშენებლობის დასრულება, რომელიც 2013 წელს, კომისიის მიერ ინდივიდუალური-სამართლებრივი აქტის გამოცემისას (კომისიის გადაწყვეტილება 20.12.2013; N753/16) არ არსებობდა, მიჩნეულ უნდა იქნას, იმ  ახლად გამოვლენილ ფაქტობრივ გარემოებად, რომელმაც შეიძლება განაპირობოს შპს „პალიტრა TV“-თვის უფრო ხელსაყრელი სამართლებრივი აქტის გამოცემა, შესაბამისად კომისიას მიაჩნია, რომ შპს „პალიტრა TV“-ის დაზუსტებული (იხ. 9 ივნისის N323/23 სხდომის ოქმი) მოთხოვნის (საჩივრის) განხილვის განახლების სამართლებრივი საფუძვლები სახეზეა.

ზემოაღნიშნულიდან გამომდინარე, კომისია აღნიშნავს, რომ „მაუწყებლობის შესახებ“ საქართველოს კანონის 40¹ მუხლით გათვალისწინებული სავალდებულო ტრანზიტის განხორციელებასთან დაკავშირებული საჩივრის განხილვა შედის კომისიის კანონით განსაზღვრული უფლებამოსილებების სფეროში და გამომდინარე იქიდან, რომ „მაუწყებლობის შესახებ“ საქართველოს კანონი საჩივრების განხილვისას ითვალისწინებს ფორმალურ ადმინისტრაციულ წარმოებას, კომისიას მიზანშეწონილად მიაჩნია დაიწყოს ფორმალური ადმინისტრაციული წარმოება შპს „პალიტრა TV“ -ის საჩივრის განხილვის მიზნით. 

„მაუწყებლობის შესახებ“ საქართველოს კანონის მე-5 მუხლის მე-3 პუნქტის ვ) და კ) ქვეპუნქტების, მე-14 მუხლის მე-3 და მე-4 პუნქტების, 40¹ მუხლის მე–11 პუნქტის, „ელექტრონული კომუნიკაციების შესახებ“ საქართველოს კანონის მე–11 მუხლის, საქართველოს ზოგადი ადმინისტრაციული კოდექსის 102-ე მუხლის და VIII თავის შესაბამისად, კომისიამ კენჭისყრის შედეგად, ერთხმად

გ ა დ ა წ ყ ვ ი ტ ა:

1. დაიწყოს ფორმალური ადმინისტრაციული წარმოება შპს „პალიტრა TV“-ის  საჩივრის (N6/3472-15; 29.05.15) განხილვის მიზნით;

2. საკითხის ზეპირი მოსმენა გაიმართოს 2015 წლის 23 ივნისს, 16.00 სთ-ზე, ხოლო გადაწყვეტილების მიღება მოხდეს ზეპირი მოსმენის ჩატარებიდან 5 სამუშაო დღის ვადაში;

3. დაევალოს კომისიის აპარატის ადმინისტრაციულ დეპარტამენტს:

ა) საჯარო გაცნობისათვის ცნობის გამოქვეყნება ინტერნეტში კომისიის ოფიციალურ ვებ-გვერდძე (ნ. ჯანელიძე);

ბ) აღნიშნული გადაწყევტილების დაინტერესებული მხარეებისათვის გაგზავნა (მ. ნინუა);

4. გადაწყვეტილება ცალკე გასაჩივრებას არ ექვემდებარება საქართველოს ზოგადი ადმინისტრაციული კოდექსის 177-ე  მუხლის მე-4 ნაწილის შესაბამისად;

6.  გადაწყვეტილება ძალაში შედის მისი კომისიის სხდომაზე გამოცხადებისთანავე;

7. კონტროლი აღნიშნული გადაწყვეტილების შესრულებაზე დაევალოს  კომისიის აპარატის სამართლებრივ დეპარტამეტნს (კ. ყურაშვილი).

კომისიის თავმჯდომარე                                                       ვ.აბაშიძე

კომისიის წევრი                                                                      კ.ბექაური

კომისიის წევრი                                                                      გ.ფრუიძე

კომისიის წევრი                                                                      ე. ასანიძე