„ბრიტანეთის ჰუმანიტარული ორგანიზაცია ჰალო თრასთის წარმომადგენლობის საქართველოში“ განცხადების განუხილველად დატოვების შესახებ

„ბრიტანეთის ჰუმანიტარული ორგანიზაცია ჰალო თრასთის  წარმომადგენლობის საქართველოში“ განცხადების განუხილველად დატოვების  შესახებ

საქართველოს კომუნიკაციების ეროვნული კომისია (შემდგომში “კომისია") აღნიშნავს, რომ „ბრიტანეთის ჰუმანიტარული ორგანიზაცია ჰალო თრასთის  წარმომადგენლობამ საქართველოში“ კომისიას მიმართა განცხადებით (კომისიაში რეგისტრაციის №7/5496-15, 03.08.15) გაედაბნის და მარნეულის მუნიციპალიტეტებში მეტრულ ტალღათა დიაპაზონში   ორი   სიხშირის მინიჭების  თაობაზე.

კომისია აღნიშნავს, რომ ”ელექტრონული კომუნიკაციების შესახებ” საქართველოს კანონის 47¹ მუხლის მე-3 პუნქტის შესაბამისად არაავტორიზებად პირს, რომლის საქმიანობა არ არის დაკავშირებული საერთო სარგებლობის ელექტრონული საკომუნიკაციო ქსელებითა და საშუალებებით უზრუნველყოფასთან ან/და ამ ქსელებითა და საშუალებებით მომსახურების მიწოდებასთან, მაგრამ საქმიანობისას საჭიროებს რადიოსიხშირეების დამხმარე ტექნოლოგიური დანიშნულებით გამოყენებას, კომისია მარტივი ადმინისტრაციული წარმოების წესით, ნებართვით ანიჭებს რადიოსიხშირეებს დამხმარე ტექნოლოგიური დანიშნულებით, დროებით − 1 წლის ვადით გამოყენებისათვის, რა დროსაც არაავტორიზებადი პირი იხდის სანებართვო მოსაკრებელს, ხოლო კომისია გასცემს სანებართვო მოწმობას.

 ”სალიცენზიო და სანებართვო მოსაკრებლების შესახებ” საქართველოს კანონის მე-7 მუხლის 29-ე პუნქტის თანახმად, დადგენილია რადიოსიხშირული სპექტრით სარგებლობის სანებართვო მოსაკრებელი, რომელიც  ერთ სიხშირეზე შეადგენს 500 ლარს და ირიცხება საქართველოს ცენტრალურ სახელმწიფო ბიუჯეტში.

”ლიცენზიებისა და ნებართვების” შესახებ საქართველოს კანონის 25-ე მუხლის მე-3 და მე-4 პუნქტების შესაბამისად, სანებართვო განცხადებას თან უნდა ერთვოდეს კომპანიის სადამფუძნებლო დოკუმენტების დამოწმებული ასლები და  სანებართვო მოსაკრებლის გადახდის დამადასტურებელი საბუთი.

კომისია  აღნიშნავს, რომ „ბრიტანეთის ჰუმანიტარული ორგანიზაცია ჰალო თრასთის  წარმომადგენლობის საქართველოში“ მიერ კომისიაში წარმოდგენილ განცხადებას (№7/5496-15, 03.08.15) თანდართული არ ჰქონდა  სადამფუძნებლო დოკუმენტების დამოწმებული ასლები და სანებართვო მოსაკრებლის გადახდის დამადასტურებელი საბუთი.

ზემოაღნიშნულიდან გამომდინარე, საქართველოს ზოგადი ადმინისტრაციული კოდექსის 83-ე მუხლის მე-2 და მე-3 ნაწილების შესაბამისად, კომისიამ განმცხადებელს დამატებითი ინფორმაციისა და  რადიოსიხშირული სპექტრით სარგებლობის     სანებართვო    მოსაკრებლის     1000  ლარის   (500  ლარი  1  სიხშირეზე) საქართველოს ცენტრალურ სახელმწიფო ბიუჯეტში გადახდის  დამადასტურებელი საბუთის  წარმოდგენისთვის  განუსაზღვრა 10 სამუშაო დღის ვადა (წერილი № 06/1867-15, 02.09.15წ., რომელიც ჩაბარდა „ბრიტანეთის ჰუმანიტარული ორგანიზაცია ჰალო თრასთის  წარმომადგენლობას საქართველოში“ 2015 წლის 3 სექტემბერს). კომისია აღნიშნავს, რომ მითითებულ ვადაში განმცხადებელს მოთხოვნილი დოკუმენტები  არ წარმოუდგენია.

კომისია აღნიშნავს, რომ საქართველოს ზოგადი ადმინისტრაციული კოდექსის 83-ე მუხლის
მე-5 ნაწილის შესაბამისად, თუ დადგენილ ვადაში განმცხადებელი არ წარმოადგენს შესაბამის დოკუმენტს ან ინფორმაციას, ადმინისტრაციული ორგანო უფლებამოსილია გამოიტანოს გადაწყვეტილება განცხადების განუხილველად დატოვების შესახებ.

ზემოაღნიშნულიდან გამომდინარე საქართველოს ზოგადი ადმინისტრაციული კოდექსის 83-ე მუხლის მე-5 ნაწილის შესაბამისად, კომისიამ კენჭისყრის შედეგად, ერთხმად

გადაწყვიტა:

1.  განუხილველად დარჩეს „ბრიტანეთის ჰუმანიტარული ორგანიზაცია ჰალო თრასთის წარმომადგენლობის  საქართველოში“  განცხადება  № 7/5496-15, 03.08.15წ.  სიხშირეების მინიჭების თაობაზე;
2. გადაწყვეტილება შეიძლება გასაჩივრდეს ქ. თბილისის საქალაქო სასამართლოს ადმინისტრაციულ საქმეთა კოლეგიაში (ქ.თბილისი, დ.აღმაშენებლის ხეივანი მე-12 კმ. №6) ერთი თვის ვადაში; 
3. კონტროლი აღნიშნული გადაწყვეტილების შესრულებაზე დაევალოს კომისიის აპარატის რადიოსიხშირეთა მართვის დეპარტამენტს (ს. შავგულიძე). 
4. გადაწყვეტილება ძალაში შევიდეს ამ გადაწყვეტილების დამოწმებული ასლის „ბრიტანეთის ჰუმანიტარული ორგანიზაცია ჰალო თრასთის წარმომადგენლობისთვის საქართველოში“ ჩაბარებისთანავე. 

კომისიის თავმჯდომარე                  ვ. აბაშიძე

კომისიის წევრი                                   კ. ბექაური

კომისიის წევრი                                   გ. ფრუიძე