შპს „ჯეოსელის“ (ს/კ 203841940) სს “სილქნეტთან“ (ს/კ 204566978) შერწყმის გამოკვლევის თაობაზე საჯარო ადმინისტრაციული წარმოების დაწყების შესახებ

შპს „ჯეოსელის“ (ს/კ 203841940) სს “სილქნეტთან“ (ს/კ 204566978) შერწყმის გამოკვლევის თაობაზე  საჯარო ადმინისტრაციული წარმოების  დაწყების შესახებ

საქართველოს კომუნიკაციების ეროვნული კომისია (შემდგომში „კომისია”) აღნიშნავს, რომ კომისიას ერთობლივი განცხადებით (№3503/05-8 02.08.2018; 2/383-18 02.08.2018; კომისიაში რეგისტრაციის №შ-6/3651-18 02.08.2018) მიმართეს შპს „ჯეოსელმა“ და სს „სილქნეტმა“,  შპს „ჯეოსელის“ სს “სილქნეტთან“ შერწყმის თაობაზე კომისიისაგან წინასწარი თანხმობის მიღების მოთხოვნით.

“ელექტრონული კომუნიკაციების შესახებ“ საქართველოს კანონის 26-ე მუხლის პირველი პუნქტის თანახმად, შერწყმის ან წილის, აქციების ან საოპერაციო აქტივის შეძენის განზრახვის შესახებ კომისიას უნდა ეცნობოს შეძენის ან შერწყმის განხორციელებამდე. შეტყობინების ვალდებულება ეკისრება ავტორიზებულ პირს, რომელიც მონაწილეობს შერწყმაში, ან  რომლის წილის, აქციების, ან საოპერაციო აქტივის შეძენაც ხდება.

“ელექტრონული კომუნიკაციების შესახებ“ საქართველოს კანონის 27-ე მუხლის პირველი პუნქტის შესაბამისად, კომისია უფლებამოსილია შერწყმის ან შეძენის თაობაზე ავტორიზებული პირის სრულყოფილი შეტყობინების მიღებიდან 15 დღის ვადაში გასცეს თანხმობა შერწყმაზე ან შეძენაზე ან ბაზრის შესაბამის სეგმენტზე არსებულ კონკურენციაზე შესაძლო გავლენის მოხდენის დადგენის მიზნით მიიღოს გადაწყვეტილება შერწყმის ან შეძენის გამოკვლევის თაობაზე ადმინისტრაციული წარმოების დაწყების შესახებ.

“ელექტრონული კომუნიკაციების შესახებ“ საქართველოს კანონის 27-ე მუხლის  მე-2 პუნქტის თანახმად, შერწყმის ან შეძენის გამოკვლევა აუცილებელია შემდეგი გარემოებების არსებობისას:

ა) თუ შერწყმის ან შეძენის შემდეგ საცალო ბაზრის შესაბამის და მასთან მჭიდროდ დაკავშირებულ საბითუმო ბაზრის სეგმენტებზე ჩამოყალიბდება ვერტიკალურად და ჰორიზონტალურად ინტეგრირებული ეკონომიკური აგენტების სტრუქტურები, რომლებიც ურთიერთკონტროლის განხორციელების საშუალებით შეძლებენ ამ სეგმენტებზე მნიშვნელოვანი საბაზრო უპირატესობების მოპოვებას, შესვლის დაბრკოლებების ჩამოყალიბებას და კონკურენციის მნიშვნელოვნად შეზღუდვას;

ბ) თუ შერწყმაში ან შეძენაში მონაწილე ერთი ან რამდენიმე ეკონომიკური აგენტი წარმოადგენს ვერტიკალურად ინტეგრირებულ ავტორიზებულ პირს, რომელიც ფლობს მნიშვნელოვან საბაზრო უპირატესობას როგორც საცალო ბაზრის, ისე მასთან

მჭიდროდ დაკავშირებულ საბითუმო ბაზრის სეგმენტებზე;

გ) თუ შერწყმაში ან შეძენაში მონაწილე ინიციატორი ეკონომიკური აგენტი ფლობს მნიშვნელოვან საბაზრო უპირატესობას საცალო (საბითუმო) მომსახურების ბაზრის სეგმენტზე და სავარაუდო შერწყმა ხდება იმ ეკონომიკურ აგენტთან ან მნიშვნელოვანი წილის, აქციების ან საოპერაციო აქტივის შეძენა ხდება იმ ეკონომიკური აგენტისგან, რომელიც აღმავალი (დამავალი) მიმართულებით მჭიდროდ დაკავშირებულ საბითუმო (საცალო) ბაზრის სეგმენტზე ფლობს მნიშვნელოვან საბაზრო უპირატესობას.

კომისია აღნიშნავს, რომ სს “სილქნეტი“ წარმოადგენს მნიშვნელოვანი საბაზრო ძალაუფლების მქონე ავტორიზებულ პირს:

-  მაგისტრალურ არხებთან დაშვების მომსახურების ბაზრის სეგმენტზე (კომისიის №498/9 31.08.2007 გადაწყვეტილება);

-    ფიქსირებული საკომუნიკაციო ქსელის ოპერატორის ძირითადი ქსელის საკომუტაციო ტერმინალურ ელემენტებთან დაშვებისა და ურთიერთჩართვის (სატელეფონო ზარების წამოწყება/დასრულება) საბითუმო ბაზრის შესაბამის სეგმენტზე (კომისიის №428/9 17.09.2010 გადაწყვეტილება);

-   ინტერნეტის გლობალურ რესურსებთან დაშვების საბითუმო ბაზრის ქვესეგმენტზე (კომისიის №57-9 29.01.2015 გადაწყვეტილება);

-   ინტერნეტის ქსელებით მომსახურების საცალო ბაზარზე (კომისიის №610/9 13.11.2009 გადაწყვეტილება);

-   საკომუნიკაციო საკანალიზაციო არხებთან დაშვების საბითუმო ბაზრის სეგმენტზე (კომისიის №620/9 06.11.2014 გადაწყვეტილება);

-   სპილენძის სააბონენტო სახაზო-საკაბელო წყვილების რესურსთან დაშვების საბითუმო ბაზრის სეგმენტზე (კომისიის №620/9 06.11.2014 გადაწყვეტილება).      

კომისია ასევე აღნიშნავს, რომ შპს „ჯეოსელი“  წარმოადგენს მნიშვნელოვანი საბაზრო ძალაუფლების მქონე ავტორიზებულ პირს:

- მოძრავი საკომუნიკაციო ქსელის ოპერატორის ძირითადი ქსელის საკომუტაციო ტერმინალურ ელემენტებთან დაშვებისა და ურთიერთჩართვის (სატელეფონო ზარების წამოწყება/დასრულება) საბითუმო ბაზრის შესაბამის სეგმენტზე (კომისიის №240/9 21.05.2010 გადაწყვეტილება);

- ინტერნეტის ქსელებით მომსახურების საცალო ბაზარზე (კომისიის №610/9 13.11.2009 გადაწყვეტილება);

- ბოლო მომხმარებელზე მოძრავი სატელეფონო ხმოვანი მომსახურების მიწოდების ბაზრის შესაბამის სეგმენტზე (კომისიის №26/9 25.01.2011 გადაწყვეტილება).   

შესაბამისად, ვინაიდან ტრანზაქციაში მონაწილე ორივე ეკონომიკური აგენტი წარმოადგენენ ვერტიკალურად ინტეგრირებულ ავტორიზებულ პირს, რომლებიც ფლობენ მნიშვნელოვან საბაზრო ძალაუფლებას, როგორც საცალო ბაზრის, ისე მასთან მჭიდროდ დაკავშირებულ საბითუმო ბაზრის სეგმენტებზე, კომისიას მიზანშეწონილად მიაჩნია საჯარო ადმინისტრაციული წარმოების დაწყება შპს „ჯეოსელის“ სს “სილქნეტთან“ შერწყმის განზრახვიდან გამომდინარე, ბაზრის შესაბამის სეგმენტებზე არსებულ კონკურენციაზე შესაძლო გავლენის გამოკვლევის მიზნით.

ამასთან ერთად, კომისია აღნიშნავს, რომ „შპს „ჯეოსელში“  100%-იანი წილის გასხვისებისა და ამ წილის სს „სილქნეტის“ მიერ შეძენაზე თანხმობის მიცემის შესახებ“ კომისიის 2018 წლის 13 მარტის №132/11 გადაწყვეტილებით, სს „სილქნეტს“, ზონათშორის ოპტიკურ-ბოჭკოვან მაგისტრალურ არხებთან დაშვების მომსახურების; ადგილობრივ ზონაში ოპტიკურ-ბოჭკოვან მაგისტრალური არხებთან დაშვების მომსახურების; ადგილობრივ ზონაში მაგისტრალური საკომუნიკაციო ციფრული სისტემების ტერმინალურ ელემენტებთან და მათ რესურსებთან დაშვების მომსახურების; და ზონათშორის მაგისტრალური საკომუნიკაციო ციფრული სისტემების ტერმინალურ ელემენტებთან და მათ რესურსებთან დაშვების მომსახურების სეგმენტებზე დაეკისრა შემდეგი სპეციფიკური ვალდებულებები:

ა) ელექტრონული საკომუნიკაციო ქსელის შესაბამის ელემენტებთან დაშვების ვალდებულება შემდეგი კონკრეტული პირობებით: უზრუნველყოს სს „სილქნეტმა“ ზემოაღნიშნული საბითუმო მომასახურებების მსურველი ავტორიზებული პირისათვის საკუთარი ქსელის შესაბამის ელემენტებთან და ტექნიკურ საშუალებებთან შეუზღუდავი, გამჭვირვალე და არადისკრიმინაციული დაშვება;

ბ) დისკრიმინაციის აკრძალვის ვალდებულება შემდეგი კონკრეტული პირობებით: უზრუნველყოს სს „სილქნეტმა“ ზემოაღნიშნული საბითუმო მომსახურებების მსურველი ავტორიზებული პირისათვის მომსახურების მიწოდება იმგვარი არადისკრიმინაციული და ერთგვაროვანი პირობებით (მათ შორის ტარიფებით, ხარისხით, მიწოდების ვადებით), რომლებიც არანაკლებ ხელსაყრელია, ვიდრე საკუთარი სტრუქტურული ქვედანაყოფისათვის, აფილირებული ან/და სხვა ავტორიზებული პირებისათვის;

გ) ინფორმაციის გამჭვირვალეობის უზრუნველყოფის ვალდებულება შემდეგი კონკრეტული პირობებით: სს „სილქნეტმა“ საჯაროდ უნდა გამოაქვეყნოს ზემოაღნიშნული საბითუმო მომსახურებებისთვის შეთავაზების წინადადება (მოწვევის ოფერტა) და მოწვევის ოფერტაში ასახული უნდა იქნეს მომსახურებების მიწოდების არსებითი პირობები.

კომისია აღნიშნავს, რომ სს „სილქნეტისა“ და შპს „ჯეოსელის“ შერწყმის შემთხვევაში, კიდევ უფრო გაძლიერდება სს „სილქნეტის“ ვერტიკალურად ინტეგრირებული ოპერატორის საბაზრო ძალაუფლება, ამიტომ, წარმოების პროცესში გამოკვლეულ უნდა იქნას, თუ, როგორ უზრუნველყოფს სს „სილქნეტი“ დისკრიმინაციის აკრძალვის და კროს-სუბსიდირების ვალდებულების შესრულებას. კერძოდ, როგორ უზრუნველყოფს სს „სილქნეტი“ საკუთარი სტრუქტურული ქვედანაყოფის, აფილირებული და სხვა ავტორიზებული პირებისათვის ელექტრონული საკომუნიკაციო მომსახურებისა და მასთან დაკავშირებული ინფორმაციის არადისკრიმინაციულად (შეუზღუდავად), ერთსა და იმავე ვადებში და ერთნაირი პირობებით მიწოდებას.

კომისია ასევე აღნიშნავს, რომ წარმოების პროცესში უნდა დადგინდეს, უზრუნველყოფს თუ არა შერწყმით მიღებული ეფექტიანობა ბოლო მომხმარებლების სარგებელს (საბოლოო მომხმარებლების სარგებელი ითვალისწინებს მომსახურებაზე ფასების შემცირებას და ახალი, ან გაუმჯობესებული მომსახურების შეთავაზებას).

კომისია აღნიშნავს, რომ კვლევის ფარგლებში განსახორციელებელი საქმიანობიდან გამომდინარე, მიზანშეწონილია კვლევისათვის გათვალისწინებულ იქნას საჯარო ადმინისტრაციული წარმოების მაქსიმალური სამ თვიანი ვადა.  

„ელექტრონული კომუნიკაციების შესახებ” საქართველოს კანონის მე-11 მუხლის მე-3 პუნქტის „ბ“ ქვეპუნქტის, 25-ე, 26-ე და 27-ე მუხლების,  საქართველოს ზოგადი ადმინისტრაციული კოდექსის მე-100 მუხლის მე-4 ნაწილის და  IX თავის შესაბამისად, კომისიამ,  კენჭისყრის შედეგად, ერთხმად

გ ა დ ა წ ყ ვ ი ტ ა :

1. დაიწყოს საჯარო ადმინისტრაციული წარმოება, შპს „ჯეოსელის“ სს “სილქნეტთან“ შერწყმის განზრახვიდან გამომდინარე, ბაზრის შესაბამის სეგმენტებზე არსებულ კონკურენციაზე შესაძლო გავლენის გამოკვლევის მიზნით;

2. საჯარო ადმინისტრაციული წარმოებისათვის განისაზღვროს სამ თვიანი ვადა;

3. საკითხის ზეპირი მოსმენა გაიმართოს 2018 წლის  20 სექტემბერს 15.00 საათზე (მისამართი: 0144 თბილისი, ქეთევან წამებულის გამზ./ბოჭორმის ქ. 50/18);

4. დაევალოს კომისიის ადმინისტრაციას (ნ. ჯანელიძე)  საჯარო გაცნობისათვის ცნობათა გამოქვეყნება ინტერნეტში კომისიის ოფიციალურ ვებ-გვერდზე;

5. გადაწყვეტილება ცალკე გასაჩივრებას არ  ექვემდებარება საქართველოს ზოგადი ადმინისტრაციული კოდექსის 177-ე მუხლის მე-4 ნაწილის შესაბამისად;

6. გადაწყვეტილება ძალაში  შევიდეს მისი სამოტივაციო ნაწილის კომისიის სხდომაზე გამოცხადებისთანავე.