შპს „NEW-NET“- ის (ს/კ 445421696) წილის 20%-ის ფიზიკურ პირ მარინა ხომერიკის მიერ შეძენაზე თანხმობის მიცემის საკითხის განხილვის შესახებ

მეწარმეთა და არასამეწარმეო იურიდიული პირების რეესტრიდან ამონაწერის თანახმად, შპს „NEW-NET“-ის პარტნიორები არიან: მაყვალა ამირანაშვილი (წილის 20%-ის მფლობელი); რუსუდან კრავჩენკო (წილის 20%-ის მფლობელი); დარინა აბულაძე (წილის 20%-ის მფლობელი); დავით დიასამიძე (წილის 20%-ის მფლობელი); დავით ხომერიკი (წილის 20%-ის მფლობელი).   შპს „NEW-NET“-ის დირექტორია რუსუდან კრავჩენკო.

  კომისიის ავტორიზებულ პირთა უწყებრივი რეესტრიდან ამონაწერის თანახმად, შპს „NEW-NET“-ის ერთ-ერთი პარტნიორის დავით ხომერიკის კუთვნილი 20%-იანი წილის შეძენის მსურველი ფიზიკური პირის - მარინა ხომერიკის აფილირება სხვა ავტორიზებულ პირებთან არ დგინდება.

კომისიის საერთო სტატისტიკურ ბაზაში არსებული ინფორმაციის თანახმად, შპს „NEW-NET“ ახორციელებს ფიქსირებული საცალო ინტერნეტ მომსახურებას WiFi ტექნოლოგიის გამოყენებით ქალაქ ბათუმში. 2017 წელს შპს „NEW-NET“-ის შემოსავლებმა აღნიშნული მომსახურებიდან შეადგინა 86175 ლარი, ხოლო აბონენტების რაოდენობამ 2018 წლის 1 იანვრის მდგომარეობით - 176 აბონენტი.

ყოველივე ზემოაღნიშნულიდან გამომდინარე, შპს „NEW-NET“- ის წილის 20%-ის ფიზიკურ პირ მარინა ხომერიკის მიერ შეძენა, ბაზრის შესაბამის სეგმენტზე მნიშვნელოვან გავლენას ვერ იქონიებს და აღნიშნული ტრანზაქცია შეიძლება მიჩნეულ იქნეს თავსებადად ელექტრონულ საკომუნიკაციო ბაზარზე არსებულ კონკურენტულ გარემოსთან.

კომისიამ მიიჩნია, რომ არ არსებობს შპს „NEW-NET“- ის წილის 20%-ის ფიზიკურ პირ მარინა ხომერიკის მიერ შეძენაზე თანხმობის მიცემის  დამაბრკოლებელი გარემოებები.

“ელექტრონული კომუნიკაციების შესახებ“ საქართველოს კანონის 25-ე, 26-ე და 27-ე მუხლების შესაბამისად, კომისიამ კენჭისყრის შედეგად, ერთხმად

გ ა დ ა წ ყ ვ ი ტ ა :

1. მიეცეს თანხმობა შპს „NEW-NET“- ს, შპს „NEW-NET“- ის წილის 20%-ის ფიზიკურ პირ მარინა ხომერიკის მიერ შეძენაზე;

2. განემარტოს შპს „NEW-NET“-ს, რომ ამ გადაწყვეტილების შესაბამისად, წილის მფლობელის ცვლილების შემთხვევაში, შპს „NEW-NET“ ვალდებულია აღნიშნულის თაობაზე კომისიას აცნობოს ცვლილების განხორციელებიდან 7 სამუშაო დღის ვადაში;

3. დაევალოს კომისიის ადმინისტრაციას ამ გადაწყვეტილების დამოწმებული ასლის შპს „NEW-NET“- სათვის გაგზავნა (ნ. ჯავახიძე);

4. გადაწყვეტილება ძალაში შედის გადაწყვეტილების დამოწმებული ასლის შპს „NEW-NET“- სათვის ჩაბარების დღიდან;

5. გადაწყვეტილება შეიძლება გასაჩივრდეს ქ. თბილისის საქალაქო სასამართლოს ადმინისტრაციულ საქმეთა კოლეგიაში (მისამართი, ქ. თბილისი, დავით აღმაშენებლის ხეივანი, მე-12 კმ., №6), შპს „NEW-NET“- სათვის ამ გადაწყვეტილების დამოწმებული ასლის ჩაბარების დღიდან, ერთი თვის ვადაში;

6. კონტროლი აღნიშნული გადაწყვეტილების შესრულებაზე დაევალოს კომისიის აპარატის სატელეკომუნიკაციო ბაზრის რეგულირების დეპარტამენტს (დ. გოგიჩაიშვილი).