შპს „ჰოსტნოუდსისთვის“ ადმინისტრაციული პასუხისმგებლობის დაკისრების თაობაზე

შპს „ჰოსტნოუდსისთვის“ ადმინისტრაციული პასუხისმგებლობის დაკისრების თაობაზე

I.          საქმის აღწერა

საქართველოს  კომუნიკაციების  ეროვნული  კომისია  (შემდგომში  „კომისია“)  აღნიშნავს, რომ კომისიის აპარატის სატელეკომუნიკაციო ბაზრის რეგულირების დეპარტამენტის მოხსენებითი ბარათის (N19-10-1869; 26/09/2019) თანახმად, კომისიის აპარატის ლიცენზირების, ავტორიზაციისა და ნებართვების დეპარტამენტის №19-10-1783 16/09/2019 სამსახურებრივი ბარათიდან ირკვევა, რომ რიგ კომპანიებში, კომისიის თანხმობის გარეშე, განხორციელდა წილის შეძენა, მათ შორის, შპს „ჰოსტნოუდსში“.

სატელეკომუნიკაციო ბაზრის რეგულირების დეპარტამენტის მიერ კომისიის მიერ მიღებული გადაწყვეტილებების, ასევე კომისიის ავტორიზებულ პირთა უწყებრივი რეესტრისა და მეწარმეთა და არასამეწარმეო (არაკომერციული) იურიდიული პირების რეესტრის მონაცემების შეჯერების შემდგომ გაირკვა, რომ კომისიის თანხმობის გარეშე, წილის შეძენა განხორციელდა შპს „ჰოსტნოუდსში“. კერძოდ, ფიზიკურ პირ სანდრო ძნელაძის მიერ მოხდა შპს „ჰოსტნოუდსის“ წილის 15%-ის შეძენა შპს „ჰოსტნოუდსის“ წილის 50%-ის მფლობელ არჩილ გოგიასაგან, ხოლო შპს „ჰოსტნოუდსის“ წილის 15%-ის შეძენა მოხდა შპს „ჰოსტნოუდსის“ წილის 50%-ის მფლობელ ეკატერინე კახიანისაგან. შესაბამისად, შპს „ჰოსტნოუდსის“ წილის შეძენის შემდგომ, შპს „ჰოსტნოუდის“ წილები გადანაწილდა შემდეგი სახით: არჩილ გოგია - 35%; ეკატერინე კახიანი - 35%; სანდრო ძნელაძე - 30%.

ზემოაღნიშნულიდან გამომდინარე, შპს „ჰოსტნოუდსის“ წილების შეძენა განხორციელდა კანონდარღვევით, ვინაიდან “ელექტრონული კომუნიკაციების შესახებ“ საქართველოს კანონის 26-ე მუხლის თანახმად, შერწყმის ან წილის, აქციების ან საოპერაციო აქტივის შეძენის განზრახვის შესახებ კომისიას უნდა ეცნობოს შერწყმის ან შეძენის განხორციელებამდე. შეტყობინების ვალდებულება ეკისრება ავტორიზებულ პირს, რომელიც მონაწილეობს შერწყმაში ან რომლის წილის, აქციების ან საოპერაციო აქტივის შეძენაც ხდება, რაც  შპს „ჰოსტნოუდსის“ მიერ არ განხორციელებულა.

ზემოაღნიშნულიდან გამომდინარე, კომისიაში დაიწყო მარტივი ადმინისტრაციული წარმოება შპს „ჰოსტნოუდსისთვის“ ადმინისტრაციული პასუხისმგებლობის დაკისრების მიზნით, მის მიერ „ელექტრონული კომუნიკაციების შესახებ“ საქართველოს კანონის მე-19 მუხლის მე-2 პუნქტის ბ) და გ) ქვეპუნქტებისა და 26-ე მუხლის დარღვევის გამო. საკითხის განხილვის დღედ განისაზღვრა 2019 წლის 10 ოქტომბერი, რის შესახებ შეტყობინება (N გ-19-03/2977; 30/09/2019) გაეგზავნა შპს „ჰოსტნოუდს“ და განემარტა საქართველოს ზოგადი ადმინისტრაციული კოდექსის 98-ე და 99-ე მუხლებით გათვალისწინებული მტკიცებულებებისა და შუამდგომლობების წარმოდგენის, ადმინისტრაციულ წარმოებაში არსებული დოკუმენტებისა და სხვა მასალების გაცნობის უფლება. შეტყობინება (N გ-19-03/2977; 30/09/2019)  კომპანიას ჩაბარდა 2019 წლის პირველ ოქტომბერს.

2019 წლის 10 ოქტომბერს კომისიაში შემოვიდა შპს „ჰოსტნოუდსის“ წერილი (კომისიაში რეგისტრაციის Nშ-19-6/3937, 9.10.2019), რომელშიც აღნიშნულია, რომ შპს „ჰოსტნოუდსი“ ადასტურებს შეტყობინების მიღებას და ითხოვს, საკითხის კომპანიის წარმომადგენლის დაუსწრებლად განხილვას.

კომისიის 2019 წლის 10 ოქტომბრის სხდომაზე შპს „ჰოსტნოუდსის“ წარმომადგენელი არ გამოცხადდა.   გამომდინარე   იქიდან,   რომ   კომისიის   შეტყობინება   (N   გ-19-03/2977; 30/09/2019) კომპანიას ჩაბარდა 2019 წლის პირველ ოქტომბერს და ასევე, კომისიაში შემოსულია   შპს   „ჰოსტნოუდსის“   წერილი   (კომისიაში   რეგისტრაციის   Nშ-19-6/3937, 9.10.2019), რომლითაც ითხოვა საკითხის განხილვა წარმომადგენლის დაუსწრებლად, კომისიის მიერ შესრულებული იქნა საქართველოს ზოგადი ადმინისტრაციული კოდექსის 95-ე მუხლის მოთხოვნა დაინტერესებული მხარის ადმინისტრაციულ       წარმოებაში ჩაბმასთან დაკავშირებით. შესაბამისად, კომისიამ მიზანშეწონილად მიიჩნია საკითხის განხილვა შპს „ჰოსტნოუდსის“ დაუსწრებლად.

II.         გამოკვლეული მტკიცებულებები 

1.   კომისიის აპარატის სატელეკომუნიკაციო ბაზრის რეგულირების დეპარტამენტის მოხსენებითი ბარათი თანდართული დოკუმენტაციით (N 19-10-1869; 26/09/2019);

2.   ამონაწერი მეწარმეთა და არასამეწარმეო (არაკომერციული) იურიდიული პირების რეესტრიდან (B18070002, 29/06/2018; B19085808, 09/08/2019) და კომისიის უწყებრივი რეესტრიდან შპს „ქიზიყი ჯგუფის“ შესახებ ;

3.   კომისიის შეტყობინება (N გ-19-03/2977; 30/09/2019) და აღნიშნული შეტყობინების ჩაბარების დამადასტურებელი დოკუმენტი (გზავნილის კოდი: AP01006826887);

4.   შპს „ჰოსტნოუდსის“ წერილი (კომისიაში რეგისტრაციის Nშ-19-6/3937, 9.10.2019).

III.        დადგენილი  ფაქტობრივი გარემოებები

1. შპს „ჰოსტნოუდსი“ 2016 წლის 6 მაისიდან წარმოადგენს ელექტრონული კომუნიკაციების  სფეროში  ავტორიზებულ  პირს  (ავტორიზებული  საქმიანობის სახე: B.F.2 ინტერნეტ მომსახურება: ბოლო მომხმარებლების ინტერნეტ ჰოსტინგის მომსახურება );

2.  შპს „ჰოსტნოუდსი“, როგორც ავტორიზებული პირი, ვალდებულია შეასრულოს ელექტრონული კომუნიკაციების სფეროში საქართველოს კანონმდებლობა, მათ შორის, საქართველოს     მთავრობის     დადგენილებები,     აგრეთვე     კომისიის დადგენილებები და გადაწყვეტილებები;

3.   შპს „ჰოსტნოუდსის“ სადამფუძნებლო დოკუმენტებში განხორციელდა ცვლილება. კერძოდ, ფიზიკურ პირ სანდრო ძნელაძის მიერ მოხდა შპს „ჰოსტნოუდსის“ წილის 15%-ის შეძენა შპს „ჰოსტნოუდსის“ წილის 50%-ის მფლობელ არჩილ გოგიასაგან, ხოლო შპს „ჰოსტნოუდსის“ წილის 15%-ის შეძენა მოხდა შპს „ჰოსტნოუდსის“ წილის     50%-ის     მფლობელ     ეკატერინე     კახიანისაგან.     შესაბამისად,     შპს „ჰოსტნოუდსის“ წილის შეძენის შემდგომ, შპს „ჰოსტნოუდის“ წილები გადანაწილდა შემდეგი სახით: არჩილ გოგია - 35%; ეკატერინე კახიანი - 35%; სანდრო ძნელაძე - 30% (ამონაწერი (არაკომერციული) იურიდიული პირების რეესტრიდან: B18070002, 29/06/2018 და B19085808, 09/08/2019);

4. შპს „ჰოსტნოუდს“ კომისიისთვის არ მიუწოდებია ინფორმაცია წილის მფლობელთა ცვლილების  თაობაზე, კანონით განსაზღვრულ 7 სამუშაო დღიან ვადაში;

5.   შპს „ჰოსტნოუდს“ თავისი წილის გაყიდვის განზრახვის შესახებ არ მოუმართავს კომისიისათვის და არ მიუღია კომისიის წინასწარი თანხმობა ამ აქტივობის განხორციელებასთან დაკავშირებით;

6. შპს „ჰოსტნოუდსის“ მიმართ ბოლო ერთი წლის განმავლობაში ადმინისტრაციული პასუხისმგებლობის   არც   ერთი   სახე   მსგავსი/ანალოგიური    დარღვევისათვის გამოყენებული არ ყოფილა.

IV.        სამართლებრივი საფუძვლები და დასაბუთება

1.   „ელექტრონული კომუნიკაციების შესახებ“ საქართველოს კანონის  მე-11 მუხლის პირველი        პუნქტის   შესაბამისად,   ელექტრონული   კომუნიკაციების   სფეროში კომისია დამოუკიდებლად ახორციელებს ავტორიზებული პირების საქმიანობისა და         ლიცენზიის   ან/და   ნებართვის   მფლობელების   მიერ   რადიოსიხშირული სპექტრით ან/და ნუმერაციის რესურსით სარგებლობის რეგულირებას, მათ შორის, ნორმატიული და ინდივიდუალური სამართლებრივი აქტების მიღებას, მათი შესრულების მონიტორინგსა და კონტროლს, გამოვლენილი დარღვევებისათვის ამ კანონით განსაზღვრული უფლებამოსილებების ფარგლებში ამავე კანონითა და საქართველოს ადმინისტრაციულ სამართალდარღვევათა კოდექსით დადგენილი სანქციების დაკისრებას;

2.   „ელექტრონული კომუნიკაციების შესახებ“ საქართველოს კანონის მე-11 მუხლის მე-3 პუნქტის ზ) ქვეპუნქტის თანახმად, კომისია უფლებამოსილია ელექტრონული კომუნიკაციების სფეროში საქმიანობის ავტორიზებისა და სალიცენზიო ან/და სანებართვო პირობების დაცვაზე განახორციელოს ზედამხედველობა და მათი დარღვევისას გაატაროს კანონით გათვალისწინებული ღონისძიებები;

3.  „ელექტრონული კომუნიკაციების შესახებ“ საქართველოს კანონის 43-ე მუხლის პირველი პუნქტის შესაბამისად, კომისია აკონტროლებს ავტორიზებულ პირთა მიერ ელექტრონული კომუნიკაციების სფეროში განხორციელებულ საქმიანობას, ასევე მათ  მიერ  ელექტრონული კომუნიკაციების   სფეროში   საქართველოს კანონმდებლობის,  მათ შორის,  კომისიის დადგენილებებითა და გადაწყვეტილებებით  განსაზღვრული    მოთხოვნებისა    და    ვალდებულებების შესრულებას. ამავე კანონის 44-ე მუხლის პირველი პუნქტის შესაბამისად, ავტორიზებულ   პირთა     მიერ     ელექტრონული კომუნიკაციების   სფეროში საქართველოს კანონმდებლობის, მათ შორის, კომისიის დადგენილებებითა და გადაწყვეტილებებით განსაზღვრული    მოთხოვნებისა და ვალდებულებების შესრულების მონიტორინგს კომისია ახორციელებს მუდმივად და სისტემატურად;

4.   „ელექტრონული კომუნიკაციების შესახებ“ საქართველოს კანონის მე-19 მუხლის მე-2 პუნქტის ბ) ქვეპუნქტის თანახმად, ავტორიზებული პირი ვალდებულია შეასრულოს ელექტრონული კომუნიკაციების სფეროში საქართველოს კანონმდებლობა, მათ შორის, საქართველოს მთავრობის დადგენილებები, აგრეთვე, კომისიის დადგენილებები და გადაწყვეტილებები; ამევე მუხლის მე-2 პუქნტის გ) ქვეპუნატის თანახმად, ავტორიზებული პირი ვალდებულია თავისი საქმიანობის ან/და მომსახურების მოდიფიცირების, ასევე წილის ან აქციების მფლობელთა ცვლილების თაობაზე 7 სამუშაო დღის ვადაში შეატყობინოს კომისიას, რომელსაც ეს ინფორმაცია შეაქვს ავტორიზებულ პირთა უწყებრივ რეესტრში;

5.  „ელექტრონული კომუნიკაციების შესახებ“ საქართველოს კანონის 26-ე მუხლის პირველი პუნქტის შესაბამისად, შერწყმის ან წილის, აქციების ან საოპერაციო აქტივის შეძენის განზრახვის შესახებ კომისიას უნდა ეცნობოს შერწყმის ან შეძენის განხორციელებამდე, ხოლო ამავე მუხლის მე-2 პუნქტის თანახმად, შეტყობინების ვალდებულება ეკისრება ავტორიზებულ პირს, რომელიც მონაწილეობს შერწყმაში ან რომლის წილის, აქციების ან საოპერაციო აქტივის შეძენაც ხდება;

6.   „ელექტრონული კომუნიკაციების შესახებ“ საქართველოს კანონის 26-ე მუხლის მე-3 პუნქტის შესაბამისად, შეტყობინებაში მითითებული უნდა იყოს შერწყმის ან შეძენის  ფორმა. შეტყობინება აგრეთვე უნდა შეიცავდეს შემდეგ ინფორმაციას შერწყმაში ან შეძენაში მონაწილე ყოველი ავტორიზებული პირისა და მასთან ურთიერთდამოკიდებული (აფილირებული) პირის შესახებ: ა) საფირმო სახელწოდება, საქმიანობის სახე და სარეგისტრაციო მონაცემები; ბ) შემოსავლები საქართველოში და უცხო ქვეყნის ოპერატორებისთვის გაწეული მომსახურებიდან; დ) სხვა ავტორიზებული პირის წილის, აქციების ან საოპერაციო აქტივის შეძენის შემთხვევაში − მომსახურების ბაზრის შესაბამის სეგმენტებზე შეძენილი წილის და საკუთრებაში არსებული მთლიანი წილის მოცულობა; ე) ინფორმაცია წილის ან აქციების მფლობელთა შესახებ,  ავტორიზებულ პირსა და მასთან ურთიერთდამოკიდებულ (აფილირებულ) პირს შორის ურთიერთობის შესახებ, რომელიც უნდა მოიცავდეს მონაცემებს მათ შორის კონტროლის განხორციელების შესაძლებლობისა და წილობრივი მონაწილეობის თაობაზე;

7.  „ელექტრონული კომუნიკაციების შესახებ“ საქართველოს კანონის 27-ე მუხლის პირველი პუნქტის შესაბამისად, კომისია უფლებამოსილია შერწყმის ან შეძენის თაობაზე ავტორიზებული პირის სრულყოფილი შეტყობინების მიღებიდან 15 დღის ვადაში გასცეს თანხმობა შერწყმაზე ან შეძენაზე ან ბაზრის შესაბამის სეგმენტზე არსებულ კონკურენციაზე შესაძლო გავლენის მოხდენის დადგენის მიზნით მიიღოს გადაწყვეტილება შერწყმის ან შეძენის გამოკვლევის თაობაზე ადმინისტრაციული წარმოების დაწყების შესახებ;

8.   „ელექტრონული კომუნიკაციების შესახებ“ საქართველოს კანონის 45–ე მუხლის პირველი პუნქტის თანახმად, ავტორიზებული პირის მიერ ელექტრონული კომუნიკაციების  სფეროში საქართველოს კანონმდებლობის, მათ შორის, კომისიის დადგენილებებითა და გადაწყვეტილებებით განსაზღვრული მოთხოვნებისა და ვალდებულებების დარღვევის ან/და ლიცენზიის მფლობელის მიერ სალიცენზიო პირობების დარღვევის   შემთხვევაში   კომისია   უფლებამოსილია   დამრღვევი წერილობით გააფრთხილოს;

9. „საქართველოს     კომუნიკაციების     ეროვნული     კომისიის     საქმიანობის მარეგულირებელი წესების” მე-4 მუხლის პირველი პუნქტის ბ) ქვეპუნქტის შესაბამისად, კომისიაში ადმინისტრაციული წარმოების დაწყების საფუძველია კომისიისათვის კანონმდებლობით დაკისრებული ვალდებულება ან მინიჭებული უფლებამოსილება - გამოსცეს ადმინისტრაციული აქტი.

შპს „ჰოსტნოუდსის“ მიერ, კომისიის წინასწარი თანხმობის გარეშე, თავისი წილის გასხვისებით და ცვლილების განხორციელებიდან კანონით დადგენილ ვადებში ინფორმაციის  წარმოუდგენლობით  დარღვეულ  იქნა  „ელექტრონული  კომუნიკაციების შესახებ“ საქართველოს კანონის მე-19 მუხლის მე-2 პუნქტის ბ) და გ) ქვეპუნქტები და 26-ე მუხლი.   ზემოაღნიშნული   „ელექტრონული  კომუნიკაციების   შესახებ“   საქართველოს კანონის   45-ე   მუხლის   პირველი  პუნქტის    შესაბამისად,   ავტორიზებული   პირის სანქცირების საფუძველია. იმის გათვალისწინებით, რომ კომპანიის მხრიდან  ბოლო ერთი წლის განმავლობაში ადგილი არ ჰქონდა იგივე/მსგავს დარღვევას, შპს „ჰოსტნოუდსი“ წერილობით უნდა გაფრთხილდეს.

ამავდროულად,    კომისიას    მიაჩნია,    რომ    შპს    „ჰოსტნოუდს“    უნდა  დაევალოს „ელექტრონული კომუნიკაციების შესახებ“  საქართველოს კანონის 26-ე მუხლის მე-3 პუნქტით განსაზღვრული ინფორმაციის კომისიაში  წარმოდგენა, ხოლო კომისიის აპარატის     სატელეკომუნიკაციო     ბაზრის     რეგულირების     დეპარტამენტს     -  შპს „ჰოსტნოუდსის“ მიერ წარმოდგენილი ინფორმაციის  შესწავლა და შესაბამისი დასკვნის წარმოდგენა.

V.         სარეზოლუციო ნაწილი

ყოველივე ზემოაღნიშნულის საფუძველზე, საქართველოს ზოგადი ადმინისტრაციული კოდექსის 53-ე მუხლის, 76-ე მუხლის პირველი ნაწილის ბ) ქვეპუნქტის, 95,  98-ე და 99-ე მუხლების, „საქართველოს კომუნიკაციების ეროვნული კომისიის საქმიანობის მარეგულირებელი წესების“ მე-4 მუხლის პირველი პუნქტის ბ) ქვეპუნქტის და 36-ე მუხლის მე-13 და მე-14 პუნქტების,  „ელექტრონული კომუნიკაციების შესახებ“ საქართველოს კანონის მე-19 მუხლის მე-2 პუნქტის ბ) და გ) ქვეპუნქტების, 26-ე და 27-ე მუხლებისა და 45-ე მუხლის პირველი პუნქტის  შესაბამისად, კომისიამ, კენჭისყრის შედეგად ერთხმად

გადაწყვიტა:

1. შპს „ჰოსტნოუდს“ მიეცეს გაფრთხილება  „ელექტრონული კომუნიკაციების შესახებ“ საქართველოს კანონის მე-19 მუხლის მე-2 პუნქტის ბ) და გ) ქვეპუნქტისა და 26-ე მუხლის დარღვევის გამო;

2. დაევალოს შპს „ჰოსტნოუდს“ წინამდებარე გადაწყვეტილების ჩაბარებიდან 5 სამუშაო დღის  ვადაში,  „ელექტრონული  კომუნიკაციების  შესახებ“  საქართველოს კანონის  26-ე მუხლის     მე-3     პუნქტის     შესაბამისად,     შეტყობინების    კომისიაში წარმოდგენა. შეტყობინებაში მითითებული უნდა იყოს შპს „ჰოსტნოუდსის“ წილის შეძენის ფორმა. შეტყობინება აგრეთვე უნდა შეიცავდეს შემდეგ ინფორმაციას შპს „ჰოსტნოუდსის“ წილის შეძენაში  მონაწილე ყოველი  ავტორიზებული   პირისა  და  მასთან ურთიერთდამოკიდებული (აფილირებული) პირის შესახებ:

ა) საფირმო სახელწოდება, საქმიანობის სახე და სარეგისტრაციო მონაცემები;

ბ) შემოსავლები საქართველოში და უცხო ქვეყნის ოპერატორებისთვის გაწეული მომსახურებიდან; 

დ) სხვა ავტორიზებული პირის წილის, აქციების ან საოპერაციო აქტივის შეძენის შემთხვევაში − მომსახურების ბაზრის შესაბამის სეგმენტებზე შეძენილი წილის და საკუთრებაში არსებული მთლიანი წილის მოცულობა; 

ე) ინფორმაცია წილის ან აქციების მფლობელთა შესახებ, ავტორიზებულ პირსა და მასთან ურთიერთდამოკიდებულ (აფილირებულ) პირს შორის ურთიერთობის შესახებ, რომელიც უნდა მოიცავდეს მონაცემებს მათ შორის კონტროლის განხორციელების შესაძლებლობისა და წილობრივი მონაწილეობის თაობაზე;

3. დაევალოს კომისიის აპარატის სატელეკომუნიკაციო ბაზრის რეგულირების დეპარტამენტს (მ.კანკავა) შპს „ჰოსტნოუდსის“ მიერ წარმოდგენილი ინფორმაციის შესწავლა და შესაბამისი დასკვნის წარმოდგენა;

4. დაევალოს კომისიის აპარატის ადმინისტრაციას (ო. ვოტ) აღნიშნული გადაწყვეტილების შპს „ჰოსტნოუდსისთვის“ დაუყოვნებლივ გაგზავნა და კომისიის ოფიციალურ ვებგვერდზე (www.gncc.ge) გამოქვეყნება;

5.   გადაწყვეტილება   ძალაში   შედის   გადაწყვეტილების   დამოწმებული   ასლის   შპს „ჰოსტნოუდსისთვის“   ჩაბარების დღიდან;

6. გადაწყვეტილება შეიძლება გასაჩივრდეს ქ. თბილისის საქალაქო სასამართლოს ადმინისტრაციულ საქმეთა კოლეგიაში (მისამართი: ქ. თბილისი, დავით აღმაშენებლის ხეივანი მე-12 კმ., №6) შპს „ჰოსტნოუდსისთვის“ ამ გადაწყვეტილების დამოწმებული ასლის  ჩაბარებიდან ერთი თვის ვადაში;

7.   დაევალოს   კომისიის   აპარატის   სამართლებრივ   დეპარტამენტს   (თ.   გოშუა)  შპს „ჰოსტნოუდსისთვის“ ადმინისტრაციული პასუხისმგებლობის დაკისრების თაობაზე ინფორმაციის                           კომისიის     ავტორიზებულ     პირთა     უწყებრივ     რეესტრში     შეტანის უზრუნველყოფა; 

8. კონტროლი აღნიშნული გადაწყვეტილების შესრულებაზე (გარდა მე-4 და მე-7 პუნქტებისა) დაევალოს კომისიის აპარატის სატელეკომუნიკაციო ბაზრის რეგულირების დეპარტამენტს (მ.კანკავა).

კახი ბექაური თავმჯდომარე

ვახტანგ აბაშიძე წევრი 

ელისო ასანიძეწევრი

გიორგი ფრუიძეწევრი

მერაბ ქათამაძეწევრი