კონტაქტი

შპს „ტელე-რადიო კომპანია მწვანე ტალღას“ კერძო მაუწყებლობის №B75 ლიცენზიის მოდიფიცირებისა და კომისიის 2015 წლის 16 იანვრის №29/6 გადაწყვეტილებაში ცვლილების შეტანის მიზნით საჯარო ადმინისტრაციული წარმოების დაწყების შესახებ

საქართველოს კომუნიკაციების ეროვნული კომისია (შემდგომში ,,კომისია”) აღნიშნავს, რომ საქართველოს და აზერბაიჯანის რესპუბლიკის სახელმწიფო საზღვრის მიმდებარე ტერიტორიაზე FM დიაპაზონის რადიომაუწყებლობისთვის განსაზღვრულ სიხშირულ სპექტრში შექმნილი ინტერფერენციების დაფიქსირების და გამოყენებული სიხშირული რესურსის ურთიერთშესათანხმებლად, მიმდინარე წლის მაისის თვეში ჩატარდა ორმხრივი რადიომონიტორინგი. მიღებული შედეგების ანალიზის საფუძველზე საქართველოს კომუნიკაციების ეროვნულმა კომისიამ საზღვრისპირა რეგიონში რადიოხელშეშლების აღმოფხვრის მიზნით აზერბაიჯანულ მხარეს შესთავაზა საქართველოში მოქმედი იმ რადიოსადგურების მუშა სიხშირეების წანაცვლების განხორციელება, რომლებიც ფუნქციონირებენ მეათედის მაჩვენებელში ლუწი ციფრით დაბოლოებულ სიხშირეებზე. აღნიშნული წინადადება ეფუძნება, საქართველოში მოქმედი რადიომაუწყებელი ორგანიზაციების მხრიდან აღნიშნული ხასიათის მოთხოვნების რაოდენობრივი მატების ტენდენციას.

კომისია აღნიშნავს, რომ ზემოაღნიშნულიდან გამომდინარე 2018 წლის 7 აგვისტოს კომისიამ წერილობით მიმართა შპს „ტელე-რადიო კომპანია მწვანე ტალღას“ და შესთავაზა ქ. თელავში, ქ. დედოფლისწყაროში, ქ. გუდაურში და ქ. ზუგდიდში მინიჭებული სიხშირული რესურსის შეცვლა კენტი რიცხვით დაბოლოებული რესურსით. 2018 წლის 5 სექტემბრის წერილით კომპანიამ თანხმობა განაცხადა შეთავაზებულ წინადადებაზე და ასევე მოითხოვა მათ სარგებლობაში არსებული სხვა ლუწი ციფრით დაბოლოებული სიხშირეების შეცვლა.

კომისია აღნიშნავს, რომ შპს „ტელე-რადიო კომპანია მწვანე ტალღა“ ფლობს:

1. კერძო მაუწყებლობის №B75 ლიცენზიას, კომისიის 2015 წლის 16 იანვრის №29/6 გადაწყვეტილებით განსაზღვრული შემდეგი სალიცენზიო პირობებით:

ა) ლიცენზიის სახე: რადიომაუწყებლობა;

ბ) ლიცენზიის სახეობა: კერძო მაუწყებლობა;

გ) კერძო მაუწყებლობის ქვესახეობა: საერთო მაუწყებლობა;

დ) მაუწყებლობის ენა/ენები: ქართული, სომხური, აზერბაიჯანული, რუსული, ინგლისური;

ე) მაუწყებლობის ტექნიკური პარამეტრები:

გადამცემის და ანტენის განთავსების ადგილი	სიხშირე (მჰც)	მოდულაცია	პოლარ იზაცია V / H	გასხივება	გადამცემის სიმძლავრე (ვტ)	გეოგრაფიული კოორდინატები	ანტენის დაკიდების სიმაღლე მიწის ზედაპირიდან (მ)	ანტენის გაძლიერების კოეფიციენტი (დბ)
გორის ანძა	101.5	FM	V	წრიული	1000	42°01'56"N 44°02'51"E	140	8
ქუთაისის ანძა	107.4	FM	V	წრიული	2000	42°16'49"N 42°44'11"E	100	8
ზუგდიდის ანძა	103.6	FM	V	წრიული	1000	42°24'48"N 41°49'5"E	50	6
ბათუმის ანძა	101.5	FM	V	წრიული	500	41°41'37"N 41°42'55"E	100	8
თელავი	106.0	FM	V	წრიული	500	41°52'13"N 45°24'35"E	35	6
ბორჯომის ანძა	107.4	FM	V	წრიული	250	41°49'26"N 43°23'01"E	30	8
ბაკურიანი	107.0	FM	V	წრიული	25	41°44'8"N 43°33'13"E	20	6
ახალქალაქის ანძა	107.4	FM	V	წრიული	500	41°20'52"N 43°25'34"E	60	8
ახალციხის ანძა	104.6	FM	V	წრიული	250	41°37'48"N 42°57'25"E	35	8
ფასანაური	107.4	FM	V	წრიული	250	42°21'00"N 44°41'03"E	30	6
გუდაური	101.6	FM	V	წრიული	25	42°29'20"N 44°30'02"E	30	6
სტეფანწმინდა, ელ.კავშირის ანძა	107.4	FM	V	წრიული	250	42°39'24"N 44°39'10"E	25	6
დმანისის ანძა	101.0	FM	V	წრიული	1000	41°22'38"N 44°12'52"E	150	8
დედოფლის წყაროს ანძა	100.6	FM	V	წრიული	1000	41°28'00"N 46°08'11"E	180	8
ჭიათურის ანძა	107.4	FM	V	წრიული	250	42°17'16"N 43°15'39"E	50	8

ზემოაღნიშნული გადამცემი სადგურების განთავსება შესაძლებელია მითითებული კოორდინატების მიმართ 500მ რადიუსის ფარგლებში, ზღვის დონიდან გადამცემი ანტენის დაკიდების სიმაღლის შენარჩუნებით (ცდომილება±5მ).

ვ) მაუწყებლობის გავრცელების გეოგრაფიული ზონა: გადამცემი სადგურების ტექნიკური პარამეტრების შესაბამისი მომსახურების სახმელეთო ტერიტორია, რომელიც პირობითად შემოსაზღვრულია ამ ტერიტორიაზე განთავსებული სადგურების მიერ შექმნილი სამაუწყებლო დონის სიგნალის ზღვრული მინიმალური მნიშვნელობის მქონე წერტილთა ერთობლიობის მომვლებით;

2. კერძო რადიომაუწყებლობის №B58 ლიცენზიას კომისიის 2011 წლის 30 დეკემბრის №820/6 გადაწყვეტილებით განესაზღვრული შემდეგი სალიცენზიო პირობებით:

ა) ლიცენზიის სახე: რადიომაუწყებლობა;

ბ) ლიცენზიის სახეობა: კერძო მაუწყებლობა;

გ) კერძო მაუწყებლობის ქვესახეობა: საერთო მაუწყებლობა;

დ) ლიცენზიის მოქმედების ვადა: 2021 წლის 31 დეკემბრამდე;

ე) მაუწყებლობის ენა/ენები: ქართული, სომხური, აზერბაიჯანული, რუსული, ინგლისური;

ვ)მაუწყებლობის ტექნიკური პარამეტრები და მაუწყებლობის გავრცელების გეოგრაფიული ზონა: რადიომაუწყებლობა 107,4 მგჰც სიხშირეზე 750 ვატი სიმძლავრის გადამცემის გამოყენებით, ქ.თბილისი;

კომისია აღნიშნავს, რომ კომისიის აპარატის სიხშირული სპექტრის მართვის დეპარტამენტის მიერ წარმოდგენილი სამსახურეობრივი ბარათის (№შ-10/6780-18 27/12/2018) თანახმად სიხშირეების შეცვლა შესაძლებელია მხოლოდ კერძო მაუწყებლობის №B75 ლიცენზიაში მითითებულ შემდეგ ქალაქებში, ლიცენზიაში განსაზღვრული ყველა სხვა ტექნიკური პარამეტრის შენარჩუნებით. კერძოდ:

1. თელავში 106.0 მჰც-ის ნაცვლად, შესაძლებელია 106.1 მჰც-ის გამოყენება ;

2. დედოფლისწყაროში 100.6 მჰც-ის ნაცვლად, შესაძლებელია 100.7 მჰც-ის გამოყენება;

3. გუდაურში 101.6 მჰც-ის ნაცვლად, შესაძლებელია 101.7 მჰც-ის გამოყენება

4. ზუგდიდში 103.6 მჰც-ის ნაცვლად, შესაძლებელია 103.7 მჰც-ის გამოყენება;

5. ქუთაისში 107.4 მჰც-ის ნაცვლად, შესაძლებელია 107.5 მჰც-ის გამოყენება;

6. ბორჯომში 107.4 მჰც-ის ნაცვლად, შესაძლებელია 107.5 მჰც-ის გამოყენება;

7. ახალქალაქში 107.4 მჰც-ის ნაცვლად, შესაძლებელია 107.5 მჰც-ის გამოყენება;

8. ფასანაურში 107.4 მჰც-ის ნაცვლად, შესაძლებელია 107.5 მჰც-ის გამოყენება;

9. სტეფანწმინდაში (ყაზბეგი) 107.4 მჰც-ის ნაცვლად, შესაძლებელია 107.5 მჰც-ის გამოყენება;

10. ჭიათურაში 107.4 მჰც-ის ნაცვლად, შესაძლებელია 107.5 მჰც-ის გამოყენება;

11. ბაკურიანი 107.0 მჰც-ის ნაცვლად, შესაძლებელია 107.1 მჰც-ის გამოყენება.

სამსახურებრივ ბარათში აღნიშნულია, რომ ზემოაღნიშნული რადიოსიხშირეების კენტი რიცხვით დაბოლოებული რესურსით ჩანაცვლება არ ზღუდავს კომისიის 2017 წლის 30 აპრილის 227/22 გადაწყვეტილებით დამტკიცებულ „87.5მჰც÷108მჰც სიხშირულ დიაპაზონში რადიომაუწყებლობის თავისუფალი სიხშირული რესურსის განაწილების შესახებ“ ამჟამად მოქმედ გეგმაში განსაზღვრული სიხშირული რესურსის გამოყენებას. რაც შეეხება №B58 ლიცენზიით ქ. თბილისში განსაზღვრული სიხშირის (107.4მჰც) კენტი მნიშვნელობით შეცვლის მოთხოვნას, იგი აზერბაიჯანის რესპუბლიკის უფლებამისილმა ორგანომ საერთაშორისო კოორდინაციის პროცედურის ფარგლებში არ დააკმაყოფილა.

კომისია აღნიშნავს, რომ „მაუწყებლობის შესახებ“ საქართველოს კანონის 45-ე მუხლის პირველი პუნქტის შესაბამისად, ლიცენზიის მოდიფიცირების საფუძველი შეიძლება იყოს:

ა) საქართველოს კანონმდებლობაში ან მაუწყებლობის სფეროს პრიორიტეტებში ცვლილებების ან/და დამატებების შეტანა;

ბ) კომისიის ან ლიცენზიის მფლობელის დასაბუთებული მოთხოვნა ლიცენზიაში ცვლილებების ან/და დამატებების შეტანის თაობაზე.

ლიცენზიის, ამავე ლიცენზიის მფლობელის განცხადების საფუძველზე მოდიფიცირების მოთხოვნის შემთხვევაში, კომისია ხელმძღვანელობს „მაუწყებლობის შესახებ“ საქართველოს კანონის 45-ე მუხლის მე-3 პუნქტით, რომლის შესაბამისადაც, აკრძალულია საეთერო მაუწყებლობის ლიცენზიის იმგვარად მოდიფიცირება, რომელიც გამოიწვევს ლიცენზიის სახეობის შეცვლას ან ლიცენზიით განსაზღვრული სამოქმედო ზონის სიდიდის ცვლილებას.

ზემოაღნიშნულიდან გამომდინარე, კომისიას მიაჩნია, რომ სახეზეა ”მაუწყებლობის შესახებ” საქართველოს კანონის 45-ე მუხლის პირველი პუნქტის ბ) ქვეპუნქტით გათვალისწინებული შემთხვევა: კომისიის და ლიცენზიის მფლობელის დასაბუთებული მოთხოვნა ლიცენზიაში ცვლილებების ან/და დამატებების შეტანის თაობაზე; ამავე დროს, შპს ტელე-რადიო კომპანია მწვანე ტალღის“ კერძო მაუწყებლობის №B75 ლიცენზიის მოდიფიცირების შემთხვევაში არ დაირღვევა „მაუწყებლობის შესახებ“ საქართველოს კანონის 45-ე მუხლის მე-3 პუნქტით დადგენილი შეზღუდვა.

„მაუწყებლობის შესახებ“ საქართველოს კანონის 38-ე მუხლის მე–9 პუნქტის შესაბამისად, მაუწყებლობის სფეროში ლიცენზიის მოდიფიცირება ხორციელდება საჯარო ადმინისტრაციული წარმოების წესით.

ყოველივე ზემოაღნიშნულის გათვალისწინებით, კომისიამ ,,მაუწყებლობის შესახებ” საქართველოს კანონის 38-ე მუხლის მე-9 პუნქტის, 45-ე მუხლის პირველი პუნქტის ბ) ქვეპუნქტის, საქართველოს ზოგადი ადმინისტრაციული კოდექსის 63-ე და 115-ე მუხლების შესაბამისად, კენჭისყრის შედეგად, ერთხმად

გ ა დ ა წ ყ ვ ი ტ ა:

1. დაიწყოს საჯარო ადმინისტრაციული წარმოება შპს ტელე-რადიო კომპანია მწვანე ტალღის“ კერძო მაუწყებლობის №B75 ლიცენზიის მოდიფიცირებისა და კომისიის 2015 წლის 16 იანვრის №29/6 გადაწყვეტილებაში ცვლილებების შეტანის მიზნით;

2. ზეპირი მოსმენის სხდომა გაიმართოს 2019 წლის 7 თებერვალს 15:00 სთ-ზე, ხოლო გადაწყვეტილების მიღება მოხდეს ზეპირი მოსმენის ჩატარებიდან 10 სამუშაო დღის ვადაში;

3. დაევალოს კომისიის ადმინისტრაციას:

ა) საჯარო გაცნობისათვის ცნობის გამოქვეყნება ინტერნეტში კომისიის ოფიციალურ ვებ-გვერდზე (ნ. შოვნაძე);

ბ) აღნიშნული გადაწყვეტილების დამოწმებული ასლის შპს ტელე-რადიო კომპანია მწვანე ტალღისთვის“ გაგზავნა (ნ. ჯავახიძე);

4. გადაწყვეტილება ცალკე გასაჩივრებას არ ექვემდებარება საქართველოს ზოგადი ადმინისტრაციული კოდექსის 177-ე მუხლის მე-4 ნაწილის შესაბამისად.

5. კონტროლი აღნიშნული გადაწყვეტილების შესრულებაზე დაევალოს კომისიის აპარატის ლიცენზირების, ავტორიზაციისა და ნებართვების დეპარტამენტს (მ. ქადეიშვილი).

კომისიის თავმჯდომარის მოვალეობის შემსრულებელი		მერაბ ქათამაძე
კომისიის წევრი		ვახტანგ აბაშიძე
კომისიის წევრი		ელისო ასანიძე