შპს „ტვ 25“-სთვის ადმინისტრაციული პასუხისმგებლობის დაკისრების თაობაზე

შპს „ტვ 25“-სთვის ადმინისტრაციული პასუხისმგებლობის დაკისრების თაობაზე

ავტორიზებული პირი: შპს „ტვ 25“

სამართალდარღვევა:  „მაუწყებლობის შესახებ“ საქართველოს კანონის 451 მუხლის მე-12 პუნქტის „ა“ ქვეპუნქტისა და 70-ე მუხლის პირველი პუნქტის დარღვევა

წარმოების დაწყების  საფუძველი:  საქართველოს კომუნიკაციების ეროვნული კომისიის აპარატის მედიამომსახურებების რეგულირების   დეპარტამენტის   მოხსენებითი   ბარათი     (N   25-10-2677;05.12.2025)

კომისიის სხდომის თარიღი: 2025 წლის 18 დეკემბერი 

I.აღწერილობითი   ნაწილი

1.საქართველოს კომუნიკაციების ეროვნული კომისიის (შემდგომში - კომისია) აპარატის მედიამომსახურებების რეგულირების დეპარტამენტის მოხსენებითი ბარათის  (N 25-10-2677; 05.12.2025) საფუძველზე,   „საქართველოს კომუნიკაციების ეროვნული   კომისიის  საქმიანობის მარეგულირებელი წესების“ 36-ე მუხლის მე-14 პუნქტის შესაბამისად, კომისიაში დაიწყო მარტივი ადმინისტრაციული წარმოება შპს „ტვ 25“-სთვის    ადმინისტრაციული  პასუხისმგებლობის დაკისრების თაობაზე მის მიერ საქართველოს კანონმდებლობის შესაძლო დარღვევის გამო.

2.მოხსენებითი ბარათიდან და თანდართული დოკუმენტაციიდან დგინდება, რომ შპს „ტვ 25“-ის ეთერში ახალი ამბების პროგრამა არ განთავსებულა, მაშინ, როდესაც შპს „ტვ 25“ ავტორიზებული პირია საერთო ტელემაუწყებლობაზე, „მაუწყებლობის შესახებ“ საქართველოს კანონის მე-2 მუხლის „ჯ“ ქვეპუნქტის შესაბამისად კი საერთო მაუწყებლობა გულისხმობს არანაკლებ  2 თემატიკის, მათ შორის, ახალი  ამბებისა და საზოგადოებრივ-პოლიტიკური  თემატიკის,  პროგრამებით მაუწყებლობას.

3.შპს „ტვ 25“-ისთვის ადმინისტრაციული პასუხისმგებლობის დაკისრების თაობაზე საკითხის განხილვის დღედ განისაზღვრა 2025 წლის 18 დეკემბერი, 15:00 საათი. აღნიშნულის შესახებ შპს „ტვ 25“-ს ეცნობა   წერილობითი   შეტყობინებით     (N გ-25-03/2958;     15/12/2025) და  მოწვეულ იქნა ადმინისტრაციულ წარმოებაში მონაწილეობის მისაღებად. კომპანიას ასევე განემარტა საქართველოს ზოგადი ადმინისტრაციული კოდექსის 98-ე და 99-ე მუხლებით  გათვალისწინებული მტკიცებულებებისა    და    შუამდგომლობების    წარმოდგენის,    აგრეთვე  საქმის  გარემოებათა გამოკვლევისა და ადმინისტრაციული წარმოების მასალების გამოთხოვის უფლების თაობაზე.

4.    კომისიის  2025  წლის  18  დეკემბრის  სხდომას  ესწრებოდა  შპს  „ტვ  25“-ის  წარმომადგენელი გ. სურმანიძე, რომელმაც აღნიშნა, რომ ახალი ამბების პროგრამა მაუწყებლის ეთერში გადაწყვეტილების მიღების დღესაც არ გადის. კომპანია მუშაობს იმისთვის, რომ მომავალი წლიდან საინფორმაციო გადაცემა ეთერში გავიდეს.

II.       მარეგულირებელი კანონმდებლობა

5.    „მაუწყებლობის  შესახებ“  საქართველოს  კანონის  მე-3  მუხლის  პირველი  პუნქტის  თანახმად, მედიამომსახურებისა და ვიდეოგაზიარების პლატფორმის მომსახურების სფეროებში მოქმედ საქართველოს კანონმდებლობას შეადგენს საქართველოს კონსტიტუცია, საქართველოს საერთაშორისო ხელშეკრულებები, საქართველოს ორგანული კანონი „საქართველოს საარჩევნო კოდექსი“, ეს კანონი, „ეროვნული მარეგულირებელი ორგანოების შესახებ“ და „საავტორო და მომიჯნავე უფლებების შესახებ“ საქართველოს კანონები და სხვა საკანონმდებლო და კანონქვემდებარე ნორმატიული აქტები.

6.    „მაუწყებლობის    შესახებ“    საქართველოს    კანონის მე-5  მუხლის  მე-3  პუნქტის  „ვ“ ქვეპუნქტის თანახმად, მედიამომსახურებისა და ვიდეოგაზიარების პლატფორმის მომსახურების სფეროებში კომისიის ერთ-ერთი ფუნქციაა მედიამომსახურებისა და ვიდეოგაზიარების პლატფორმის მომსახურების სფეროებში მოქმედი საქართველოს კანონმდებლობის მოთხოვნების შესრულებაზე ზედამხედველობა და მისი კონტროლი, ამ მოთხოვნათა დარღვევის შემთხვევაში შესაბამისი სანქციების დაკისრება.

7.    „მაუწყებლობის შესახებ“  საქართველოს    კანონის  მე-2  მუხლის  „ს1“ პუნქტის  თანახმად, მედიამომსახურება არის მედიამომსახურების მიმწოდებლის სარედაქციო პასუხისმგებლობით მიწოდებული  მომსახურება/განხორციელებული  საქმიანობა −  აუდიოვიზუალური მედიამომსახურება და რადიომაუწყებლობა. ამავე მუხლის „ს2“ პუნქტის თანახმად კი აუდიოვიზუალური მედიამომსახურება არის მედიამომსახურების მიმწოდებლის სარედაქციო პასუხისმგებლობით მიწოდებული მომსახურება, რომლის ან რომლის განუყოფელი ნაწილის ძირითადი მიზანია ელექტრონული საკომუნიკაციო ქსელებით ფართო საზოგადოებისთვის პროგრამების მიწოდება მისი ინფორმირების, გართობის ან განათლების მიზნით. ასეთი აუდიოვიზუალური მედიამომსახურება არის ამ კანონით გათვალისწინებული ტელემაუწყებლობა ან გამოძახებით აუდიოვიზუალური მედიამომსახურება, აგრეთვე აუდიოვიზუალური სარეკლამო კომუნიკაცია.

8.    „მაუწყებლობის   შესახებ“   საქართველოს   კანონის   მე-2   მუხლის   „ტ“   ქვეპუნქტის   თანახმად, მაუწყებელი  არის  საზოგადოებრივი მაუწყებელი,  საზოგადოებრივი მაუწყებლის აჭარის ტელევიზია და რადიო, ამ კანონის საფუძველზე ტელემაუწყებლობის ან/და რადიომაუწყებლობის განმახორციელებელი ლიცენზიის მფლობელი ან/და ავტორიზებული პირი.

9.    „მაუწყებლობის შესახებ“ საქართველოს კანონის მე-2 მუხლის „ჯ“ ქვეპუნქტის თანახმად, საერთო მაუწყებლობა არის არანაკლებ 2 თემატიკის, მათ შორის, ახალი ამბებისა და საზოგადოებრივ- პოლიტიკური თემატიკის, პროგრამებით მაუწყებლობა.

10. „მაუწყებლობის შესახებ“ საქართველოს კანონის 451  მუხლის მე-12 პუნქტის „ა“ ქვეპუქნტის თანახმად, ავტორიზებული პირი ვალდებულია დაიცვას მედიამომსახურებისა და ვიდეოგაზიარების პლატფორმის მომსახურების სფეროში მოქმედი საქართველოს კანონმდებლობა, მათ შორის,  კომისიის დადგენილებები  და  გადაწყვეტილებები,  მედიამომსახურებისა  და ვიდეოგაზიარების პლატფორმის მომსახურების სფეროში მოქმედ საქართველოს კანონმდებლობაში ცვლილებების შეტანის შემთხვევაში უზრუნველყოს ავტორიზებული საქმიანობის მათთან შესაბამისობა.

11. „მაუწყებლობის შესახებ“ საქართველოს კანონის 70-ე მუხლის პირველი პუნქტის თანახმად, მედიამომსახურების მიმწოდებელი ვალდებულია უზრუნველყოს მის მიერ გადაცემული/გავრცელებული პროგრამის, რეკლამისა და სპონსორების შესახებ ინფორმაციის საქართველოს კანონმდებლობასა და ლიცენზიის/ავტორიზაციის პირობებთან შესაბამისობა. ვიდეოგაზიარების პლატფორმის მომსახურების მიმწოდებელი ვალდებულია განახორციელოს ამ კანონით გათვალისწინებული ღონისძიებები, რომლებიც მას საშუალებას აძლევს, უზრუნველყოს მის მიერ გავრცელებული პროგრამის, მომხმარებლის გენერირებული ვიდეორგოლისა და აუდიოვიზუალური სარეკლამო კომუნიკაციის საქართველოს კანონმდებლობასთან შესაბამისობა.

12. „მაუწყებლობის შესახებ“ საქართველოს კანონის 71-ე მუხლის პირველი პუნქტის შესაბამისად, მედიამომსახურების მიმწოდებლის ან ვიდეოგაზიარების პლატფორმის მომსახურების მიმწოდებლის მიერ საქართველოს კანონმდებლობის დარღვევის, კომისიის გადაწყვეტილების შეუსრულებლობის ან ლიცენზიის/ავტორიზაციის პირობების დარღვევის შემთხვევაში კომისია ვალდებულია განიხილოს შესაბამისი საკითხი. დარღვევის ფაქტის დადასტურების შემთხვევაში კომისია უფლებამოსილია დამრღვევი წერილობით გააფრთხილოს. კომისიის მიერ სანქციის გამოყენების მიზანი უნდა იყოს დარღვევის აღმოფხვრა ან პრევენცია. კომისია დამრღვევს დარღვევის აღმოსაფხვრელად ან მისი პრევენციისთვის ღონისძიებათა განსახორციელებლად გონივრულ ვადას განუსაზღვრავს.

13. „საქართველოს კომუნიკაციების ეროვნული კომისიის საქმიანობის მარეგულირებელი წესების დამტკიცების თაობაზე“ საქართველოს კომუნიკაციების ეროვნული კომისიის 2003 წლის 27 ივნისის N 1 დადგენილებით დამტკიცებული „საქართველოს კომუნიკაციების ეროვნული კომისიის საქმიანობის  მარეგულირებელი  წესების”  (დანართი  N1)  მე-16  მუხლის  მე-5  პუნქტის  თანახმად „კომისიის მიერ გაგზავნილი ყოველგვარი შეტყობინება და კომისიის მიერ მიღებული გადაწყვეტილება იგზავნება მატერიალური ან ელექტრონული რეგისტრირებული საფოსტო გზავნილის მეშვეობით. მატერიალური საფოსტო გზავნილი იგზავნება დამტარებლის ან საფოსტო მომსახურების განმახორციელებელი პირის მეშვეობით.“. ხოლო ამავე მუხლის მე-9 პუნქტის თანახმად „კორესპოდენციის ელექტრონული გზავნილით გაგზავნის შემთხვევაში, დოკუმენტი ჩაბარებულად ჩაითვლება ადრესატის მიერ მისი მიღების, როგორც პირდაპირ, აქტიურად გამოხატული ქმედებით, ასევე, ავტომატური საშუალებით დადასტურების შემთხვევაშიც“.

III.       სამოტივაციო ნაწილი

1.    შესწავლილი მტკიცებულებები

14.  კომისიის აპარატის მედიამომსახურებების რეგულირების დეპარტამენტის მოხსენებითი ბარათი (N25-10-2677; 05.12.2025);

15.  კომისიის 2025 წლის 17 ნოემბრის N გ-25-04/2692 წერილი მაუწყებლებს;

16.  შპს „ტვ 25“-ის პასუხი კომისიას (კომისიაში რეგისტრაციის N შ-25-6/4781; 20.11.2025);

17.  შპს „ტვ 25“-ისთვის გაგზავნილი შეტყობინება (N გ-25-03/2958; 15/12/2025) კომისიის 2025 წლის 18 დეკემბრის  სხდომაზე მოწვევის შესახებ  და აღნიშნული შეტყობინების ჩაბარების დამადასტურებელი დოკუმენტაცია;

18.  მეწარმეთა და არასამეწარმეო (არაკომერციული) იურიდიული პირების რეესტრიდან და კომისიის ავტორიზებულ პირთა უწყებრივი რეესტრიდან შპს „ტვ 25“-ის შესახებ მონაცემი;

19.  შპს „ტვ 25“-ის წარმომადგენლის გ. სურმანიძის ახსნა-განმარტება მიცემული კომისიის 2025 წლის 18 დეკემბრის სხდომაზე.

2.    დადგენილი ფაქტობრივი გარემოებები

20.  შპს    „ტვ    25“    (ს/კ    245414680)    მაუწყებლობის    სფეროში    ავტორიზებული    პირია  (სახე - ტელემაუწყებლობა; სახეობა - კერძო მაუწყებლობა; ქვესახეობა - B.1.2.1 საერთო ტელემაუწყებლობა). მტკიცებულება: მონაცემი კომისიის უწყებრივი რეესტრიდან შპს „ტვ 25“-ის შესახებ.

21. შპს „ტვ 25“-ის ეთერში ახალი ამბების პროგრამა 2025 წლის 1 იანვრიდან არ განთავსებულა. მაუწყებლის ეთერში ახალი ამბების პროგრამა არც გადაწყვეტილების მიღების დღისთვის არ არის განთავსებული.

მტკიცებულება: კომისიის აპარატის მედიამომსახურებების რეგულირების დეპარტამენტის მოხსენებითი ბარათი (N 25-10-2677; 05.12.2025); შპს „ტვ 25“-ის პასუხი კომისიას (კომისიაში რეგისტრაციის N შ-25-6/4781; 20.11.2025); შპს „ტვ 25“-ის წარმომადგენლის გ. სურმანიძის ახსნა- განმარტება მიცემული კომისიის 2025 წლის 18 დეკემბრის სხდომაზე.

22. შპს   „ტვ   25“-ს   ბოლო   ერთი   წლის   განმავლობაში   ადმინისტრაციული   პასუხისმგებლობა მსგავსი/ანალოგიური შინაარსის დარღვევისთვის არ დაკისრებია.

მტკიცებულება: კომისიის ავტორიზებულ პირთა უწყებრივი რეესტრიდან შპს „ტვ 25“-ის შესახებ მონაცემები.

3.    სამართლებრივი შეფასება

23.  შპს „ტვ 25“, როგორც საერთო მაუწყებელი, ვალდებული იყო ემაუწყებლა არანაკლებ 2 თემატიკის, მათ შორის, ახალი ამბებისა და საზოგადოებრივ-პოლიტიკური თემატიკის პროგრამებით. შესაბამისად, შპს „ტვ 25“-ის მიერ ახალი ამბების პროგრამის ეთერში განუთავსებლობით დარღვეულია „მაუწყებლობის შესახებ“ საქართველოს კანონის 451 მუხლის მე-12 პუნქტის „ა“ ქვეპუნტი და 70-ე მუხლის პირველი პუნქტი.

4.    პასუხისმგებლობა და ვალდებულებები

24. შპს „ტვ 25“-ის მიერ მიერ „მაუწყებლობის შესახებ“ საქართველოს კანონის ზემოთ აღნიშნული მოთხოვნების დარღვევა მისთვის პასუხისმგებლობის დაკისრების საფუძველია.

25. თავის მხრივ, „მაუწყებლობის შესახებ“ საქართველოს კანონის 71-ე მუხლის პირველი პუნქტის თანახმად, მედიამომსახურების მიმწოდებლის ან ვიდეოგაზიარების პლატფორმის მომსახურების მიმწოდებლის მიერ საქართველოს კანონმდებლობის დარღვევის, კომისიის გადაწყვეტილების შეუსრულებლობის ან ლიცენზიის/ავტორიზაციის პირობების დარღვევის შემთხვევაში კომისია ვალდებულია განიხილოს შესაბამისი საკითხი. დარღვევის ფაქტის დადასტურების შემთხვევაში კომისია უფლებამოსილია დამრღვევი წერილობით გააფრთხილოს. კომისიის მიერ სანქციის გამოყენების მიზანი უნდა იყოს დარღვევის აღმოფხვრა ან პრევენცია. კომისია დამრღვევს დარღვევის აღმოსაფხვრელად ან მისი პრევენციისთვის ღონისძიებათა განსახორციელებლად გონივრულ ვადას განუსაზღვრავს.

26.  გამომდინარე იქიდან, რომ შპს „ტვ 25“-ის მიმართ ბოლო ერთი წლის განმავლობაში იგივე/მსგავსი შინაარსის დარღვევის ჩადენისთვის გამოყენებული არ ყოფილა ადმინისტრაციული პასუხისმგებლობის რომელიმე სახე, კომისია მიზანშეწონილად მიიჩნევს შპს „ტვ 25“-ს მიეცეს წერილობითი გაფრთხილება.