ComCom-ის „მედიაწიგნიერების ოლიმპიადა“ ევროპული ფესტივალის „VOICES“ გამარჯვებულია

კომუნიკაციების კომისიის პროექტმა „მედიაწიგნიერების ოლიმპიადა“ ევროპულ ფესტივალზე - „Voices - European Festival of Journalism and Media Freedom“ მედიაწიგნიერების კატეგორიაში გაიმარჯვა. კომუნიკაციების კომისია გახდა პირველი მარეგულირებელი ორგანიზაცია, რომელმაც „Voices Awards“-ზე ამ კატეგორიაში გაიმარჯვა, ხოლო საქართველო - პირველი ევროკავშირის არაწევრი ქვეყანა, რომელმაც ეს წარმატება მოიპოვა. წინა წლებში მედიაწიგნიერების კატეგორიის გამარჯვებულები იყვნენ ისეთი ქვეყნები, როგორებიც არიან საფრანგეთი, გერმანია, საბერძნეთი, ჩეხეთი, იტალია, შვედეთი, ესტონეთი, ბელგია და ავსტრია. 

ფესტივალი ჟურნალისტიკის, მედიის თავისუფლებისა და მედიაწიგნიერების საუკეთესო საერთაშორისო პროექტებისა თუ ინიციატივების გამოვლენას ისახავს მიზნად. 

„Voices Awards“-ის მედიაწიგნიერების კატეგორია აერთიანებს ინიციატივებსა და პროექტებს, რომლებიც ხელს უწყობენ კრიტიკული აზროვნების განვითარებას, ჯანსაღ საინფორმაციო ეკოსისტემას და მედიაწიგნიერების თვალსაზრისით მოქალაქეების ჩართულობასა და ცნობიერების ამაღლებას სწრაფად ცვალებად მედიასივრცეში. აღნიშნულ  კატეგორიაში პროექტები ფასდებოდა რელევანტურობის, გავლენის მასშტაბურობის, ეფექტიანობის, ინოვაციურობის, მდგრადობის, ეთიკური სტანდარტებისა და საზოგადოებრივი ინტერესის კრიტერიუმებით. 

ჟიური შედგებოდა ევროპის წამყვანი ორგანიზაციების ხელმძღვანელებისა და ექსპერტებისგან, რაც გამარჯვებულ პროექტს საერთაშორისო აღიარებას ანიჭებს. 

შეგახსენებთ, რომ ComCom-ის „მედიაწიგნიერების ოლიმპიადა“ ყოველწლიურად UNESCO-ს მედია და ინფორმაციული წიგნიერების გლობალური კვირეულის ფარგლებში, საქართველოს განათლების, მეცნიერებისა და ახალგაზრდობის სამინისტროს მხარდაჭერით ტარდება. კონკურსი მიზნად ისახავს სასკოლო საზოგადოებაში მედიაწიგნიერების შესახებ ცნობიერების ამაღლებას. კონკურსის ფარგლებში, მასწავლებლითა  და მოსწავლეებით დაკომპლექტებული გუნდები მედიაწიგნიერების საკითხების გარშემო ამზადებენ ნამუშევარს, ხოლო ყველაზე შემოქმედებითი და ინფორმაციული ნაშრომის ავტორთა სკოლებში  კომუნიკაციების კომისია მედიაწიგნიერების ლაბორატორიას აწყობს, რაც სკოლის ყველა მოსწავლეს მაღალი ხარისხის მედიაპროდუქტის მომზადების შესაძლებლობას აძლევს. კონკურსი ComCom-მა უკვე 2-ჯერ ჩაატარა და ისეთი მაღალტექნოლოგიური პრიზები, როგორებიცაა ლეპტოპი, ინტერაქციული დაფა, მიკროფონი, ლედ განათება, მობილურის შტატივი, მაგიდა და თემატური ბანერი 4 სკოლას გადასცა. საგულისხმოა ისიც, რომ „მედიაწიგნიერების ოლიმპიადაში“ ქვეყნის მასშტაბით 5000-მდე მოსწავლე და 800-მდე მასწავლებელი მონაწილეობდა. 

„Voices Awards“-ის დაჯილდოვება 2026 წლის 11 მარტს, ფლორენციაში გაიმართება.