საქართველოს კომუნიკაციების ეროვნულმა კომისიამ შპს „ჯეოსელის“ კომერციული რეკლამის შესწავლა დაიწყო.

წამყვანი მაუწყებლების ეთერში სულ რამდენიმე დღის წინ გამოჩნდა მობილური ოპერატორის „ჯეოსელის“ სარეკლამო რგოლი, რომელშიც რამდენიმე ტელეკომპანიის საინფორმაციო და საზოგადოებრივ-პოლიტიკური პროგრამების წამყვანები იღებენ მონაწილეობას. მაუწყებლობის შესახებ საქართველოს კანონის თანახმად, საინფორმაციო და საზოგადოებრივ-პოლიტიკური პროგრამების წამყვანების მონაწილეობა კომერციულ რეკლამაში აკრძალულია.

კომისია აღნიშნულ სარეკლამო რგოლთან დაკავშირებით დეტალურ ინფორმაციას გამოითხოვს, როგორც შპს „ჯეოსელისგან“ ასევე, ტელეკომპანიებისგან და საკითხის შესწავლის შემდეგ დაიწყებს შესაბამის ადმინისტრაციულ წარმოებას.