კომისიამ შპს „მმ ნეთვორქსის“ წილის 100%-ის შპს „თრიალეთი-ნეტის“ მიერ შეძენასა და კომპანიების შერწყმის შესახებ წინასწარი თანხმობა გასცა
საქართველოს კომუნიკაციების ეროვნულ კომისიას ერთობლივი წერილით შპს „თრიალეთი-ნეტმა“ და შპს „მმ ნეთვორქსმა“ მიმართეს. კომპანიებმა შპს „მმ ნეთვორქსის“ წილის 100%-ის შპს „თრიალეთი-ნეტის“ მიერ შეძენასთან და, შემდგომ, შპს „თრიალეთი-ნეტის“ და შპს „მმ ნეთვორქსის“ შერწყმის განზრახვასთან დაკავშირებით, კომისიისაგან წინასწარი თანხმობა ითხოვეს.
შპს „თრიალეთი-ნეტი“ და შპს „მმ ნეთვორქსის“ საქმიანობის ძირითად სახეს წარმოადგენს აბონენტების ინტერნეტ მომსახურება WiFi ტექნოლოგიის გამოყენებით. შპს „თრიალეთი-ნეტი“ საქმიანობს გორისა და ქარელის მუნიციპალიტეტებში, ხოლო შპს „მმ ნეთვორქსი“ გორის მუნიციპალიტეტში. აღნიშნული წერილის საფუძველზე კომისიამ საქმის შესწავლა დაიწყო და დაადგინა, რომ შპს „მმ ნეთვორქსის“ წილის 100%-ის შპს „თრიალეთი-ნეტის“ მიერ შეძენა, ასევე შპს „თრიალეთი-ნეტის“ და შპს „მმ ნეთვორქსის“ შერწყმა ვერ მოახდენს რაიმე გავლენას ელექტრონულ საკომუნიკაციო ბაზარზე არსებულ კონკურენციაზე. აღნიშნულიდან გამომდინარე კომპანიებმა კომისიისგან წინასწარი თანხმობა მიიღეს.