საქართველოს კომუნიკაციების ეროვნულმა კომისიამ შესაბამისი ავტორიზაციის გარეშე მაუწყებლობის ტრანზიტის მომსახურების გაწევის გამო „შპს „TECHMOMAX LLP“ 5 000 ლარის ოდენობით ჯარიმა მეორედ დააკისრა.

კომისიამ შპს „TECHNOMAX  LLP”-ს მაუწყებლობის ტრანზიტზე ავტორიზაცია დენადი ხასიათის დარღვევის გამო   2016 წლის 31 მაისს შეუჩერა.

მაუწყებლობის ტრაზიტის მომსახურებაზე ავტორიზაციის შეჩერებამდე შპს „TECHNOMAX LLP“ კომისიამ არაერთხელ დააჯარიმა. თავდაპირველად, 2015 წლის 1 ოქტომბერს კომპანიას შესაბიმისი ლიცენზიისა და ავტორიზაციის გარეშე ელექტრონულ-საკომუნიკაციო მომსახურების გაწევის გამო საქართველოს „ადმინისტრაციულ სამართალდარღვევათა კოდექსის“ 144¹ მუხლით გათვალისწინებული ჯარიმა 5 000 ლარის ოდენობით დაეკისრა. მოგვიანებით კომპანიამ მაუწყებლობის ტრანზიტის მომსახურებაზე გაიარა ავტორიზაცია, თუმცა კომპანიას საავტორო და მომიჯნავე უფლებების დარღვევის გამო  სანქცია 2016 წლის გაზაფხულზე  კიდევ ორჯერ დაეკისრა, რადგან შპს „TECHNOMAX LLP“ მიერ კომისიაში წარმოდგენილი ოფშორულ ზონაში რეგისტრირებულ კომპანიასთან დადებული ხელშეკრულება საავტორო და მომიჯნავე უფლებების თაობაზე არ აღმოჩნდა საქართველოს ტერიტორიაზე მოქმედი. აღნიშნული კომპანიის მიერ საავტორო და მომიჯნავე უფლებების დარღვევის ფაქტთან დაკავშირებით კომისიაში მოქმედი ოპერატორების, შესაბამისი სამაუწყებლო არხების რეტრანსლირების პირველადი უფლების მფლობელი კომპანიების და უცხოური არხების დილერი კომპანიების საჩივრები იყო წარმოდგენილი (სს“სილქნეტი“, შპს „კავკასუს ონლაინი“, „საქართველოს საკაბელო ქსელების კავშირი“, ასევე “EuroNews”, “National Geographic”, “Fox”, „Discavery“ და სხვა).

კომისიის 2016 წლის 31 მაისის გადაწყვეტილება შპს „TECHNOMAX  LLP”-სთვის მაუწყებლობის ტრანზიტის მომსახურებაზე ავტორიზაციის შეჩერების თაობაზე კომპანიამ თბილისის საქალაქო სასამართლოში გაასაჩივრა. ორი ინსტანციის (საქალაქო და სააპელაციო) განხილვის შემდეგ სასამართლომ კომისიის გადაწყვეტილება შპს „TECHNOMAX  LLP”-სთვის ავტორიზაციის შეჩერების თაობაზე ძალაში დატოვა.

კომისიის აპარატის აუდიო-ვიზუალური მომსახურებების რეგულირების დეპარტამენტის მონიტორინგის ჯგუფმა შპს „TECHNOMAX  LLP” 2016 წლის 29 დეკემბერს შეამოწმა, რის შედეგადაც დადგინდა, რომ კომპანია მაუწყებლობის ტრანზიტის მომსახურებას შესაბამისი ავტორიზაციის გარეშე კვლავ ეწევა, რაც საფუძვლად დაედო შპს „TECHNOMAX  LLP”-ისთვის საქართველოს „ადმინისტრაციულ სამართალდარღვევათა კოდექსის“ 144¹ მუხლით გათვალისწინებული  ჯარიმის,   5 000 ლარის ოდენობით, ხელმეორედ დაკისრებას.

ამავე გადაწყვეტილების თანახმად, დენადი სახის დარღვევის გამო და, ასევე, საკითხის კომპლექსურობიდან გამომდინარე ზემოთხსენებული საქმის მასალები შემდგომი რეაგირებისთვის  შესაბმის კომპეტენტურ ორგანოებს გადაეცემა.

გადაწყვეტილების ვრცელი ვერსია ხელმისაწვდომია კომისიის გადაწყვეტილებების გვერდზე.