კომისიაში .გე დომენის ადმინისტრატორსა და საქართველოში ჰოსტინგით მომსახურებაზე ავტორიზებულ პირებს შორის შეხვედრა გაიმართა
საქართველოს კომუნიკაციების ეროვნულ კომისიაში .გე დომენის ადმინისტრატორს - საინფორმაციო ტექნოლოგიების განვითარების ცენტრსა (ITDC) - და საქართველოში ჰოსტინგით მომსახურებაზე ავტორიზებულ პირებს შორის შეხვედრა გაიმართა.
შეხვედრის მიზანი იყო საქართველოში ახალი, ადმინისტრატორ-რეგისტრატორის მოდელის დანერგვის დაანონსება და .გე ზონაში დომენური სახელების პოტენციური რეგისტრატორებისათვის რეგისტრაციის წესებისა და პირობების გაცნობა.
ადმინისტრატორ-რეგისტრატორის მოდელი გულისხმობს იმას, რომ აბონენტი (რეგისტრანტი) სასურველი დომენური სახელის დარეგისტრირებას განახორციელებს არა უშუალოდ ადმინისტრატორთან, არამედ რეგისტრატორების მეშვეობით. აღნიშნული მოდელი რეკომენდებულია ICANN-ის (მინიჭებული სახელებისა და ნომრების ინტერნეტ-კორპორაცია) მიერ და საუკეთესო საერთაშორისო პრაქტიკას წარმოადგენს. ადმინისტრატორ-რეგისტრატორის მოდელი ხელს უწყობს ყველა რეგისტრატორის ერთნაირ პირობებში ჩაყენებას, ჯანსაღი კონკურენციის პირობებში ბაზრის უკეთ განვითარების მიზნით.
შეხვედრაზე მხარეებმა სამომავლო თანამშრომლობის სამართლებრივ, ტექნიკურ და ფინანსურ საკითხებზე ისაუბრეს. კომპანიების - “პროსერვისისა“ და „გრენას“ წარმომადგენლებმა .გე დომენის ზონაში რეგისტრატორობის სურვილი გამოთქვეს.
ქვეყანასთან ასოცირებული ეროვნული ზედა დონის დომენი .გე საქართველოს მოენიჭა მინიჭებული სახელებისა და ნომრების ინტერნეტ-კორპორაციის მიერ. .გე დომენის ადმინისტრატორია საინფორმაციო ტექნოლოგიების განვითარებათა ცენტრი (ITDC).
.გე დომენის ზონაში ქართულენოვანი ინტერნეტ-მისამართების გამოყენება 2016 წლის შემოდგომიდან გახდება შესაძლებელი.