კომისიის აპარატის რადიოსიხშირეთა მართვის დეპარტამენტის უფროსი სერგო შავგულიძე ITU-R SG5 თავმჯდომარის მოადგილედ აირჩიეს
საქართველოს კომუნიკაციების ეროვნული კომისიის აპარატის რადიოსიხშირეთა მართვის დეპარტამენტის უფროსი, ტექნიკურ მეცნიერებათა დოქტორი, პროფესორი სერგო შავგულიძე ტელეკომუნიკაციის საერთაშორისო გაერთიანების რადიოსაკომუნიკაციო სექტორის მე-5 შემსწავლელი ჯგუფის (ITU-R SG5) თავმჯდომარის მოადგილედ აირჩიეს.
არჩევნები შვეიცარიაში, ქალაქ ჟენევაში ტელეკომუნიკაციის საერთაშორისო გაერთიანების (ITU) მიერ ორგანიზებული რადიოკომუნიკაციის მსოფლიო ასამბლეის (RA-2015) ფარგლებში გაიმართა. ასამბლეაზე საქართველოს დელეგაციას სერგო შავგულიძე ხელმძღვანელობს.
ITU-R-ის შემსწავლელი ჯგუფები ფორმირდება რადიოკომუნიკაციის მსოფლიო ასამბლეებზე და ისინი ასამბლეებს შორის პერიოდში ფუნქციონირებენ, მათი დანიშნულებაა შეიმუშაონ რეკომენდაციების პროექტები, რომლებიც შემდგომში განიხილება და მტკიცდება ITU-ს წევრი ქვეყნების მიერ. ITU-R SG5 ჯგუფი შეისწავლის სისტემებსა და ქსელებს ფიქსირებული, მობილური, რადიოდეტერმინაციის, სამოყვარულო და სამოყვარულო-თანამგზავრული სამსახურებისათვის.
საქართველოს კომუნიკაციების ეროვნული კომისია ულოცავს ბატონ სერგო შავგულიძეს საპატიო პოსტზე არჩევას და უსურვებს წარმატებულ საქმიანობას. აღსანიშნავია, რომ ITU-ს არჩევად ორგანოებში საქართველოს წარმომადგენლის არჩევის პირველი შემთხვევაა.