შპს „ომეგა“ და შპს “სტერეო+“ საერთო ტელემაუწყებლობის ნაცვლად მუსიკალურ-გასართობი პროგრამებით იმაუწყებლებენ, შპს „საფერავი ტვ“ კი საერთო ტელემაუწყებელი გახდა
საქართველოს კომუნიკაციების ეროვნულმა კომისიამ ტელეკომპანიების შპს „ომეგას“, შპს „სტერეო+“-ის და შპს „საფერავი ტვ“-ს განცხადებების საფუძველზე მათი ტელემაუწყებლობაზე ავტორიზაციების მოდიფიცირება განახორციელა.
კერძო საერთო ტელემაუწყებლობაზე ავტორიზებულმა პირებმა შპს „ომეგამ“ და შპს „სტერეო+“-მა სპეციალიზებული - მუსიკალურ/გასართობი პროგრამებით მაუწყებლობის ნებართვა მოითხოვეს, საერთო (საინფორმაციო/საზოგადოებრივ-პოლიტიკური) ტელემაუწყებლობის ნაცვლად.
შპს „საფერავი ტვ“-მ კი სპეციალიზებულის ნაცვლად საერთო ტელემაუწყებლობის უფლების მისაღებად მოითხოვა ავტორიზაციის მოდიფიცირება.
კომისიამ სამივე კომპანიის მოთხოვნა დააკმაყოფილა და კომისიის უწყებრივ რეესტრში შესაბამისი ცვლილებები შეიტანა.