საქართველოს კომუნიკაციების ეროვნული კომისიის თავმჯდომარე, ვახტანგ აბაშიძე, ლონდონში, 2015 წლის 11 დეკემბერს, დამოუკიდებელი მარეგულირებელი ორგანოების ჯგუფის (Independent Regulators Group - IRG) წევრი მარეგულირებლების თავმჯდომარეების სამუშაო შეხვედრაში მონაწილეობს. საქართველოს კომუნიკაციების ეროვნული კომისია სამუშაო შეხვედრას ევროგაერთიანებისა და აღმოსავლეთ პარტნიორობის ქვეყნების ელექტრონული კომუნიკაციების მარეგულირებელი ორგანოების ქსელის (EU and Eastern Partnership Electronic Communications Regulators Network - EaPeReg) 2015 წლის თავმჯდომარის რანგში ესწრება.

შეხვედრა იმართება ელექტრონული კომუნიკაციების ევროპული მარეგულირებლების გაერთიანების (Body of European Regulators for Electronic Communications - BEREC) პლენარული სესიის ფარგლებში. შეხვედრის თემაა საერთაშორისო როუმინგული მომსახურება - ევროკავშირის არაწევრი ქვეყნების პერსპექტივები.

ევროკომისიამ დააანონსა 2017 წლისთვის როუმინგული მომსახურების დერეგულაცია და ამ სერვისისთვის დამატებითი საფასურის გაუქმება. EaPeReg ქსელის 2015 წლის 5 ნოემბრის პლენარული სესიის გადაწყვეტილებით, ქსელის ფარგლებში იქმნება საექსპერტო სამუშაო ჯგუფი, რომელიც აღმოსავლეთ პარტნიორობის ქვეყნებში საერთაშორისო როუმინგული მომსახურების ერთიანი სივრცის შექმნასა და  ევროპის ერთიან სივრცესთან ჰარმონიზაციის საკითხებზე იმუშავებს.