კომუნიკაციების კომისიის მედიასკოლა ჟურნალისტიკით დაინტერესებული ადამიანებისთვის „მედიასკოლის სტუდიის“ 4 თვიან ინტენსიურ პრაქტიკულ კურსზე მიღებას უკვე მეორედ აცხადებს. ინტენსიური კურსი ნებისმიერი მიმართულების კურსდამთავრებულს ან III და IV კურსის სტუდენტებს აძლევს უნიკალურ შესაძლებლობას, სრულიად უფასოდ, პროფესიონალი მენტორების დახმარებით, სპეციალურად მათთვის შექმნილ საინფორმაციო სამსახურში შეისწავლონ  მედიაპროდუქტების დამოუკიდებლად შექმნა და შეავსონ მედიაპორტფელი. კერძოდ, კურსის ფარგლებში, მონაწილეები მოამზადებენ გადაცემებს, რადიო და სატელევიზიო სიუჟეტებს, გარდა ამისა, ისწავლიან ახალი ამბების თხრობას, ინტერვიუს ხელოვნებას, ვიდეოგადაღებასა და მონტაჟს, ასევე, ფროდაქშენს, პროგრამირებასა და მულტიმედია ფორმატებზე მუშაობას.

მსურველები „მედიასკოლის სტუდიის“ კურსზე მოხვედრას სამ ეტაპიანი შესარჩევი კონკურსის გავლის შემდეგ შეძლებენ. პირველი ეტაპისთვის, დაინტერესებულმა პირებმა 16 თებერვლამდე უნდა გამოაგზავნონ განცხადება და გაიარონ რეგისტრაცია. მეორე ეტაპის ფარგლებში, 18 თებერვალს, ჩატარდება ტესტირება. ბოლო ეტაპზე კი, 24 და 25 თებერვალს, შერჩეული კანდიდატები ზეპირ გასაუბრებას გაივლიან და სატესტო ვიდეოჩაწერა ჩაუტარდებათ. სამივე ეტაპის წარმატებით გადალახვის შემთხვევაში, მონაწილეები 4 თვის განმავლობაში, პრაქტიკოსი მედია პროფესიონალებით დაკომპლექტებული ჯგუფისგან პრაქტიკულ ცოდნას, ხოლო კურსის დასასრულს - შესაბამის სერტიფიკატს მიიღებენ. აღსანიშნავია, რომ მედიააკადემია წარმატებულ კურსდამთავრებულებს პოტენციურ დამსაქმებლებთან რეკომენდაციას გაუწევს. 

სასწავლო და სამუშაო შეხვედრები 4 მარტიდან - 27 ივნისის ჩათვლით, შაბათ-კვირის გარდა ყოველ დღეს, 09:00-18:00 საათებში, მედიააკადემიის სივრცეში გაიმართება. საგულისხმოა, რომ კურსის ფარგლებში უზრუნველყოფილი იქნება ყველა საჭირო ინვენტარი, ტექნიკა თუ აღჭურვილობა, რაც პრაქტიკული სამუშაოების და რეალურ საინფორმაციო სამსახურში მუშაობისთვის არის საჭირო. 

რეგისტრაციის გასავლელად ეწვიეთ ბმულს - https://forms.gle/nmEpnASSZwyESia48 . დამატებითი კითხვების შემთხვევაში კი, გამოგზავნეთ შეტყობინება კომუნიკაციების კომისიის ან მედიააკადემიის ფეისბუქ გვერდებზე.